Vureope'bai 19 - The Holy Bible in Moru (BAIBOLO ALOKADO) (MB)

Lewe'ba ndi Toko Ogyeako Ndaro be

1 Tu kai si, Yisaraele bedri teinye 'bädri'ba ako, Lewe'ba aza orivoya se ka ori le telesi 'bädri lutu ro Eperaima roya. Nda ru ŋguti aza teni Beteleme se Yuda ya ana yasi a'done toko ogyeako ro ndäri. 2 Oko ŋguti ana a'dote ta'diriako nda be, ago anya gote 'ba täpi anyaro roya Beteleme ya, ago rite lau imba na su. 3 'Dooko mano ana usutate osone anya vo ukyine anya leyene egone ndare. Nda ru ruindu'ba ndaro te ndi doŋgyi ritu be. Ondro nda kosate oko ŋguti ana loci Lewe'ba se ana te zo ya, ago ondro täpi ŋguti ro kondre nda te oko, ru nda te yai'dwesi. 4 Ago täpi ŋguti ana ro atate ndäri orine nda be, ta'doro nda rite lau u'duna nätu. Ago 'dise ritu kai nyayi ŋga te ago mvuyi ŋga te lau. 5 Ondro u'du lisu si oko ànya piyimite kyenoŋboci ago edeyi iyi te nja oyine. Oko täpi ŋguti ro atate Lewe'ba se ana ri ekye: “Minya ŋgaŋwa aza lutu, mi'de gwo oyine.”

6 Ta'dota 'dise ritu kai riyite vuru nyayi ŋga te ago mvuyi ŋga te voaloya. 'Dooko täpi ŋguti ro atate ndäri ekye: “Molo'baru miri u'dune ŋgäkyi ono si noŋwa ago nya'do riyä si.”

7 Lewe'ba ana ŋgate oyine, oko ambago ndaro tadri ndaro te orine, ta'doro nda go u'du kpate ŋgäkyi ana si lau. 8 Ago u'du linji si oko nda ŋgate kyenoŋboci oyine, oko täpi ŋguti ro atate ekye: “Minya ŋgaŋwa aza lutu, miri fere miŋga le tandrolero.” Ta'dota 'di ritu kai nyayi ŋga te voaloya.

9 Ondro mano ana, toko ogyeako ndaro, ndi ruindu'ba ndaro be koŋgayite oyine oko, ambago ndaro, atate ndäri ekye: “Mindre yau te tandrole ro kitu kate oci; molo'baru miri nyù'du noŋwa ŋgäkyi ono si raa. Vo ka oyete unine, miri dri noŋwa nyà'do riyä ro. Ondo oko mìŋgana 'da ŋboci nyòyina 'da 'bäru.”

10 Oko mano ana lekote ogo u'dune lau ŋgäkyi ana si, ta'doro nda ndi toko ogyeako ndaro yibe ŋga oyiyite, ndi doŋgyi ritu umuro ndaro yibe. Ago ànya oyiyite Jebusa dri ro (anjioko Yerusalema ya). 11 Ondro ànya kosate ti Jebusa lomvo le tandrolero oko, ruindu'ba atate 'desi ndaro ri ekye: “Nyikyi mi'de mäku 'bakici Jebusa'bai ro ya ago mù'du ŋgäkyi ono si kigye.”

12 Oko 'desi ndaro atate ndäri ekye: “Ämäri ukune loline 'bakici atrai ro ya se ko Yisaraele'bai ro ono ya i'do. Ämäri lävune fere mileya ukyine u'dune le Gibea ya.” 13 Ago nda atate ruindu'ba ndaro ri ekye: “Nyikyi, mi'de mòjo osane Gibea kode Rama ya, ago mu'du robe vo kwoi alona aza ya.” 14 Ta'dota ànya uguyi oyi te. Ànya kayi ukyi osane Gibea se wari Benjamina roya ana ya oko kitu kate oci. 15 Ago ànya kuyite u'dune ŋgäkyi ana si Gibea ya. Ànya ciyite 'bakici ya ago riyite vuru vo däyiro 'bakici ro ya; caoko 'diaza ru ànya kote zo ndaro ya ŋgäkyi ana si.

