Gyitändri
1 OPI atate Noa ri ekye: “Mici teri toŋbo ya, mi ndi 'dicini zo miro ya be, tana mandre mi te taŋgye'ba ro mi maro ya kovole'bai ono lako. 2 Koronyai se cini wäṛiro miru njidrieri miazi be agonai ndi tokonai be, oko koronyai se cini ko wäṛiro miru alo alo ndi miazi na be agona ndi tokona be. 3 Ago miru arii kpa njidrieri miazi be anjioko agonai ndi tokonai be, kwari ànyaro etazana lidriidriro 'bädri ya. 4 U'du njidrieri vosi moye 'bu ezone u'dine 'bädri ya kituna 'butesu, ago ŋgäkyina kpa 'butesu. Ago ŋgase cini lidriidriro se ma'babe ono mutufuna 'da ni 'bädri yasi.” 5 Ago Noa ye tase cini OPI kota nda be oyene ono te.
6 Gyitändri ka esa 'bädri dri oko ndroa Noa rote kama njidrialo (600). 7 Noa ndi toko ndaro be, ŋgwàagoro ndaro ndi 'ditoko ànyaro yibe, ciyite toŋbo ya ruopane ni gyitändri ri. 8 Koronyai se cini wäṛiro ago se ko wäṛiro, arii ndi ŋgase cini tegategaŋwà ro gyini drisi iyi yibe: 9 ciyite Noa re toŋbo ya ba ritu ritu, agonai ndi tokonai be, oso se Lu kota Noa be 'do ronye. 10 U'du njidrieri vosi oko gyitändri esate 'bädri ya.
11 Ndroa kama njidrialo (600) ori Noa ro rosi, imba ṛiri si, u'du imba ro 'butealo fonjidrieri si oko, eŋgavo cini gyi 'desi ro gyini zele reṛote, ago vouŋbo vo'buyakuru ro pirute. 12 Ago 'bu 'dite 'bädri ya kituna 'butesu ago ŋgäkyina kpa 'butesu. 13 Tuna gialo ono si, Noa ndi toko ndaro be, ndi ŋgwàagoro nätu ndaro Seme, Ama, Yapete, ndi 'ditoko nätu ŋgwàagoro ndaro robe ciyite toŋbo ya: 14 ànya ndi koronyai cini vocowa ro beti ba toto ndi koronyai'ba ro ba beti ànyaro voro, ndi ŋgase cini tegategaŋwa ro gyini drisi ba beti ànyaro voro ndi arii cini beti ba toto be. 15 Ànya ciyite Noa be toŋbo ya, ba ritu ritu voŋgaro se cini lidriidriro iyi agonai ndi tokonai be. 16 Ago ŋgase cini lidriidriro kociyibe agonai ndi tokonai be ciyite oso se Lu kota Noa be ronye.
17 Gyitändri rite 'bädri ya u'duna 'butesu, ago gyi ugu oga gwo ndra, ago ŋgyi toŋbo te kuru, ago eŋgate lekuru ni gyini drisi. 18 Gyi perevote ndra, ago gate ndra 'bädri dri; ndi toŋbo ŋgate pele kuru gyi dri. 19 Gyi perevote pari ndra 'bädri dri; ago 'bereŋwà se cini 'desiro 'bädri ya te drîna te 'biṛi. 20 Gyi ugu ogate ndra madale tako dri 'bereŋwà cini rote 'biṛi ocina orivoya kpikpina 'buteritu fonji. 21 Ago ŋgase cini lidriidriro kabe abaaba 'bädri yasi, arii, tii, koronyai vocowa ro, ŋgaŋwà se lowa ro amba du 'bädri ya ono ndi lidri cini be drayite. 22 Voŋgaro se cini koribe 'bädri ya se kabe lawalawa kwoi todrate. 23 Lu tufu ŋgase cini lidriidriro 'bädri ya gyini dri ono te, lidri, koronyai, arii, ndi ŋga tegategaŋwà robe utufute waṛi ni 'bädri yasi. E'be toto Noa ndi ŋgase nda be sina toŋbo ya kai yibe. 24 Gyi perevote 'du ndra 'bädri dri u'duna kama alo 'butenji (150).