Taata Biledada ro: Ede Abari Tana Lidri Kozi
1 Biledada Suaba zatadrite ekye: 2 Ta ata miro äduna okyena itu ya?
Midri titiro 'dooko mänina ndi atane miri.
3 Tana e'di mindre ama gwo oso ti ronye ya? Ago ma'do gwo miri oso 'di amama ronye etaya?
4 Nya gialo andivo miro oyena koziro kyila miro 'do si.
Inye'do e'bena gyini gindi ta miro si ya?
Inye'do ähswena 'bereŋwa gindi ni vona yasi tana kusi mi robe ya?
5 Izwena ŋgaeyi takozi'ba ro 'da:
ago leko asi anyaro ro eyina vo ko alona.
6 Ŋgaeyi zo boŋgo ro ndaro ya a'dona 'da ŋgätini ro,
ago lamba ndaro izwete.
7 Sedri nda ka aba ŋgyiri ro, oko yauono aba ndaro te mbaraako;
ago tase nda modo korabe 'do ka nda ovo vuru.
8 Nda ka oci kyimba ya pa ndaro si, ago ru pa ndaro te;
9 abari ka pakäsusu ndaro uruna ago baṛi nda te anda.
10 Ada'do mäŋgäviri te gyini ya;
ago a'be abari te ndäri liti dri.
11 Turi ka nda egbe lamadri cini yasi;
ago ka nda lanja abavo cini ndaro yasi.
12 Täbiri toŋgo mbara ndaro te;
kandrakozi edrete ago ka nda kote lamadri ndaro ya.
13 Adravo kozi enji lomvo ndaro te
ago odra ka kufu ndi miṛi ndaro be onyana.
14 Otowa nda teni zo boŋgoro se nda koribe kigye londroro ana yasi,
ago ese nda te tesi drio'bene 'Bädri'ba Odra be.
15 Yauono 'diaza orina ndi zo boŋgoro ndaro ya,
caoko asi bäruti ro layina 'da driigye!
16 Paji ndaro wite ago gwoṛii ndaro lunyite.
17 Liku ndaro kyete ni 'bädri yasi;
'diaza unina kote ta ndaro oyine.
18 Avona nda 'da ni ŋgaeyi yasi le ŋgätini ya,
anjana nda 'da ni 'bädri yasi.
19 Nda teinye zelevoi ako, kode kwozoi ako,
ago 'diaza paru kote lidriidriro ni vose nda koribe kigye 'do ya.
20 'Dise ni aŋgoyasi a'dona lä'bilä'bi ro, kandra kozi ndaro tana erivoya;
ago ànya se ni 'buzelesi läbina adrwidrwi ni turi ri.
21 'Doni endaro kandrakozi lidri koziro ro,
kandrakozi ànya se koti ta Lu ro ko ro owo.