16 Ondro ànya drigba dri lau oko, agoambago aza ikyite kaego 'bäru tandrole si ni losi oyevoya ämvu ndaro ya. Nda orivoya ni 'bädri lutu ro Eperaima roya si, oko yauono nda go ka ori Gibea ya. (Lidri se azaka kayibe ori lau kai ni 'bakala Benjamina ro yasi.) 17 Agoambago ana ndre aba'ba ana te orivoya vo däyiro 'bakici roya ago eji nda te ekye: “Nyikyi ni eŋwaroya? Ago nya oyi gaŋwaroya?”

18 Lewe'ba ana zatadrite ekye: “Mà'do ndi Beteleme se Yuda ya ana ya; mà ogo ono 'bäru ämärigä 'bädri lutu ro Eperaima roya. Oko 'diaza ru ama kote 'ba ndaro ya u'dune ŋgäkyi ono si. 19 Ama orivoya käyi be ago ŋgaonya be doŋgyii amaro ri, ago ŋgaonya ndi vino be orivoya andivo amaro ri, toko ogyeako maro ri ago kpa ruindi'ba maro ri. Ama teinye lemeri ŋgaaza ro ako”.

20 Ago agoambago atate ekye: “Nyìkyi orine zo maro ya! Mänina ndi vo amiro ondrene; ko kado u'dune ämiri ŋgäkyi si vo däyiro ono ya.” 21 Ta'dota nda ezi ànya te 'bäru ago ozo ŋgaonya te doŋgyii ànyaro ri. Ŋgwazii ndaro jayi pa ànyaro te, ago nyayi ŋgaonya te.

22 Ondro ànya kayi dri ugu riyä oye oko, mànoago kozi azaka 'ba'desi ana ro, muyidri zo rote gbikyi, ago etoyi käläsi o'bi te. Ànya atayite agoambago ana ri ekye: “Nyolofo mano gi nyezi be zo miro ya 'do tesi! Tana màle taoyene nda be.”

23 Oko agoambago ana twete tesi ànyare ago atate ànyari ekye: “Ko inye, bereazii maro! Rägu! Mìye ŋga undiro inye 'do ko! Mano ono orivoya ŋgwazi maro. 24 Mìndre, ŋguti kodroŋwa maro ndi toko ogyeako ndaro be orivoya. Yauono mì'ba molofo ànya tesi, mìru ànya, ago mìye tase mìlebe oyene ànyari. Oko mìye ŋga kozi aza ko mano ono ri!” 25 Caoko mànoago kai eriyi ta ndaro kote. 'Dooko Lewe'ba se ana ru toko ogyeako ndaro te lofo anya te tesi ànyare; ago ànya yeyitate anya be ŋgäkyi ana si raa madale voiwivoya ndi ànya e'be yi anya go oyine.

26 Ago ondro 'buzevo kosite oko, toko ana ikyite 'dete vuru käläsi zo agoambago, se ago anyaro be kigye ana ro kala, madale vo laya gwo ndiya. 27 Ago ago anyaro ŋgate kyenoŋbo ana si ago ondro kupi käläsi te ago kofote tesi oyine oko, nda ndre toko ogyeako ndaro te o'devoya vuru käläsi zo ro kala, aba anya ozo dri käläsi upine. 28 Nda atate anyari ekye: “Miŋga kuru. Mòyi robe.” Oko anya zatadri kote tana anya drate ṛi. 'Dooko nda 'ba avo anyaro te doŋgyi dri ago oyite. 29 Ondro nda kosate 'bäru oko nda cite zo ndaro ya ago ru iṛi te. Nda ru avo toko ogyeako ndaro rote ago tolo te iṛeiṛe 'butealo foritu, ago zote ba alo alo 'bakala 'butealo foritu cini Yisaraele ro yasi. 30 'Dise cini kondreyibe kai atayite ekye: “Màndre ŋga aza kätina kote oso inye! Ŋga aza kätina a'do kote oso nonye eto ṛo kyeno ni tuse Yisaraele'bai kefoyibe ni Ezipeto ya si madale ondro. Sindi ämäri ta aza atane tana ro! Sindi ŋga aza oyene tana ro.”