Dawidi Pe Amaleka'bai te ṛe
1 Dawidi ndi lidri ndaro be esayite Zikelaga ya u'du nina si, ago usuyi Amaleka'bai idiyite kyila be Negebe ndi Zikelaga be dri. Ànya ruyi Zikelaga te, ago soyi asi te driigye, 2 ago ruyi 'ditoko cini se kigye te kamba'ba ro ndi ŋgase cini kigye iyi yibe, se giṛiŋwà ro ndi riti se 'desi robe; ànya fuyi 'diaza kote, oko oroyi ànya te, ago oyiyite ànya yibe. 3 Ago ondro Dawidi ndi lidri ndaro be kesayite 'ba'desi ya oko, ànya usuyi 'ba'desi azate asi si, ago 'ditoko, ŋgwàagoro ndi ndiriŋwa ànyaro be ärute kamba'ba ro. 4 Ago Dawidi ndi lidri se nda be ana be etoyi liyite amba, madale mbara ànyaro liyizana kyete. 5 'Ditoko ritu Dawidi ro Ainoama ni Jezerela yasi ndi Abigaila ävuzi Nabala ro ni Karemela yasi be orivoya 'dise ärube kamba'bai ro kai lako.
6 Dawidi a'dote rriti 'desi ya tana lidri ndaro atate ekye nda ovone kuni si, tana lidri cini te kyilaro ta ŋgwàagoro ndi ndiriŋwa ànyaro robe ta. Oko OPI Lu Dawidi ro ozo agoago te ndäri.
7 Ago Dawidi atate kohani Abiatara, ŋgwa Aimeleke ro ri ekye: “Nyezi boŋgo gajuṛuŋwa kätätidri ro mare noŋwa”. Ndi Abiatara ezi boŋgo gajuṛuŋwa kätätidri ro te Dawidi ri. 8 Ago Dawidi eji OPI te ekye: “Inye'do maso ŋgatopa'bai kwoi vo ya? Inye'do matana vo ànyaro ndi ya?”
Opi zatadri Dawidi ro te ekye: “Miso ri ànya vo, mitana vo ànyaro ndi, ago mipana 'di cini se ärube iyi ndi.”
9 Ago Dawidi ndi lidri kama njidrialo (600) ndaro be oyiyite ago ondro ànya kesayite goloŋwa Besora ya oko, rukä ànyaro rite lau. 10 Oko Dawidi ndi lidri kama su (400) be uguyi osote, ago lidri kama ritu (200) rite kovole tana ànya te mbaraako drî goloŋwa Besora ro ozane.
11 Ago lidri se Dawidi be ana usuyi Ezipeto'ba aza te 'bädri rriro ya, ago eziyi nda te Dawidi re. Ago ànya ozoyi ŋgaonya te ndäri onyane, ndi gyi be ndäri umvune. 12 Ago ànya ozoyi tonyo kyi'du ewiewi ro rote ndäri ndi drîcoṛo kono ewiewiro ritu be. Ondro nda konyate oko, mbara ndaro go egote; tana nda rite ŋgaonya ako ago gyi umvuako kituna nätu ago ŋgäkyina nätu.
13 Ndi Dawidi eji nda te ekye: “'Desi miro a'di ya? Ago nyikyi ni eŋwaro ya?”
Nda zatadrite ekye: “Ma orivoya agoanji Ezipeto'ba ro, iyeäṛi Amaleka'ba aza ro; ago 'desi maro e'be mate kovole u'du na te nätu tana ma'dete adravo ro. 14 Midite kyila be Negebe Kerete'bai ro dri ndi wari se a'dobe Yuda ro dri ago Negebe Kaleba ro dri; ago màza Zikelaga kpa te asi si.”
15 Ndi Dawidi atate nda ri ekye: “Minina gindi ma ugune ŋgatopa'bai kai re ya?”
Ago nda atate ekye: “Nyäṛuru märi ävuru Lu si, ko miri ma ufune, ago ko ma ozone drì 'desi maro roya, ago muguna mi ndi ànya re.”
16 Ago ondro nda kugu Dawidi te lau oko, nda ndre ŋgatopa'bai pererute vo cini yasi, ugu ŋgaonya be, ŋgaumvu be ago läri otobe, tana ta ŋgase cini amba ànya kuruyibe ni 'bädri Felesete'bai ro ndi Yuda robe yasi kai rota. 17 Ndi Dawidi gota ànya te ṛo vopäripäri ago ye kyila te ànya be madale tandrole u'du kinjo rosi. 'Dise pavobe toto màno ombato'di se kama su (400) kumu yibe gamelei si iyi ayani. 18 Dawidi pa ŋgase cini Amaleka'bai kurube kai te, ndi 'ditoko ritu ndaro be. 19 Ŋga alo aza jekote, ca giṛiŋwa kode 'desi, ŋgwàagoro kode ndiriŋwa ro, ŋgase cini otopabe ago ärube Dawidi logote cini kovole. 20 Dawidi logo ŋga cini te, ànya ruyi gboko ndi äṛi voŋgaro cini be rote; ago lidri oro voŋgaro te mile ndaro ya, ago atayite ekye: “Ono orivoya ŋga Dawidi ro se otopabe owo.”
21 'Dooko Dawidi esate lidri kama ritu (200) se a'do te rritiro osovoya nda vo se nda e'bete kovole Goloŋwa Besora roya kai re. Ago ànya ikyiyite dri ndaro utune ndi lidri se nda be kai yibe; ago ondro Dawidi kesate loto lidri kai re oko nda ye mede te ànyari. 22 Oko mànoago se koyiyibe Dawidi be ana rukäna orivoya tori koziro be ago atayite ekye: “Mànoago kwoi oyiyi kote ama yibe, ago ämäri ŋgase màgo motopabe ono alona aza ozone ànyari te i'do, e'be gialo vo ànyaro alo alo ri toto toko modo ndaro ndi ŋgwai ndaro be urune ago oyine.”
23 Oko Dawidi atate ekye: “Ädrupii maro, ko ämiri ta oyene oso inye ŋgase OPI kozobe ämäri ono si. Nda pa ama te ago ozo ŋgatopa'bai se kikyibe kyila oye ama be ono te drì amaro ya. 24 A'di olena ta amiro drîna niya? Ànya se koribe lakazà lomvo kwoi ozona ŋga kpa ànyari ojoojoro ànya se koyiyibe kyila ya be, ojona ndi ba rere.” 25 Ṛoni tu gi ana si ago oyi gwo mileya ro, tase ono Dawidi 'bate a'done ota ro Yisaraele ya le tu ono si ono.
26 Ondro Dawidi kegote Zikelaga ya oko, nda zo ŋgase otopabe ni Amaleka'bai rigyesi ana telesina te beraazii ndaro se dri'bai Yuda ro ri lazo be ekye: “Ŋgapäṛi begi ämiri ono, se otopabe ni kyila'baazii OPI ro rigyesi ono.” 27 Nda zote lidri se Betele ya ri ago lidri se Ramota Negebe ya ri ago lidri se 'ba'desii Jatira roya ri. 28 Aroeri, Sifimota, Esetemoa, 29 ndi Rakala be ya, 'bakicii Jeramele'bai roya, 'bakicii Kena'bai roya, 30 ago lidri se 'ba'desii Oruma roya, Borasana ya, Ataka ya, 31 ndi Eberona ya be. Ago Dawidi zote vose cini nda ndi lidri cini ndaro be kababe kigye si kai yasi.