Nemaya 9 - The Holy Bible in Moru (BAIBOLO ALOKADO) (MB)

Lidri ka Takozi Ànyaro Eṛona

1 U'du 'buteritu fosu imba ono rosi oko lidri Yisaraele ro mbiyikalate akpane ago soyi gunia te, ago dayi durufu te drî ànyaro yasi; 2 ago ànya leweyi andivo ànyaro teni atrai cini resi, ago edreyite etoyi takozi ànyaro ndi takozi zutui ànyaro robe eṛona te. 3 Ànya edreyite vo ànyaro yasi ago äzi ta teni buku Ota Opi Lu ànyaro ro yasi u'du lisu si. Ago u'du lisu kinjo si ànya eṛoyi takozi te ago mätuyi Opi Lu ànyaro te.

4 Ndi Jesua, Bani, Kademiela, Sebania, Buni, Serebia, Bani, ndi Kenani be edreyite kurusi vo toŋgoro Lewe'bai ro dri; ago mätuyi OPI Lu ànyaro te ṛeṛe.

5 'Dooko Lewe'bai, Kademiela, Bani, Asebenya, Serebia, Odia, Sebania ndi Petaya be atayite ekye:

“Mìŋga kuru ago nyä̀räṛu OPI Lu amiro,

nyä̀räṛu nda rriro ago äduako.

Räṛu Ka'do ävuru liŋgyiekye ndaro ri,

se eŋgate ndra ni räṛu cini azi drisi.”

Mätu Takozi Eṛoro

6 'Dooko Ezera ye mätu ono te ekye:

“Mi OPI mi gialo ni OPI yi;

mi'ba vo'buyakuru ni ndi vokuru se ndra ana be ndi 'bi'bii cini be.

Mi'ba gyini ni ndi ŋgase cini kigye be mi'ba gyi 'desii ni ndi ŋgase cini ànya yasi iyibe.

Nyozo adri ni vona cini ri,

mbara vo'buyakuru ro ka mi mätu.

7 Mi OPI, Lu se minji Abarama te

ago nyelepe nda te ni Uru Babelona ya yasi;

ago nyozo ävuru Abarayama 'do te ndäri.

8 Nyusu ya ndaro te ŋgye mimile,

ago mi'ba tao'baro te nda be,

wari Kanana'bai ro

wari Ete'bai ndi Amora'bai ro,

wari Pereza'bai ro, wari Jebusa'bai ndi Girigasa'bai robe ozone zelevoi ndaro ri.

Nyäti tao'ba miro te tana mi orivoya taŋgye'ba yi.

9 “Ago mindre rueza zutui amaro rote Ezipeto ya;

ago nyeri drîayo ànyaro te Gyi'desi Okaro kala.

10 Miye taka'daro ndi talaroro 'di laroekye ro be te 'bädri'ba Ezipeto ro ri,

ndi dri'bai cini losi ro ndaro ndi lidri cini wari ndaro robe ri,

tana minite ànya ezayi zutui amaro te.

Nya'dote likulikuro gile tu ono si ono.

11 Minyi ya gyi 'desi rote mile ànyaro yasi.

Tana ànya kozayi robe gyi'desi yasi le gyini awiro drisi.

Mivo ànya se kosoyibe ànya vo kai te täṛi ociekye ya,

oso kuni kabe o'de gyi mbaraekye zele ronye.

12 Kitu si nyelepe ànya te 'dikolo cariro si,

ago ŋgäkyi si nyeyi liti te ànyari abaza 'dikolo asi ro si.

13 Nyikyite vuru 'Bereŋwa Sinai dri,

ago nyatate lidri miro ri ni vo'buyakuru yasi,

ago nyozo ota kado te ànyari ndi ŋgaemba ŋgye be.

14 Nyiti ta Sabata alokado miro rote ànyari,

ago nyozo ota te ànyari ruindu'ba miro Musa si.

15 “Nyozo ambata te ànyari ni vo'buyakuru yasi, ondro ànya te täbiri ro owo,

ago nyozo gyi te ànyari ni lutu yasi, ondro ànya te gyilu ro owo.

Nyatate ànyari oyine 'bädri se mi'batate ozone ànyari ana urune.

16 Oko zutui amaro a'doyite driuŋgyi be ago taeriako

ago gayitezo ota miro orone.

17 Ànya gayitezo taorone;

ànya ijeyi talaroro se miyebe ànya lako tana te.

Taeriako ànyaro si ànya njiyi dri'ba te

ànya logone kovole iyeäṛi ro Ezipeto ya.

Oko mi orivoya Lu se kabe 'di e'be ta takozi rota owo;

mi orivoya yai'dweekye ago yauni amba be nya oŋga kyilaro liyaro.

Mi ŋgalu amba be; ago nye'be ànya kote.

18 Ànya kedeyi ŋga awi beti 'daŋgo ro ronye gica,

ago katayi gica ekye: ‘Ono ni Lu amiro se kolofo ami be ni Ezipeto yasi owo!’

Kolo'dayi mi gica!

19 Oko mi yauni para ndra miro si nye'be ànya kote vocowa ya,

Mina 'dikolo cariro se kabe ànya lepe liti ya ana kote ni ànya resi kitu si,

ca asi se kabe liti eyi abaza ànyari ŋgäkyi si ana.

20 Nyozo tori kado miro te ànya embane;

nyalaga mana kote onyane ànyari ago nyozo gyi te ànyari umvune.

