1 Teopila ri:
Lidri amba ojote ta ŋgase ayebe ama lako ono tana egyine. 2 Ànya egyiyi ta tase iti tana be ämäri ànya se kondreyi ŋga kwoi be ṛo ni etovoya ago se kopeyi lazona be ono te. 3 Tana ta'doro, mise Fopara ono, tana metenyi tase cini kwoi zevona te liyaro ni etovo ànyaro ya, musu tavona be ni kado tana egyine sirosiro miri. 4 Ma oyena nonye tana mini taŋgye ta cini se emba mibe sina ono robe.
Ayo Uti Yoane Bapatisi'ba ro Tana te
5 Tuse Eroda be ni 'bädri'ba Yuda ro ana si, kohani aza orivoya äzite Zekaria, se ni zelevo Abija kohani ro yasi. Toko ndaro ävuruna Elizabeta; anya kpa ni katidri kohani Arona ro yasi. 6 Ànya riti riyi ori kado te Lu mile ago royi ota ndi ta cini Opi robe te kadoro. 7 Ànya teinye ŋgwai ako tana Elizabeta kondo yi, ago anya ndi Zekaria be riti dete.
8 Tu alo si oko Zekaria ka ugu losi ndaro kohani ro oyena Yekalu ya, ka ugu kama ndaro ruindu ro ondoalo oyena. 9 Oso la'bi kohanii ro ronye, anji nda te vodo ovo si ŋga tägyi tagyiri ro ozane vo tori oloro dri. Ago nda oyite Yekalu Opi roya, 10 ago lowa lidri ro tesi mätuyite saa ŋga tägyi tagyiri ro oza rosi.
11 Malaika Opi ro ka'darute ndäri edrete telesi drígwo vo tori oloro ro se aza ŋga tägyi tagyiri robe kigye ana ya. 12 Ondro Zekaria kondre nda te oko, nda larote ago a'dote turituri ro. 13 Oko malaika atate ndäri ekye: “Nyuturi ko, Zekaria! Lu eri mätu miro te, ago toko miro Elizabeta utina ŋgwa agoro 'da miri, ago mizina ävuru ndaro 'da Yoane. 14 Nya'dona yai'dwesi ago riyä si ago 'di azaka amba a'dona kpa yai'dwesi ondro äti nda te owo! 15 Nda a'dona 'da mano 'desi ro Opi mile. Beṛo ko ndäri vino ndi wa osoekye be umvune. Ṛo ni uti ndaro si nda a'dona 'da twi Tori Alokado be, 16 ago nda ezina amba lidri Yisaraele ro ro 'da Opi Lu ànyaro re. 17 Nda oyina 'da Opi mile, mbara be ago aṛi be oso nebi Eliya ronye. Nda ezina täpii ndi ŋgwai be 'da voaloya kpa to'di, nda ezana mi lidri taoroako'bai ro 'da kovole liti tavousu ro ŋgyero ya, nda edena lidri Opi ro 'da nja ndäri.”
18 Zakaria atate malaika ri ekye: “Ondro ka'do ta ono ka'do ndi endaro mänina eŋwanye ya? Yauono made te, ago toko maro de kpate.” 19 Malaika zatadrite ekye: “Ma Gaberiele, ma edre Lu kandra, nda ezo ma te ta opene miri ago lazo kado ono tana itine miri. 20 Oko mima kote lazo maro ya, se a'dona 'da endaro tu ŋgyena ya. Tana mima kote nya'dona te mbaraako atane, mirina te titiro madale tuse tao'ba maro miri a'dona lutu endaro.”
21 Lidri rite madaro Zakaria kotevoya ago laroyite tu ori ndaro madaro Yekalu ya tana ro. 22 Ondro nda kefote tesi oko, nda ni kote atane ànyari, ago 'dooko ànya niyite anjioko nda ndre rulofo te Yekalu ya. Nda te mbaraako ta atane, nda ye taka'daro te ànyari drí ndaro si.
23 Ondro tu ndaro ruindu ro Yekalu ya kokyete oko, Zekaria oyite kovole 'bäru. 24 Tu fere vosi oko toko ndaro Elizabeta kwo ŋgwa te ago efo kote ni zo yasi imba na nji. 25 Anya atate ekye: “Yauono Opi pa ma te. Nda ana driupi maro se azi mile ono te.”
