1 Eyobo, mizi läzi yau. Inye'do kode 'diaza ozana tadri miro 'da ya?
Inye'do malaika eŋwani mizana mi driigye ŋgaopa ta ya?
2 Endaro milo'be ka 'dise amama ro ufu na ufu,
ago yagäru ka tauniako'ba ufu ṛi.
3 Mandrebe 'di azaka se amamaro landre ndi kadoro,
oko ndriŋwa oko matri 'ba ànyaro te ekye:
4 Ŋgwàagoro ànyaro unina ko a'done londro ro;
vo vure roya ape ànya te ago 'diaza 'de kote ànya vosi.
5 'Dise täbiri ro onyana ŋgaluru 'dise amamaro ro ṛoni,
ca inya se kabe omba kukyi lako iyi,
ago lidri se gyilu be o'bana mawi 'du ŋgadriamba ndaro ta.
6 Tana rueza efo ko ni durufu yasi,
ca rritii hwe ko ni gyini yasi.
7 Lidri ka rriti ezi ni andivo iro dri,
oso tindrwo kabe oŋga kuru 'do ronye.
8 Aba ka'do gwo ma mazana mi te Lu re
ago mezina rriti maro te ndare ayani.
9 Ndase kabe ta 'desi se änikote ono oyena kwoi,
talaro ro ndaro äduna i'do.
10 Nda kani 'bu ezi u'dine gyini dri
ago ka gyi loda ni ämvu dri.
11 Lu kani 'di mäyuro eŋga 'desiro
ago kani riyä ozo ànya se kabe liyi ri.
12 Nda kani tavoora 'diodo'bai ro gburuna
ukyi ŋgase cini ànya kabe oyena a'do 'da kadoro.
13 Nda ka tavouni'bai baṛina taoye modo ànyaro rosi;
ago ka tavoora 'dikozi ro o'bana ni okyene ndri.
14 Ŋgätini ka ikyi ànya dri kitu si,
ca kitudiri si ànya ka votämbi mo'demo'de oso ŋgätini yasi ronye.
15 Oko Lu ka kyemvo opa ni odra yasi;
nda ka 'dise lemeri ro opa ni ezavoya si.
16 Ta'dota lemeri'bai te mio'ba be ago taŋgyeako'ba a'bo kala nate.
17 Mano se Lu kabe lukuna ni kado!
Ka'do inye nyamawo ŋga luku ndaro ko.
18 Lu kani laza se nda ko'bibe 'do uvuna;
drì ndaro kani 'di o'bi ago drì ndaro kani edena.
19 Tu cini ya nda opana mi 'da ni mi oyevoya koziro;
ago ŋga kozi odona mi ko.
20 Tu mä'bu rosi nda opana mi 'da ni odravoya,
ago kyila ya nda opana mi 'da ni ufuvoya.
21 Lu gagana mi 'da ni talari kowe si ävuru enjiro 'do yasi;
ago nyuturi na ko ondro odra kikyi ca owo.
22 Miguna 'da tu odra ro ndi täbiri robe si
ago minina ko turine ni koronyai vocowa ro ri.
23 Ämvu se nyabe osona a'dona kuni ako;
ago koronyai vocowa ro gotanayi mi ko alona.
24 Mirina 'da liatokpero zo boŋgoro miro ya;
ago ondro nyate timele miro timo oko nyusuna ànya 'da kpeye kadoro.
25 Nya'dona 'da kozoi be amba
zelevoi miro a'dona 'da oso bi käyi ro lowo ya ronye.
26 Midena 'da pari mi'dena gwo odrane
oso inya konde vo te oko abe olona le tu olona ro si 'do ronye.
27 Eyobo, mètenyi tase ono te orivoya taŋgye yi.
Ka'do inye yauono nyeri ago miletadrina teri.
© The Holy Bible in Moru © The Bible Society in the Sudan, 2000