Kyila Yisaraele ro Moaba be
1 Ndroa 'butealo fonjidriena ori Yesapata ro 'bädri'ba Yuda ro rosi oko, Yorama ŋgwa Aba ro a'dote 'bädri'ba ro Yisaraele dri Samaria ya, ago nda mirivote ndroa 'butealo foritu. 2 Nda yete ŋgakozi ayani OPI mile, oko nda a'do kote pari koziro oso täpi ndaro ndi endre ndaro ka'dobe ronye, tana nda ana tiṛi cari Bala ro se täpi ndaro kedebe ana te. 3 Caoko nda so gi'du takozi Yeroboama ŋgwa Nebata ro ro voro, se koloci Yisaraele be takozi oyene 'do; nda e'be kote.
4 Mesa 'bädri'ba Moaba ro orivoya timele eca'ba yi; ago nda ka timelegogoi ozo kutu kama alo (100,000), ndi fundä timele kutu kama alo (100,000) robe ndroa cini si 'bädri'ba Yisaraele ro ri. 5 Oko ondro Aba kodrate oko, Mesa 'bädri'ba Moaba ro ogbote 'bädri'ba Yisaraele robe. 6 Tu ana si 'Bädri'ba Yorama efote ni Samaria yasi ago otokala kyila'bai ndaro Yisaraele rote cini. 7 Ago nda zo lazo kpate Yesapata 'bädri'ba Yuda ro ri, ekye: “'Bädri'ba Moaba ro ogbote mabe; inye'do mile ndi ukyine mabe kyila oyene Moaba be ya?” Ago Yesapata zatadrite ekye: “Ma orivoya nja, ondro nya'dote nja owo ago lidri maro kpa orivoya inye farasii maro orivoya farasii miro.” 8 'Dooko nda atate ekye: “Moyina liti eŋwani yasi ya?” Yorama zatadrite ekye: “Liti vocowa Edoma ro ro yasi.”
9 Ndi Yorama 'bädri'ba Yisaraele ro oyiyite 'bädri'ba Yuda ro ndi 'bädri'ba Edoma ro yibe. Ago ondro ànya kabayite u'duna njidrieri oko, gyi a'dote i'do kyila'bai ri ndi koronyai 'ba ro se ànya koyiyibe sina kai ri. 10 'Dooko 'Bädri'ba Yorama atate ekye: “Kuwuyi! OPI ezi ama 'bädri'bai nätu kwoi te ozone drì Moaba'bai roya.” 11 Ago Yesapata ejitate ekye: “Inye'do nebi OPI ro aza i'do noŋwa, meji OPI robe nda sisi ya?” Alo aza dri'bai kyila'bai Yisaraele ro ro zatadrite ekye: “Elisa ŋgwa Safata ro orivoya noŋwa, mano se ni ruindu'ba Eliya ro 'do.” 12 Ago Yesapata atate ekye: “Ata OPI ro orivoya nda be.” Ndi 'bädri'bai se nätu kai oyiyite Elisa re.
13 Ago Elisa atate 'bädri'ba Yisaraele ro ri ekye: “Nyikyi mare etaya? Nyoyi nebii täpi miro ndi endre miro robe re.” Oko 'bädri'ba Yisaraele ro atate ndäri ekye: “Hwa, OPI ezi ama 'bädri'bai nätu kwoi ni ozone drì Moaba'bai roya.” 14 Elisa atate ekye: “Mäṛuru ävuru OPI mbaraekye se mabe ruindu ndäri ono rosi aba ka'do ko ta Yesapata 'bädri'ba Yuda ro ro ta, aba mänina ko ŋga aza oyene miri ca mi ondrene. 15 Ka'do inye, nyezi loŋgo hwihwi'ba aza märi.” Ndi anya eziyi loŋgo hwihwi'ba aza te. Ago ondro loŋgo hwihwi'bai kate ugu kudi o'bi oko, mbara OPI ro ikyite Elisa dri. 16 Ago nda atate ekye: “Ono ni tase OPI kabe atana owo ekye: ‘Mi'di Gyigburu 'bo'boŋwà cini ono yasi.’ 17 Ono ni tase OPI kabe atana owo ekye: ‘Ämiri oli ndi 'bu be ondrene i'do, oko 'bo'boŋwà ono ogana 'da twi gyi be mìmvu robe ami ndi tii amiro ndi koronyai amiro yibe.’ 18 Ono orivoya ta menyeŋwa yi OPI ri oyene; nda ozona Moaba'bai kpa'da drì amiro ya, 19 ago nyèperena 'bakicii cini obeobero tiṛisi ago 'bakicii cini liŋgyiekye ànyaro 'da riya vuru, nyòtogana ice cini kadokado ànyaro 'da, nyìtisina gyi legolegoŋwa cini ànyaro 'da ago nyènjina gyini kado ànyaro 'da kuniŋwà si.” 20 Kyenonosi oso saa tori oloro rosi ronye oko, gyi idite ni Edoma yasi, madale tako gyini dri te lwi.
21 Ondro Moaba'bai cini keriyi tate ekye 'bädri'bai nätu ikyite kyila oyene ànya yibe oko, vo lidri ro se cini agoànjiro ndi se minasite be, ago se unina ndi lakazà kyila oyero uŋgyine iyi, äzite ago arate kishwe drisi. 22 Ondro ànya koŋgate kyenoŋboci, ago kitu kitute voeyibe gyi dri oko, Moaba'bai ndreyi gyi se äwumibe ànya be ana te okaro oso kari ronye. 23 Ànya atayite ekye: “Ono orivoya kari yi! Endaro a'dona 'bädri'bai nätu kai yeyi kyila te iyivoya ago tufuyi iyite. Ka'do inye Moaba'bai nyòyi ŋga ànyaro urune!” 24 Ago ondro ànya kikyiyite gawa Yisaraele'bai roya oko Yisaraele'bai ŋgayite ago gotayi ànya te madale ànya mute. Yisaraele'bai soyite Moaba'bai vo, ugu ànya tufube. 25 Ànya pereyi 'bakicii te, madale 'dicini Yisaraele ro enjiyi gyini kado ànyaro te kuniŋwà lovo si kigyesi; ànya tisiyi koroŋwà cini gyi rote, ago togayi ice kadokado cini te vuru, madale e'bete toto 'bakici 'desi Kiraheresa aya, ago kuni ovo'bai iba si muyidrina te, gotayite ago ruyite. 26 Ondro 'bädri'ba Moaba ro kondrete kyila kate ikyi nda dri oko, nda ru bando'bai kama njidrieri (700) te woro ogane äbi kyila'baazii lakosi ofoza 'bädri'ba Edoma ro re; caoko ànya niyi kote. 27 'Dooko nda ru ŋgwaagoro kayoŋwa ndaro se kaoyebe orine vo ndaro ya 'do te, ago lo te ŋgapäṛi ozaro ro tiṛi 'bakici ro dri lu ànyaro ri. Ndi turi amba so Yisaraele'bai te ago ànya eŋgyeyi iyi teni vo gi ono yasi ago goyite 'bädri modo ànyaro roya.