Ayo Uti Yesu ro Tana te
26 Imba njidrialo Elizabeta ro a'doro kovoro rosi oko Lu zo malaika Gaberiele te 'ba'desi aza Galilaya roya se äzibe Nazareta. 27 Nda lazo be ŋguti se a'be te mano se äzibe Yosepa ana ri, se ni zelevo 'Bädri'ba Dawidi ro yasi. Ävuru ŋguti ro ni Maria. 28 Malaika ikyite anya re ago atate ekye: “Taliatokpe ka'do mibe! Opi orivoya mibe ago äṛu mite ndra!” 29 Maria a'dote rritiro tusuro lazo malaika ro tana ro, ago anya larote lo'bemite ata ndaro takacina ro. 30 Malaika atate anya ri ekye: “Nya'do ko turituri ro, Maria; Lu a'dote yauni be miri. 31 Mikwona ŋgwa 'da ago mitina ŋgwaagoro 'da, ago mizina ävuru ndaro 'da Yesu. 32 Nda a'dona 'da 'desi ro ago äzina 'da Ŋgwa Lu Fopara Ndra ro. Opi Lu o'bana nda 'da 'bädri'ba ro, oso zutu ndaro Dawidi ronye, 33 ago nda a'dona 'da 'bädri'ba ro, zelevoi Yakoba ro ri äduako, miri 'bädri'ba ndaro ro okyena ko alona!”
34 Maria atate malaika ri ekye: “Ma drigba ŋguti kodroŋwa ro, oko 'do a'dona eŋwanye ya?”
35 Malaika zatadrite ekye: “Tori Alokado ikyina 'da midri ago mbara Lu Fopara Ndra ro orina 'da midri. Tana ta ono ro ŋgwa alokado ono äzina 'da Ŋgwa Lu ro. 36 Miyi ta diri miro Elizabeta ro. Atate ekye anya unina ko te a'done ŋgwà be, oko andivo anyaro te kovoro ro yauono imbana te njidrialo; anya gica odeodero pari owo. 37 Tana ŋga aza i'do se Lu unina ko oyene.”
38 Maria atate ekye: “Ma ni ruindu'ba Opi ro owo, mi'ba ka'do ndi märi oso nyatabe ronye.” Ago malaika oyite ni anya resi.
Maria Täkyi Elizabeta te
39 Ono vosi Maria ŋgate dori ago oyite foroforo 'ba'desi 'bädri lutu ro Yuda roya. 40 Anya oyi cite zo Zakaria roya ago ye mede te Elizabeta ri. 41 Ondro Elizabeta keri mede oye Maria rote oko ŋgwa ŋgate anya ya, ago Elizabeta a'dote twi Tori Alokado be, 42 ago trete amba ekye: “Äṛu mi te ndrani 'ditoko cini ri, ago ŋgwa se nya oyebe utine ono äṛute! 43 Tase 'desi ro ono a'dote märi etaya, tana e'di endre Opi maro ro ikyite ma täkyine niya? 44 Tana meri mede miro te dori oko, ŋgwa maya ŋgate yai'dwesi. 45 Opi äṛu mite tana mimate anjioko lazo ndaro miri a'dona ndi endaro.”
Maria ka Lu Räṛu
46 Maria atate ekye:
“Ya maro ka Opi räṛu;
47 lindri maro yai'dwesi ta Lu Opa'ba maro rota,
48 tana nda yi ta ma ruindu'ba ndaro mäyuro rote.
Etoni yauono le kovole'bai se cini kabe ikyi ya lidri atana 'da ekye äṛu ma te,
49 tana ŋgase 'desi ro Lu Mbarapara koyebe märi ono ta.
Ävuru ndaro ni alokado;
50 ni kovole'bai alo ya le vona cini ya
nda ka yauni ka'da ànya se koroyi nda be kai ri.
51 Nda pere kufu mbaraekye ndaro te
ago pere driuŋgyi'bai te tavoora cini ànyaro be.
