'Diusi ni Lidri OPI ro Lakosi
1 “Ko 'dise eŋgye kumukacina te kode alo agovo na te 'do ri ocine lidri OPI ro lako mätune. 2 Ko ŋgwa se ätibe märi ro 'do ri ocine lidri OPI ro lako mätune, ca zelevoi ndaro, le kovole'bai ndaro 'butealo na ya.
3 “Ko Amona'bai kode Moaba'bai ri ocine lidri OPI ro lako mätune, ca zelevoi ànyaro le kovole'bai ànyaro 'butealo na ya. 4 Tana nyàbe ikyi ni Ezipeto yasi ànya gayitezo ŋgaonya ndi gyi be ozone ämiri, ago ànya gyeyi Balama ŋgwa Beora rote, ni 'bakici Petora Mesopotamia ro yasi ami otrine. 5 Caoko OPI Lu amiro gazo ta Balama ro erine; oko nda go toza latri ro äṛu ro ämiri, tana nda lu ami tawi. 6 Mìye ŋga aza ko cu tu'dei kwoi opaza kode ànya o'baza ŋgaamba be tu ori amiro rosi.
7 “Ko ya amiro ri osone Edoma'bai lomvo, tana ànya orivoya 'didiri amiro. Ago ya amiro koso ko Ezipeto'bai lomvo; tana kyenona mirite wari ànyaro ya. 8 Etoni kovole'bai ànyaro ninana ya oyigwo mileyaro zelevoi ànyaro ocina ndi lidri OPI ro lako mätune.
Ota Gawa Kyila'bai ro O'baro Wäṛiro
9 “Ondro nyà'dote gawa ya tu kyila rosi oko, be ämiri ami lagane ni ŋgase cini undiro 'do yasi. 10 Ondro ka'do manoaza ka'dote undiro tana tori kozi aza ezitate nda dri ŋgäkyi 'do si, 'dooko be ndäri ofone ni gawa yasi ago orine tesi lau. 11 Ondro kosate tandrolero oko ndäri andivo ndaro lasane, ago ondro kitu ocivoya oko ko'de gwo egone gawa ya.
12 “Be ämiri vo aza ka'dane tesi gawa kundusi ofoza ämiri kigye ondro milete ze ozene kode kudrä ufune owo. 13 Ämiri guli urune tro làkaza amiro kyila robe, tana ondro ze kosi ami te oko, mì'di 'bu robe sina, ago mìku drî ze ro robe sina. 14 Tana OPI Lu amiro orivoya ami yibe gawa amiro ya ami gagane ago ŋgaopeṛe ozone ämiri kyila'baazii amiro dri. Ta'dota, mì'ba gawa amiro a'done wäṛiro, ukyi nda ondre ŋgase undiro 'da ami lako ago usi kundu 'da ämiri.
Ota Azaka
15 “Ondro ka'do iyeäṛi aza kumute ni kuzupi ndaro resi kikyite yi opane mire oko, nyologo nda ko kovole. 16 Oko nda unina ndi orine ami lako alo aza 'ba'desii amiro ro se nda konjibe 'do ya, ago ko ämiri nda oyene siomba si.
17 “Beṛo ko Yisaraele'ba aza, manoago ro kode toko ro ri a'done ronyi'ba ro yekalu ya. 18 Beṛo ko ämiri parata se abe ronyi oye sina, kode päläti u'duro manoàgo azi be ro ezine zo OPI Lu amiro roya ozone ta tao'ba rota; tana ŋga riti kwoi orivoya ta undiro yi OPI Lu amiro ri.
19 “Nyozo parata kode ŋgaonya kode ŋga aza tiko ro ko Yisaraele'ba azi miro ri, logone miri drinju'du be. 20 Ŋgase nyozobe tiko ro 'diatra ro ri 'do migo miruna ndi drinju'duna be, oko ko miri ŋga ozone tiko ro Yisaraele'ba azi miro ri ta drinju'du rota, 'dooko OPI Lu amiro äṛuna ŋgase cini nyàbe oyena wari se nyàbe ukyi urune ana ya ndi.
21 “Ondro mi'batate ŋga aza oyene OPI Lu miro ri, ko miri orine tase mi'babe 'do oyeako. Tana endaro Opi Lu miro enjina tana ndi ni misi, ago atina takozi ro miri. 22 Ko orivoya takozi yi ondro ka'do mi'ba tao'baro kote owo. 23 Be miri tao'ba se mi'ba be OPI Lu miro ri ole miro si 'do oyene.
24 “Ondro nyate lävu ämvu kono ro manoaza ro yasi, minina ndi doŋgo na se milebe 'do onyane, oko beṛo ko miri azana uŋgyine koṛiga miro ya. 25 Ondro nyate lävu ämvu inya ro manoaza ro yasi, minina ndi inya na se nyabe okyena drì si 'do onyane, oko beṛo ko miri inya na olone iṛi si.
© The Holy Bible in Moru © The Bible Society in the Sudan, 2000