Ezekiele 4 - The Holy Bible in Moru (BAIBOLO ALOKADO) (MB)

Ezekiele ka Driumu Yerusalema ro Tana Ojo

1 Lu atate ekye: “Mi gi ŋgwa lidri ro ono, miru tu'bu aza, mi'ba mile miro ya, ago nyotosi beti 'bakici Yerusalema ro driigye. 2 'Dooko mi'di 'bu, miṛikala gyini ro, mira gawai, ago mi'be aga gbikyi lomvoigyesi ta drina umuro ka'dazana. 3 Miru logo kyelekpe aza ago nyedre kuru oso tiṛi ronye lakole miro 'bakici be ya. Mizami 'bakici driro oso ate drina umu ronye, ago nya ni drina umuna. Ono orivoya taka'daro yi tu'de Yisaraele ro ri.

4 “'Dooko nyu'du vuru lama gaṛi yasi miro dri, tana ma'ba taenji tu'de Yisaraele ro robe midri. Taenji na ka oye orine midri a'do u'du se nya oyebe u'dune ro voro. 5 Mirina 'da inye lau u'duna kama nätu 'butenjidriesu (390) ago nyezaruna 'da ta taenji ànyaro rota. Mozo taezaro miri inye tana u'du alo anjioko ndroa alo tana taezaro tu'de Yisaraele ro ka oye orine ndroa na oso inye. 6 Ondro minde 'do te oko, mizaru lama drigwo ro dri ago nyezaru ta taenji ànyaro rota u'duna 'butesu, u'du alo anjioko ndroa alo rueza ànyaro ro.

7 “Nyedre mi miro 'du driumu Yerusalema ro dri drì awi ro ago nyäŋgu takoziro lomvoigye. 8 Membena mi 'da ndi, ukyi miza mi 'da lama telesi dri madale mindena u'du miro driumu ro lutu.

9 “Ka'do inye miru kyifo, kaaza, koso, duduṛu, nyaraŋgo, ndi diri be. Nyodro'be ànya cini voaloya ago mi'be ambata ro. 'Do ŋgase miri onyane u'du kama nätu 'butenjidriesu (390) se nyabe u'du lama gaṛi ro dri 'do ya ni wo. 10 Ŋgaonya se miri onyane ojone ojo läŋgyina sekele 'buteritu onyane perena alodi u'du alo ya. 11 Ago ojona gyi kpa ojo miri umvune, kofo ritu u'du alo ya. 12 Miri asi edene ze lidri rosi, ŋgaonya la'dine asi na 'do si mile ànyaro yasi oso nyabe ambata onya ronye.”

13 OPI atate ekye: “Kpa inye Yisaraele'bai onyanayi ŋgaonya se undiro 'da, tu'dei se ma oyebe ànya perene kigyesi iyi ya.”

14 Oko mologotate makye: “Ko inye, OPI Mbarapara, tana menji andivo maro kote cu alona. Ṛoni ŋgaga maro si le yau ono manya iza koronya se kodrabe ta iro ronye kode koronya vocowa ro kosi ni 'do kote cu alona. Manya ŋgaonya se äzibe undiro 'do kote alona.”

15 Ta'dota Lu atate ekye: “Kado para. Ka'do inye ma'bana mi 'da asi edene ze ti rosi ayani, ago nyala'dina ŋgaonya miro te sina.”

16 Ago nda ugu ata kpate ekye: “Ŋgwa lidri ro, ma oyete ŋgaonya se ozone lidri Yerusalema ro ri 'do rukäna anana tesi. Lidri se lau ana a'donayi 'da tusuro ago milo'be be ondro ànya kayite ŋgaonya se onyane ànyari 'do ojona ago gyi se umvune ànyari 'do ojona ojo owo. 17 Ma oye oyene inye tana ŋgaonya ndi gyi ànyaro be kokye robe; ago ka'doyi robe mio'baako ago ànya kezayi ru robe ta takozi ànyaro rota.”