Mätu Mano Taenjiako'ba ro
1 Nyeri, Äye OPI, rulo'ba maro ta taŋgye rota;
miga bi driayo maro erine!
Nyeri mätu maro tana ma taŋgye ata.
2 Mipena vure maro 'da taŋgye si,
ago mini tase orivoya ŋgye 'do.
3 Ondro ka'do mini ya maro ca,
nyätäkyi ma ca ŋgäkyi si;
ago nyena ya maro ca,
nyusuna ta undi aza ko ma ya.
4 Oso azii ka atana be ronye; mata ta undiro ko,
maro ota miro te
ago maso kote liti siomba si vo.
5 Masote ondoalo liti miro voro
ago mäku kote ni kigyesi.
6 Ma driayo miri, Äye Lu, tana mizatadri maro te;
ka'do inye nyeza mi mare ago nyeri mätu maro.
7 Nyaka'da ŋgalu para miro;
mi se nyani ànya se kabe ruopavo uṛi miya ni kyilaazii ànyaro risi opana ono.
8 Nyagaga ma oso abe mikeci gaga ronye;
nyada'do ma lindri kufui miro ro zele
9 ni ŋgagota lidri koziro ro risi.
Kyila'baazii 'diufu ro se kumudri maro be ono;
10 ànya teinye yauni ako ago kayi ta ata driuŋgyi si.
11 Ànya kayi ma lanja ago yauono ànya orivoya gbikyi ma lomvosi,
ago ànya kayi kandrakado kote ma ovoza vuru.
12 Ànya orivoya oso ibii ronye, nja 'di towane,
oso ibi ŋgwai ronye kayi ruda'do 'di osine.
13 Nyikyi, OPI! Nyedre ŋbi kyila'baazii maro mile ago mipe ànya!
Mipa ma ni 'di kozi ri bando miro si;
14 mipa ma ni ànya se päläti ànyaro ni 'bädri ro ono rigyesi Äye OPI.
Nyeza ànya taezaro se miṛikalana be ànya ezaza si,
ka'do robe amba ŋgwai ànyaro ri
ago e'be rukäna robe kwozoi ànyaro ro ri!
15 Oko ka'dobe ma, a'do taŋgye maro rosi mandrena mi 'da;
ago ondro mäpi mi te oko, ondre miro o'bana ya maro 'da twi riyä ro.