52 Nda lofo 'bädri'bai mbaraekye te vuru ni gitii ànyaro drisi,
ago eŋga 'di mäyuro te kuru 'desiro.
53 Nda 'ba ya 'dise täbiri be ro gate ŋga kado si,
ago nda zo ŋgaamba'bai te drí awiro.
54 Nda äti tao'ba ndaro se nda ko'babe zutui amaro ri te,
ago ikyite ruindu'ba ndaro Yisaraele opane.
55 Nda yitate yauni ka'dane Abarayama ri
ndi zelevoi cini ndaro be äduako!”
56 Maria rite Elizabeta be oso imba nätu ronye ago 'dooko anya gote kovole 'bäru.
Uti Yoane Bapatisi'ba ro
57 Tu esate Elizabeta ri ŋgwa anyaro utiza, ago anya ti ŋgwaagoro te. 58 Oriazii anyaro ndi 'didiri anyaro be eriyi tase kado laroro Opi koyebe anyari ono tana te, ago ànya yeyi riyä te anya be.
59 Ondro u'du ŋgwa rote njidrieri oko ànya ikyiyite nda olone ŋbiṛiro, ago ànya leyi nda uzine Zakaria, täpi ndaro dri. 60 Oko endre ndaro atate ekye: “Hwa! Ävuru ndaro a'done Yoane.”
61 Ànya atayite anya ri ekye: “'Didiri miro aza i'do ävuru 'do be!” 62 'Dooko ànya ejiyi täpi ndaro te drí si ävuru se nda lebe ŋgwa ri a'done sina uzine.
63 Zakaria ejitate ŋga taegyiro taegyiza driigye ta ago egyite ekye: “Ävuru ndaro ni Yoane.” Ànya cini a'dote larolaro ro. 64 Ago dori Zakaria eto atate, ago eto Lu räṛu te. 65 Oriazii cini a'dote twi turi be, ago lazo tase kwoi ro larirute 'bädri cini lutu ro Yuda ro yasi. 66 'Dicini se keri tana be usu tavona te ago ejitate ekye: “Ŋgwa ono a'dona eŋwanye ya?” Endaro mbara Opi ro teṛo orivoya ŋbelero nda dri.
Zakaria ka Lu Räṛu
67 Täpi Yoane ro Zakaria a'dote twi Tori Alokado be, ago nda äŋgu tate ekye:
68 “Mì'de märäṛu Opi, Lu Yisaraele ro!
Nda ikyite lidri ndaro opane ri ago 'ba ànya te dritai ro.
69 Nda ozo Opa'ba aṛiekye te ämäri,
ni zelevo Dawidi ruindu'ba ndaro ro yasi.
70 Nda 'batate ṛo kyeno nebii alokado ndaro si,
71 anjioko nda opana ama 'da ni kyila'baazii amaro risi,
ago ni mbara ànya se cini yana kabe oso ama lomvo ro yasi.
72 Nda atate nda ka'dana yauni 'da zutui amaro ri
ago oyina tao'baro alokado ndaro tana 'da.
73 Ruäṛu lämu'duro si zutu amaro Abarayama ri
74 nda 'batate ama opane ni kyila'baazii amaro ri,
tana mìnduru robe ndäri teinye turi ako,
75 tana ma'do robe alokado ago taŋgye'bai ro nda mile
tu cini ori amaro rosi.
76 “Mi, ŋgwa maro, äzina mi 'da nebi Lu Fopara Ndra ro.
Nyoyina 'da käti Opi mile
liti ndaro edene ndäri,
77 ta itine lidri ndaro ri apana ànya 'da
takozi ànyaro e'bena si.
78 Lu amaro yauni amba be ago yai'dwe be
Nda o'bana voeyi 'buzevoosiro ŋgaoparo 'da itune ämädri.
79 Voeyine ni vo'buyakuru yasi, vona se cini kabe ori lindri uniro odra roya kai dri,
aba amaro lepene liti taliatokpe roya.”
80 Ŋgwa mbate ago a'dote mbararo lomvo ya ago tori ya. Yoane rite vocowa ya madale tuse nda ka'dayite ŋbelero lidri Yisaraele ro ri.
© The Holy Bible in Moru © The Bible Society in the Sudan, 2000