2 Ambâ 21 - The Holy Bible in Moru (BAIBOLO ALOKADO) (MB)

1 Yosapata drate ago asete vo 'bädri'bai osero ya 'Bakici Dawidi roya; ago Yorama ŋgwa ndaro gorite 'bädri'ba ro vo ndaro ya.

Yorama 'Bädri'ba Yuda ro

(2 'Bädri'bai 8:17-24)

2 Yorama ŋgwa Yosapata 'Bädri'ba Yuda ro ro orivoya ädrupii be njidrialo: Azaria, jiela, Zekaria, Azariahu, Maikolo, ndi Sefatia be; vona se cini kwoi ni ŋgwàagoro Yosapata ro owo. 3 Täpi ànyaro ozo ŋgapäṛi amba te ànyari, logo läguläguro, mo'di ndi ŋga kadokado azaka be, ago 'ba ànya te dri'bai ro 'bakicii obeobero tiṛi si Yuda ya yasi. Oko Yosapata 'ba Yorama te 'bädri'ba ro vo ndaro ya, tana nda ni ŋgwa kayo yi. 4 Ondro Yorama käti 'bädri te ŋgyiri oko, nda tufu ädrupii cini ndaro te tro dri'bai losi ro Yisaraele ro azaka be.

5 Yorama ka a'do 'bädri'ba ro oko ndroa ndaro te 'butenätu foritu, ago nda mirivote ndroa na njidriana Yerusalema ya. 6 Nda sote taoye undiro 'Bädri'ba Aba ndi 'bädri'bai azaka Yisaraele ro robe voro; tana nda gyete alo aza ndiriŋwa Aba ro ro ayani toko ro. Nda yete tase koziro ayani OPI mile. 7 Caoko OPI leko katidri Dawidi ro tufune, tana nda 'ba tao'baro te Dawidi be ago 'ba tao'baro te zelevoi ndaro ri ŋgamirine 'duro.

8 Tu ŋgamiri Yorama ro rosi Edoma ogbote Yuda be, ago 'bayi 'bädri'ba modo ànyaro rote. 9 'Dooko Yorama ndi otaozo'bai ndaro yibe oyiyite arabia cini ndaro be kyila oyene Edoma be. Oko Edoma'bai muyidri ànyaro te lau, oko ànya roṛiyivote muyite ŋgäkyi si payivote. 10 Ṛoni tu ana si Edoma a'dote dritairo ni miri Yuda ro ri. Tu ti alo ana si Edoma a'dote dritairo ni miri Yuda ro ri. Tu gi alo ana si Libena ogbo kpate, tana Yorama e'be OPI Lu zutui ndaro rote. 11 Nda be vo mätu ro Lu uniako'bai ro kpate 'bädri lutu ro Yuda ro yasi ago 'ba lidri Yuda ndi Yerusalema be rote takozi oyene OPI ri.

12 Nebi Eliya zo waraga te Yorama ri, oso nonye ekye: OPI, Lu zutu miro Dawidi ro ka mi kozi tana miso kote taoye täpi miro 'Bädri'ba Yosapata ro voro, kode taoye ti'bi miro 'Bädri'ba Asa ro voro. 13 Oko migo misote taoye 'bädri'bai Yisaraele ro ro voro, ago mi'ba lidri Yuda ndi Yerusalema robe te a'done ta'diriako Lu ri, kpa oso Aba ndi ànya se kesobe nda vosi be ko'bayi lidri Yisaraele robe ta'diriako ana ronye. Nyutufu ädrupii miro kpate, se ànya ni kadopara ndrani miri. 14 OPI ezana lidri miro, ŋgàga miro, ndi 'ditoko miro be 'da kozipara ta ta ono rota, ago perena ŋga cini miro 'da. 15 Ago mi modo nyezaruna 'da ni adravo luwuekye ya luwuro ri, madale ici miro i'duruna gwo tesi.

16 Felesete'bai ndi Arabii azaka be riyite loto vose lidri Kusa ro koriyibe gyi'desi kala ana lomvo. Lu eŋga ya ànyaro te kyila oyene Yorama be. 17 Ànya ikyiyite Yuda dri ago eciyite kigye, ago topayi lakazà se cini zo'desi miri roya ana te, ago ruyi 'ditoko ndi ŋgwàagoro cini 'bädri'ba robe te kamba'bai ro e'be toto Ahazia ŋgwa täduŋwa ndaro ayani.

18 'Dooko ta cini ono vosi oko, OPI ezi adravo kozipara ya luwuro te 'bädri'ba dri. 19 Ugu a'dote 'du kozipara driyaro ti osane ndroa ritu, adravo 'ba ici ndaro te rui'dune tesi, ago nda drate lomvoluwu usu be amba. Lidri leru asi kote nda orozana, oso ayebe zutui ndaro ta ronye.

20 Yorama ka a'do 'bädri'ba ro oko ndroa ndaro te orivoya 'butenätu foritu ago nda mirivote ndroa na njidriena Yerusalema ya. Nda kodrabe 'diaza a'do kote tusuro. Ànya seyi nda te 'Bakici Dawidi roya, oko ko vo 'bädri'bai osero ya.