Manoago
1 Macite ämvu maro ya,
nda se mulu tawi, toko maro ogyero ono.
Mate ugu ŋga ŋgutruro maro topina, ndi mure be;
mate ugu epe maro ombena ndi ba epe robe;
mate ugu vino ndi leyi maro be umvuna.
Ndiriŋwa
Ami se nyulu ami tawi ono, minya ŋga ago mimvu ŋga
madale ya amiro ka'do lutu twi ŋgalu be!
Loŋgo lisu
Ŋgagatoko
2 Ondro mu'dute oko, ya maro rite miuŋbo.
Tori ezitate mädri ekye nda se mulu tawi ono ka käläsi o'bi.
Manoago
Mipi käläsi märi, mi se mulube ono,
mi se ya maro lu tawi, tu'bu maro, mise kadopara ono.
Drî maro curucururo nduruṛi be,
ago drikyiri maro orivoya kyindrwi ni lätutu ri.
Ŋgagatoko
3 Matri boŋgo ṛote nja;
mago masona boŋgo kpa to'di etaya?
Maja pà maro te;
mago ma'bana ànya kpa to'di undiro etaya?
4 Nda se mulu tawi ono 'ba drì ndaro te käläsi kala,
ago ma'dote twi riyä be.
5 Maŋgate käläsi upine nda se mulu tawi ono ri.
Dri maro ändrute mure si,
driŋgwà maro ändrute ido mure rosi,
ondro märu drì käläsi rote owo.
6 Mäpi käläsi te nda se mulu tawi ono ri,
oko anjioko nda oyite kyeno.
Ata ndaro 'ba mate tusu ro!
Mäṛi nda te oko musu nda kote;
mäzi nda te oko nda zatadri kote.
7 Vookwa'bai se kayibe ugu aba 'bakici lomvosi kai usuyi ma te;
ànya 'biyi mate ago gayi laza te malomvo;
vookwa'bai tiṛi lomvosi kai nayi boŋgo kufudri ro maro te.
8 Mi'ba tao'ba mabe, ndiriŋwa Yerusalema ro,
anjioko ondro nyusu nda se mulu tawi ono te,
nyata 'da ndäri mikye mbara ŋgalu ro pe ma te ṛe.
Ndiriŋwa
9 Inye'do nda se nyulu tawi ono orivoya kadopara ndra ni azi cini riya.
Mise nyiliŋgyi ndra ni ndiriŋwa azi cini drisi ono?
Ŋgase aza iga liŋgyiekyero ta ndaro ta ndrani azi cini drisi
se o'bana ama gwo tao'ba o'bane mibe e'diya?
Ŋgagatoko
10 Nda se mulu tawi ono orivoya liŋgyiekye ago mbara ro;
nda toto ni to ni kutu 'bute lakosi.
11 Militi ndaro oso logo läguläguro wäṛiro ronye;
drikyiri ndaro orivoya 'boye'boye ro,
uniro oso korowa ronye.
12 Mi ndaro orivoya liŋgyiekye oso tu'bui golo udiudiro kala ronye,
oso tu'bui se ajabe leyi si ago arabe njere ronye.
13 Biṛii ndaro orivoya liŋgyiekye oso ämvu se agba be
ago ŋga ŋgutruro be ronye.
Biṛi ndaro laba oso kolele ronye,
uduuduro ido mure rosi.
14 Dríi ndaro oso logo läguläguro ronye,
ago nda ka mäŋgusi läguläguro osona ayani.
Lomvo ndaro orivoya biliro oso liwasi ronye,
ara safire te kigyesi.
15 Pai ndaro orivoya oso läŋgyiri alabasata ro
se änjute logo läguläguro ya.
Nda orivoya oso 'bereŋwa Lebanona ro
wiri ogwaekye anyaro be ronye.
16 Kala ndaro orivoya ndeṛiekye njunjune;
ŋga cini ndaro tana si ma tawi.
Nda ni se mulu tawi owo, nda ni bereazi maro owo, ono laba oso inye,
ami ndiriŋwa Yerusalema ro.