Yesaya 44 - The Holy Bible in Moru (BAIBOLO ALOKADO) (MB)

OPI Toto ni Lu yi

1 OPI ekye:

“Ka'do inye, nyeri dri, zelevoi Yakoba ro, ruindu'bai maro,

lidri Yisaraele ro se manji be ono.

2 Ma OPI se ma'ba mi be ya endre roya ago ma oyebe mi opane ono ma atani;

Nya'do ko turiro; ami zelevoi Yakoba ro ruindu'bai maro,

lidri Yisaraele ro se manjibe ono.

3 “Mozona gyi 'da wari se gyilu be ya

ago ma'bana goloŋwai 'da udine gyini forokotiro yasi.

Medena Tori maro 'da kozoi miro dri

ago äṛu maro zelevoi miro dri.

4 Ànya ombanayi 'da kadoro oso käyi se gyi orivoya kadoro driigye 'do ronye,

oso okyi se gyi udiudiro kalasi 'do ronye.

5 “Lidri atana 'da, ba alo alo ekye: ‘Ma ni OPI ro.’

Azakana atana 'da ekye iyi zelevoi Yakoba ro,

ago vona cini ba alo alo egyina ävuru OPI ro 'da kufu ànyaro ya

ago uzina iyi 'da alo aza lidri Lu ro ro.”

6 OPI, se ni 'bädri'ba Yisaraele ro ago opa'ba na yi,

OPI Mbaraekye, kani ata nonye ekye:

“Ma ni orivoya käti, ago äduro;

Lu aza tona i'do oko toto ma ayani.

7 A'di ni ma ronye ya? Mi'ba ndana kayo tana,

mi'ba nda kiti tase ro kyeno mayebe ana tana

ago kiti tase ka oyebe a'done mileya 'do tana.

8 Nyà'do ko turiro, nyèŋga ya ko!

Inye'do miti tase ka oyebe a'done tu mileya ya

ṛo ko kyeno ämiri ya?

ago ami ni tazevoedre'bai maro.

Inye'do lu aza gibe to ni märi ya?

Lu mbaraekye aza i'do se meri tana be.”

Lu Awi Orivoya Ta Uguro yi

9 Ànya se cini kayibe lui edeedero edena iyi orivoya takaciako, ago lui se ànya ko'bayi lagyena be lekuru ŋgalitiza iyi orivoya losiako. Ànya se kayibe lui kwoi mätuna iyi orivoya miako ago tauniako, ago ànya a'donayi 'da driupiro. 10 A'di kani lu kode beti ŋga aza ro edena logo si mätune se orivoya takaci ako 'do ya? 11 'Dicini se kayibe mätuna iyi a'donayi 'da driupi ro. Lidri se cini kayibe lui edeedero edena iyi orivoya lidri yi. Mi'ba ànya kikyiyi edrene vure ya, ànya a'donayi 'da turituriro ago a'bana ànya 'da driupi ro.

12 Logoede'ba ru logo gwo ye losi gwo sina asi si. Nda ka lu edeedero udina edene kyidi si ago ka eŋgona kufu mbaraekye ndaro si. Ondro nda kate losina oye oko, täbiri ka nda ufu, gyilu ka nda ufu, ago nda ka okwo okwo.

13 Kyikyi kani ice na ojona. Nda si vona gwo piri si, ofo gwo ŋga ndaro ŋgaoforo si, ojo gwo ŋgaojoro si, ndi ede gwo beti lidri ro ronye, beti liŋgyiekye lidri ro ronye, o'bane zo ndaro ya. 14 Nda ka ice wiri ro ogana ayani losina oyeza, kode ka ice vudi ro kode kyiyi ro onjina ayani ni vocowa yasi. Kode nda ka ce wiri ro kyi'dina ayani, ndi 'bu 'degwo o'bane ombane. 15 'Dooko telesi ce na 'do ro a'dote tiza ro ndäri. Nda ede asi te azana si ndäri owine ago ambata o'beza; ago nda ede lu te azana si mätune. Nda ede lu edeedero te ago ändite rigye. 16 Nda ede asi te telesi ce na 'do rosi; lo'bi iza gwo sina, nya gwo, ago ojo nda gwo. Ka asi na owi ago ka ata ekye: “Asi ono orivoya kadoro! Asi ono kendeṛibe!” 17 Ede anjoko ce rote lu ro 'dooko ändite vuru rigye ago mätute. Nda mätute rigye ekye: “Mipa ma, tana mi orivoya lu maro!”

18 Lidri anya oso inye 'do niyi ta ko ago tausu ako tana ànya seyi mi ànyaro te ukyi ànya ondre vo 'da ago tisiyi drî ànyaro te ukyi ànya uni ta 'da. 19 Ede'ba lui edeedero ro orivoya tavouni ndi tavousu be ako ataza ekye: “Maza ice ono azaka te. Ma'be ambata te asikyele na si ago molo'bi iza te sina ndi manyate. Ago mede lui edeedero te anjoko ce na rosi. Ago ma ändi vuru noŋwa ce koṛogo ono ri!”

20 Ta ono laba oso abe torofo onya 'do ronye. Tausu amaama ndaro ono wiri nda te ago nda ni kote yi opane kode atane ekye: “Lu edeedero se märube drì maro ya ono orivoya lu awi yi.”

OPI, O'ba'ba ago Opa'ba

21 OPI ka ata ekye:

“Mìyi ta kwoi ami zelevoi Yakoba ro;

mìyi tana lidri Yisaraele ro anjioko ami ni ruindu'bai maro.

Ma'ba ami ni a'done ruindu'ba ro märi,

ago märi ta amiro ijene i'do alona Yiseraele'bai.

22 Mayo taenji amiro te zwi oso 'dikolo ronye, ago takozi amiro te zwi oso lätutu ronye.

Nyègo mare; tana mapa ami te.”

23 Mìtre riyä si, ami vo'buyakurui tana OPI ye ta 'desi te!

Mìtre, ami vo gyuru cini 'bädri ro ono!

Mìtre riyäsi 'bereŋwai, vocowa ndi ice cini nabe!

Tana OPI pa zelevoi Yakoba rote

ago äräṛuna nda 'da Yisaraele ya.

24 “OPI, opa'ba amiro;

se kobe ami be ono kani ata nonye ekye:

Ma ni OPI, O'ba'ba ŋga cini ro owo

Meŋga vo'buyakuru toto ni a'dwi kuru iṛe;

tuse mabe 'bädri o'ba ana si, 'diaza pa ma kote.

25 Ma ni kowe taäŋgu'bai ro lofona

ago ma ni ländri'bai o'bana a'done amamaro.

Ma ni ata tavouni'bai ro gburuna

ago ma ni tavouni ànyaro ka'dana a'done ta amaamaro.

26 Ma'bana taäŋgu ruindu'bai maro ro 'da a'done ŋgye,

ago ma'bana taora lazo'bai maro ro 'da a'done ŋgye.

Ma taiti Yerusalema ri makye lidri ogo orina 'da kpa to'dina lau,

ago ànya ogo obenayi 'bakicii Yuda ro 'da.

Mago mabena 'bakicii 'da tandroi ànyaro yasi.

27 Ata maro si ma'ba gyibebelebe te osene,

ma'bana goloi amiro 'da osene gbe.

28 Ma ata ta Sairasi rota makye: ‘Nda ka oyeni a'done lekye'ba ro vo maro ya;

nda ka oyeni tase cini malebe oyene.

Nda ozona ta ndi ogo Yerusalema obene,

ago ogo kotopa Yekalu ro etone.’ ”