Yosua Pe Jabina ndi Bereazii Ndaro be te Ṛe
1 Ondro lazo ŋgaopeṛe Yisaraele'bai ro ro kosate Jabina 'bädri'ba Azora ro ri oko, nda zo lazo te Jobaba 'bädri'ba Madona ro ago, 'bädri'bai Simerona ro ndi Akesafa robe ri, 2 ago 'bädri'bai se mä'dudrisi 'bädri luturo yasi, Vodelero Yaradene ro ŋgäṛiŋgwadri Fofo Galilaya ro yasi, lutui pasi, ndi Nafatadora se aŋgoyasi be ri. 3 Nda zo lazo kpate Kanana'bai se koriyibe lamadri riti Golo Yaradene ro yasi iyi ri, Amora'bai, Ete'bai, Pereza'bai ndi Jebusa'bai se 'bädri luturo yasi kai be ri, ago kpa Iva'bai se koriyibe 'Bereŋwa Eremona pa wari Mizepa roya ana ri. 4 Ànya ikyiyite kyila'bai cini ànyaro yibe, lowa ro, oso siŋgwa kototi gyi'desi roya ronye. Ago ànya kpa farasii ndi arabia kyilaro be amba. 5 'Bädri'bai se cini kwoi dro'beyi kyila'bai ànyaro te, ago ànya ikyi otoyi gawa te voaloya Goloŋwa Meroma ro kala, kyila oyene Yisaraele'bai be.
6 Ago OPI atate Yosua ri ekye: “Nya'do ko turiro ni ànyari. Tana ondo oso saa nonye oko mutufuna ànya cini 'da Yisaraele ri. 'Dooko nyòtoga riŋgo farasii ànyaro ro ago mìza arabia kyila ro ànyaro asi si.” 7 Ta'dota Yosua ndi lidri cini ndaro kyilaoye robe gotayi ànya te ätruku'du ro Goloŋwa Meroma ro kala. 8 OPI ozo ànya te drì Yisaraele'bai roya se peyi ànya te ṛe, ago njayi ànya te le Sidona ya le Miserefota Maima ya, ago le ogone 'buzele vodelero Mizepa roya. Ànya uguyi kyila oyete madale alo aza kyila'baazii ànyaro ro e'be kote lidriidriro. 9 Ago Yosua yetate ànyari oso se OPI kozo ota na be ndäri ronye; nda toga riŋgo farasii ànyaro rote, ago zayi arabia kyila ro ànyaro te asi si.
10 'Dooko Yosua egote kovole, ru 'bakici Azora ro te ago fu 'bädri'ba na te. (Tana tugi kai si Azora ni vose mbaraekye ndra yi ni vo azii se cini lau kai drisi.) 11 Ànya tufuyi 'dise cini kigye lau kai te kpeye; e'be 'diaza alo kote lidriidriro, ago ànya za 'bakici Azora rote asi si.
12 Yosua ru 'bakici se cini kai te, ndi 'bädri'bai ànyaro be, tufuyi 'dicini te kpeye, oso Musa ruindu'ba OPI ro, kozo ota na be ronye. 13 Caoko, Yisaraele'bai zayi 'bakici se cini abebe votoŋgoro yasi kote, Yosua za toto Azora ayani. 14 Lidri Yisaraele ro ruyi ŋgase cini kadokado ndi koronyai 'ba ro be teni 'bakicii cini kwoi yasi ago etayite andivo ànyaro ri. Oko ànya tufuyi lidri cini te; e'beyi 'diaza alo kote lidriidriro. 15 Tana OPI ozo ota te Musa ruindu'ba ndaro ri, ago Musa ozote Yosua ri, ndi Yosua ro ànya te. Yosua ye ŋgase cini OPI kota Musa be oyene ana te.
Wari se Yosua Kurube
16 Yosua ru wari cini ono te, 'bädri lutu ro ndi Negebe be ndi wari cini Gosena ro ago vodelero ya ndi Araba be ago 'bereŋwai Yisaraele ro ndi vodelero nabe. 17 Eto ṛoni wari 'Bereŋwa Alaka ro loto Edoma lomvo yasi, sagwo le Balegada ya, le Vodelero Lebanona roya 'Bereŋwa Eremona roya. Nda ru 'bädri'bai ànyaro te cini ago tufu ànya te. 18 Yosua ye kyila te 'bädri'bai se cini wari kwoi robe ndroa na amba. 19 'Bakici se ko'ba taliatokpe be lidri Yisaraele robe ni toto Gibeona se Iva'bai koribe kigye ana. Oko anjoko 'bakicii ro ärute kpeye kyila ya. 20 OPI 'ba ànya ni a'done taeriako ago kyila oyene Yisaraele'bai be, tana epere ago utufu ànya robe kpaye teinye yauni ako oso se OPI kota Musa be ronye.
21 Ago Tu ana si Yosua oyite ago tufu lidri lombaekye se äzibe Anakima'bai se koriyibe 'bädri luturo yasi, Eberona, Debira, Anaba ndi 'bädri cini luturo Yuda ndi Yisaraele robe yasi kai te. Yosua tufu ànya te kpeye ago pere 'bakicii ànyaro te. 22 E'be Anakima'ba aza alo kote wari se Yisaraele'bai kurube ana ya; oko azaka ànyaro e'be toto fere Gaza, Gata, ndi Asedodo be yasi.
23 Yosua ru wari cini te, oso se OPI kata tana be Musa ri ronye. Yosua ozo wari te Yisaraele'bai ri oso drimbi ronye ago lonyi te ba alo alo 'bakala cini ri.
Ta'dota lidri lolite ni kyila oye ri.