Ofo 14 - The Holy Bible in Moru (BAIBOLO ALOKADO) (MB)

Drî Gyi'desi Okaro ro Ozana

1 'Dooko OPI atate Musa ri ekye: 2 “Nyata lidri Yisaraele ro ri driotane kovole ago gawa otone mile Pihairota roya, lakole Migedola ro ndi Gyi'desi Okaro robe ya, loto Balazefona lomvo. 3 Tana 'bädri'ba usuna ta lidri Yisaraele ro ro 'da ànya urune kovole 'bädri iro ya, tana ànya orivoya abavoya wayiro vocowa yasi. 4 Ma'bana 'bädri'ba 'da a'done taeriako, ago nda esona 'da ami vo ago ŋgaopeṛe maro 'bädri'ba dri ndi kyila'bai ndaro be ezina taoro 'da märi 'dooko Ezipeto'bai uninayi 'da anjioko ma ni OPI owo.” Ndi Yisaraele'bai yeyite oso atabe ànyari ronye.

Ezipeto'bai sote Yisaraele'bai vo

5 Ago ondro ititate 'bädri'ba Ezipeto ro ri ekye lidri mute oko, nda ndi dri'bai losi ro ndaro be go läpiyi drî ànyaro te ago atayite ekye: “Tase màyebe ono e'diyi, mà'de gwo Yisaraele'bai o'bane oyine ni a'dovoya iyeäṛi ro ämäri niya?” 6 'Bädri'ba ede arabia ndaro kyila rote nja ago ru kyila'bai ndaro te nda be. 7 Ago nda ru arabia ndaro topetopero te kama njidrialo ndi arabia cini azaka Ezipeto robe dri'bai be ànya cini drisi. 8 Ago OPI 'ba 'bädri'ba te a'done taeriako nda sote lidri Yisaraele ro vo ondro ànya kayite ugu oyi owo. 9 Kyila'bai Ezipeto'bai ro soyite ànya vo, farasii, arabia ndi opi'ba na yibe soyite ànya vo ndi tayivo ànyaro te vose ànya kotoyi gawa ànyaro be kigye Gyi'desi Okaro lomvo loto Pihairota ndi Balazefona be lomvo ana ya.

10 Ondro lidri Yisaraele ro kondreyi 'bädri'ba te ndi kyila'bai ndaro be ikyivoya ànya dri oko, ànya a'doyite turituri ro amba. Ago ayoyidrite OPI ri ta ŋgaopa rota; 11 ànya atayite Musa ri ekye: “Inye'do 'bu avo osero i'do Ezipeto ya 'bani mi'de gwo ama lofone odrane vocowa ya ya? Miye ono e'diyi ämäri ama lofone tesi ni Ezipeto yasi niya? Mindre, ta gi miyebe ama loforo ni Ezipeto yasi ono! 12 Inye'do ono ṛo koni tase matabe miri Ezipeto ya makye nye'be ama iṛe ma'do robe iyeäṛi ro Ezipeto'bai ri owo ya? Tana aba ni kadopara a'done ämäri iyeäṛi ro Ezipeto ri ni ondrane vocowa ya risi.”

13 Ago Musa zatadrite ekye: “Nyùturi ko, nyèdre ŋgyiri ago mìndrena ŋgaopa Lu ro se nda kaoyebe oyene ami opaza ondro ono 'da: Ezipeto'bai se nyàbe ondrena kwoi mìgo mìndrena ko tona. 14 OPI oyena kyila 'da ami ta; ago ämiri toto a'done titi ro.”

15 OPI atate Musa ri ekye: “Nyà ugu liyi märi ta ŋgaopa rota etaya? Nyata lidri Yisaraele ro ri oyine mileya. 16 Nyeŋga dofo miro aba ro kuru, ago nyozo drí miro Gyi'desi driro ago gyi onyiruna 'da ago lidri Yisaraele ro lävunayi 'da gyini awi ro drisi gyi'desi yasi. 17 Ago ma'bana Ezipeto'bai 'da a'done taeriako tana ànya kosoyi robe ànya vo, ago ma'dona 'da orooro ro ŋgaopeṛe 'desi maro be 'bädri'ba dri ndi kyila'bai ndaro be ndi arabia ndaro, ndi opi'bai be dri. 18 Ondro mape ànya te ṛe oko Ezipeto'bai uninayi ndi anjioko ma ni OPI owo.”

19 'Dooko malaika Lu ro, se ko'debe mileya lowa Yisaraele ro ri ana shwete ànya kundusi, ago 'dikolo se cariro ana shwe kpate ni mile ànyaro yasi ago go edrete ànya kundusi, 20 madale ikyite lakole lowa Ezipeto ro ro ndi lowa Yisaraele robe ya. Ago 'dikolo 'ba ŋgatini te Ezipeto'bai ri ago 'ba ŋgaeyi te Yisaraele'bai ri ago ta'dota kyila'bai niyi kote ikyine loto azi re ŋgäkyi raa.

21 'Dooko Musa eŋga drí iro te gyi'desi dri, ago OPI 'ba gyi'desi te a'done gyini awi ro, ago gyi lonyirute. 22 Lidri Yisaraele ro oyiyite gyi'desi yasi gyini awi drisi: gyi a'dote tiṛi ronye lamadri riti yasi. 23 Ago Ezipeto'bai soyite ànya vo, ago soyite ànya vo ago ciyite ànya vo gyi'desi ya, farasii, arabia ndi opi'bai cini ànyaro be. 24 Ago teinye 'buzevo ri osiako oko, OPI ndrevote le kyila'bai Ezipeto ro dri ni asi cariro ndi 'dikolo cariro be yasi, ago kyila'bai Ezipeto ro a'doyite turituri ro. 25 Nda 'ba pa ŋguluro arabia ànyaro rote lelene, ago ànya piyi ànya te riti si; ta ono ta Ezipeto'bai atayite ekye: “Mì'de mämu ni mile Yisaraele'bai ro yasi; tana OPI ka kyila oyeni ànya ta ama Ezipeto'bai be.”

26 Ago OPI atate Musa ri ekye: “Nyozo drí miro gyi'desi driro, tana gyi'desi kitisi robe kovole vona ya Ezipeto'bai dri, arabia ànyaro ndi opi'bana yibe dri.” 27 Ndi Musa eŋga drí ndaro te gyi'desi dri, ago ondro vo kiwite oko, gyi'desi tisite vo iro ya äkpuṛu ago Ezipeto'bai ojoyite ruopane ni gyi'desi ri, caoko OPI vo ànya te gyi'desi ya. 28 Gyi tisite kovole vona ya ago tako arabia ndi opi'bana yibe ndi kyila'bai cini 'bädri'ba ro se kosobe ànya vo gyi'desi ya ana te; aza alodi ànyaro e'be kote. 29 Oko lidri Yisaraele ro abayite gyini awiro drisi gyi'desi yasi, gyi'desi a'dote tiṛi ronye ànyari lamadri riti yasi.

30 Tu gi ana si OPI pa lidri Yisaraele rote ni drí Ezipeto'bai ro yasi; ago Yisaraele'bai ndreyi avo ànyaro te kototi gyi'desi ro kalasi. 31 Ondro Yisaraele'bai kondreyi mbara se 'desi OPI kope Ezipeto'bai be sina ana te oko, ànya turiyi OPI te, ago ànya mayite nda ya, ago ruindu'ba ndaro Musa ya.