21 Ndroa na 'butesu nyäti ànya te vocowa yasi

ànya a'do kote lemeri ŋgaaza robe,

boŋgo ànyaro lewa kote

ago pa ànyaro ga kote.

22 “Nyozo 'bädri se abe mirina 'bädri'bai si ndi tu'dei be te ànyari,

nyozo cuku cini te ànyari.

Ànya ruyi wari Esebona ro, se 'bädri'ba na ni Siona ana te,

ndi wari Basana ro se Ogo ni 'bädri'ba na yi ana be.

23 Nyiliti ŋgwai ànyaro te oso 'bi'bi vo'buyakuru ya ronye,

nyugu ànya te wari se nyata tana be zutui ànyaro ri ukyine ago urune ana ya.

24 Ndi ŋgwai ànyaro oyiyite ago ruyi wari se ana te

mipe dise koriyibe wari ana ya te ṛe.

Nyozo Kanana'bai te 'bädri'bai ànyaro ndi lidri se koriyibe wari ana ya be te drì zutui amaro

roya oyene oso se ànya koleyibe oyene ronye.

25 Ànya ruyi 'bakicii mbaraekye ro te,

ndi gyini kado na be,

ndi ànya ruyi zoi te twi lakazà kado be, koroi se ä'dite nja,

ndi ämvu kono ro ndi ice ice ido ro ro, ice doŋgo ro be te.

Ànya nyayite, ojo ànya te, ago ànya a'doyite oshweekye ro;

ago ànya njäkyiyite ŋga cini se nyozobe ànyari si.

26 “Caoko lidri miro a'doyite taoroako ago ogboyite mibe;

ànya siyi kundu te ota miro ri.

Ànya tufuyi nebii miro se kemba ànya be egone mire kai te.

Ànya lo'dayi mite amba.

27 Ta'dota nyozo ànyate drì kyila'baazii ànyaro roya se 'ba ànya te rueza ne.

Tu rueza ànyaro rosi ànya ayoyidrite miri,

ago nyeri driayo ànyaro teni vo'buyakuru yasi.

Yauni amba miro si nyezo dri'bai te ànyari

se payi ànya teni drì kyila'baazii ànyaro ro yasi.

28 Ondro taliatokpe ka'do te oko, ànya go yeyi takozi kpate mimile.

Ago migo nye'be ànya te drì kyila'baazii ànyaro roya tana ànya kimiri ànya robe.

Ago ondro ànya ketayidrite ago kejiyi mite ànya opane oko,

nyeri ànya teni vo'buyakuru yasi,

ago mipa ànya te kpekpe yauni para miro si.

29 Nyemba mi ànyaro te ànyari ogone ŋgaemba miro orone,

caoko ànya a'doyite driuŋgyi be ago royi ota miro kote takozi oye si,

aba se Ota miro ätina o'bana lidri ni orine 'du.

Ànya yeyi tate lädruro, ago taeriakosi ago ànya gayitezo orone.

30 Ndroa amba mirite ànya yibe yaiŋgyi si.

Tori miro si nyemba mi ànyaro te nebii miro si.

Caoko lidri miro eriyi ta kote,

ta'doro nyozo ànyate drì tu'dei warii ro rigye.

31 Caoko yauni amba miro si

nyutufu ànya kote ago nye'be ànya kote.

Tana mi orivoya Lu yai'dweekye ago yauni amba'ba yi!

32 “Ka'do inye Lu amaro, mi orivoya Lu para!

mbaraekye ago turine yi!

Nya tao'ba miro ndi ŋgalu äduako miro be ätina.

Mi'ba riti se kikyi be ämädri ono kalandre ko,

ŋga giṛiŋwa ro mimile!

Riti ono ikyite ämädri 'bädri'bai amaro, dri'bai amaro, kohanii ndi nebii amaro be,

zutui amaro ndi lidri cini miro be dri,

eto roni tu 'bädri'bai Asaria rosi madale tu ono si ono!

33 Miye te takado yi tase cini ka'do be ämäri ono si;

tana nya'dote 'diri, oko maye tate koziro.

34 Zutui amaro, 'Bädri'bai amaro, dri'bai amaro, kohanii amaro ndi zutui amaro be

ätiyi ota miro kote.

Ànya eriyi ta miro ota miro ndi ta miemba ro se nyozobe ànyari ana kote.

35 Zutui amaro koriyi gica 'bädri ànyaro ya

ago känjäkyiyi ŋga kado se nyozo be ànyari gica ago koriyi gica wari bäräŋgälä, gyini kado be se nyozobe ànyari ana ya;

ànya etayi drî kote ni takozi ànyaro yasi.

36 Ago yauono ama orivoya iyeäṛii wari se nyozobe zutui amaro ri doŋgo na ndi ŋga kado na yibe njäkyine ono ya,

oko mindre ama orivoya iyeäṛi yi.

37 Ŋgase gyini kabe lofona iyi oyiro 'bädri'bai se

mi'babe ämädri ono ri tana ta takozi amaro rota.

Ànya kayi taoye ämäri ndi koronyai 'ba ro amaro be ri oso ànya kolebe oyene ronye,

ago ama te rriti 'desi ya!”

Lidri Njo Ävuru te ta Tadriolero Zele

38 Tana ta tase cini ka'do be ono rota, ama lidri Yisaraele ro, ma'ba tao'baro lämu'duro egyiegyiro te, ago dri'bai amaro, Lewe'bai ndi kohanii amaro be njoyi ävuru ànyaro te zeleigye.