Liŋgyi Yerusalema ro Tu Mileya ya
1 Miŋga, Yerusalema, nyeyivo tana ŋgaeyi miro esate;
ago lägu OPI ro ka voeyi midri!
2 Ŋgätini takona 'bädri 'da,
ago ŋgätini gbiṛikyiri takona tu'dei 'da
Oko ŋgaeyi OPI ro eyina vo 'da midri;
ago andrena ŋgaeyi ndaro 'da midri.
3 Tu'dei ikyinayi 'da ŋgaeyi miro ya,
ago 'bädri'bai ikyinayi 'da iwivo ŋgaeyi kpiri miro roya.
4 Mindrevo gbikyi milomvosi ago mindre;
Lidri miro kayite kalakoto egone mire!
Ŋgwàagoro miro ikyinayi 'da ni lozo si;
ago äŋgyina ndiriŋwa miro 'da drì ya.
5 Mindrena ta ono 'da ago nya'dona 'da yai'dwe amba si;
Nyalarona 'da ago nya'dona riyä ro,
tana ezina ŋgadriamba tu'dei ro 'da miri;
Ŋgadriamba ànyaro ikyina 'da miri.
6 Lowa gamelei ro ikyina 'da, ni Midiana ndi Efa be yasi.
Lidri ikyinayi 'da ni Seba yasi, ezinayi logo läguläguro ndi ŋga ŋgutruro be 'da.
Ànya räṛunayi OPI 'da!
7 Ezina äṛu koronyai cini Kedara ro 'da miri, ezina timele Nebayota ro 'da miri olone tori ro
Ago ozane vo tori oloro dri OPI i'dweza.
OPI o'bana Yekalu ndaro 'da ndra liŋgyiekye.
8 Ŋga gi kabe ugu udi oso 'dikolo ronye,
ago oso tu'bui kayi ugu ogo 'bäru kwoi a'diyi owo ya?
9 Ànya ni wari lozo yasi kayi ezi ikyi,
Toŋboi 'desi ro ka lidri Lu ro ezina;
tro mo'di ndi logo läguläguro ànyaro be,
ävuru OPI Lu alokado Yisaraele ro ro orozana,
tana nda ye talaroro te ämiri.
10 OPI ka ata Yerusalema ri ekye:
“Atrai o'benayi tiṛi miro 'da,
ago 'bädri'bai ànyaro indurunayi 'da miri.
Tana meza mite kyila si,
oko yauni maro si maka'dana yauni 'da miri.
11 Dereŋwai miro a'dona 'da uŋbo ondoalo, kitu si ago ŋgäkyi si, änina ko osene,
tana lidri kezi ŋgadriamba ànyaro robe miri,
'bädri'bai ànyaro o'dena ni mileya ezivonaya.
12 Oko tu'de kode 'bädri se koro mi kote utufuna ndi,
tu'dei oso inye 'do ronye utufuna 'da kyeye.
13 “Ice se kadopara vocowa Lebanona ro kwoi,
ezina 'da ogoza mi obeza, Yerusalema,
ice azaka, ndi ice kyiyi robe
ezine Yekalu maro edeza liŋgyiekye,
màbana vose maro pa otoro ono 'da orooro ro.
14 Ŋgwà ànya se kezayi ami be iyi ro ikyinayi 'da
ago ändinayi 'da taoro ka'daza miri.
Vona se cini kamawo mi be iyi mätunayi 'da mi pa.
Ànya uzinayi ävuru miro 'da ‘'Bakici OPI ro,’
‘Zaiona, 'Bakici Lu Alokado Yisaraele ro ro.’
15 “Sedri e'be mi te ago ya lidri ro osote milomvo,
'diaza lävu kote mi yasi.
Ma'bana mi 'da 'desiro 'du ro,
a'done vo riyä ro rriro äduako.
16 Miruna ŋgase kadopara tu'dei ro 'da
ago ŋga kadopara 'bädri'bai ro 'da.
Minina 'da anjioko ma, OPI, ma opa'ba miro,
ma mi onji ni dritai ro ma Lu Mbaraekye Yisaraele ro.
17 “Mezina te logo läguläguro ayani vo atala roya,
ago mo'di a'dona te vo logo roya,
ago atala a'dona te vo ice roya,
ago logo a'dona te vo kuni roya.
Dri'bai miro mirinayi mi 'da taliatokpe si;
ma'bana ànya 'da 'dimirine taŋgye si.
18 Änina kote ogone kporo kyila ro erine tona wari miro ya;
'ditufu ndi vopere be unina kote a'done kishwedri miro yasi.
Tiṛii miro gagana mi 'da;
ago dereŋwai miro räṛuna mi 'da.
19 “Kitu unina kote a'done ŋgaeyi ro miri kitu si
kode imba unina kote a'done ŋgaeyi ro miri ŋgäkyi si;
tana ma, OPI, ma'dona teni ŋgaeyi äduako ro miri;
ago ma Lu miro ma'dona teni 'desi miro.
20 Kitu miro unina kote ocine,
ca imba miro ocina ko;
tana ma OPI, ma'dona 'da ŋgaeyi äduako ro miri,
ago tu tusuro miro okyena 'da,
21 Vo lidri cini miro ro oyenayi takado 'da,
ago orinayi 'da wari ono ya äduako.
Ànya ni ŋgaluru se mikyi'di be owo, losi drì andivo maro ro 'desi maro ka'daza.
22 Ca katidri miro se pari giṛiŋwa ono a'dona 'da käläsikala 'desi ro,
ago katidri se giṛiŋwa ono a'dona 'da tu'de mbaraekye ro;
tana ma ni OPI owo
ondro tu ŋgyena kesate oko,
ma'bana ta ono a'dona 'da ndriŋwa!”