Yisika ka Yakoba Äṛu
1 Ago ondro Yisika te agoambago ro ago mi ndaro ndre vo kote kadoro oko, nda zi Esau ŋgwa kayoŋwa ndaro te, ago atate ndäri ekye: “Ŋgwa maro!” Ago nda zatadrite ekye: “Ma begi ono.”
2 Yisika atate Esau ri ekye: “Mindre yauono ma te agoambago ro, ago tu maro odra rote ti. 3 Ka'do inye molo'baru miri, miru kusu miro iza u'boro ndi ätu miro be, ago nyoyi vocowa ya, mi'bo iza märi, 4 ago nyala'di izana ndeṛiekye oso se mulube ronye, nyezi märi onyane mäṛu mi robe, teinye dri odra ako märi.”
5 Rebeka eri ata se cini Yisika katabe Esau ŋgwa ndaro ri ana te. Ta'dota ondro Esau koyite vocowa ya iza uṛine ezine täpi ndaro ri oko, 6 anya atate Yakoba ri ekye: “Meri täpi miro te atavoya Esau ädrupi miro ri ekye: 7 ‘Nyezi iza ni vocowa yasi, ago nyala'di ndeṛiekye manya robe 'dooko mäṛu mi robe OPI kandra teinye märi odra ako.’ 8 Ka'do inye ŋgwa maro, miye tase mabe atana miri ono. 9 Nyoyi gyolo ya ago miru indri 'boroŋwa ritu, ago nyezi mala'di robe täpi miro ri onyane, oso se nda kulube ronye, 10 'dooko nyugu robe ndäri onyane, nda käṛu mi robe teinye dri ndäri odra ako.”
11 Oko Yakoba atate endre ndaro Rebeka ri ekye: “Minite ädrupi maro Esau orivoya mano 'bi be yi, ago ma maro mano 'biako yi. 12 Kode azaya täpi maro tämbina ma gwo, ago usuna vona ndi anjioko ma ni nda odo, 'dooko mezina te latri ayani mädri vo äṛu roya.”
13 Oko endre ndaro zatadrite ekye: “Latri miro ka'do mädri ŋgwa maro, miye tase mabe atana miri ono ayani. Nyoyi nyezi indri gi iyi märi.” 14 Ndi nda oyite ago ezi ànya te endre ndaro ri. Ago endre ndaro la'di izana te kadoro oso täpi ndaro kulube ronye. 15 'Dooko Rebeka ru boŋgo kadopara Esau rote se anya ko'babe zo ya ana, ago sote Yakoba lomvo, 16 embe kyini indri se äfube kai rote drí Yakoba roya ago kpa kyembe ndaro se 'biako ana ya: 17 anya ozo iza se anya kala'dibe ndeṛiekye ana te Yakoba rigye ndi ambata be.
18 'Dooko Yakoba cite sina zo ya täpi ndaro re, ago atate ekye: “Täpi maro!”
Nda zatadrite ekye: “Ma begi ono, oko mi ŋgwa maro a'di owo ya?”
19 Yakoba zatadrite ekye: “Ma ŋgwa kayoŋwa miro Esau owo. Maye tase nyatabe märi ono te; miŋga kuru ago minya iza se mäfube ono, tana nyäṛu ma robe.”
20 Ago Yisika atate ekye: “Mi'debe iza ono usune ndriŋwa eŋwanye ya ŋgwa maro?”
Yakoba zatadrite ekye: “OPI Lu miro ozoni märi.”
21 'Dooko Yisika atate Yakoba ri ekye: “Nyishwe lototi 'de mätämbi mi robe ŋgwa maro, mäni robe kode mi gi ni endaro Esau ŋgwa maro owo ya?” 22 Ndi Yakoba ishwete lototi 'de Yisika täpi ndaro re, ondro Yisika kätämbi nda te oko nda atate ekye: “Ata miro uwina oso Yakoba ronye oko drí miro oso drí Esau ro ronye.” 23 Nda ni Yakoba kote tana drí ndaro orivoya 'bi be oso drí ädrupi ndaro Esau ro ronye. Aba nda lete Yakoba äṛune, 24 oko nda go ejitate kpa to'dina ekye: “Inye'do mi gi endaro ŋgwa maro Esau owo ya?” Nda zatadrite ekye: “Ma owo.”
25 Yisika ekye: “Nyezi iza 'do azana tiŋwa mare noŋwa, tana manya robe 'dooko mäṛu mi robe.” 'Dooko nda ezi iza te lototi ndare ago nda nyate, ago ezi vino kpate ndäri, ago nda mvute. 26 'Dooko täpi ndaro Yisika atate ndäri ekye: “Nyishwe lototi 'de mare ago nyujunju ma ŋgwa maro.” 27 Ndi nda ishwete lototi 'de ago njunju nda te, ago Yisika äŋgu boŋgo ndaro tägyina te ago äṛu nda te ekye:
“Ono tägyi ŋgwa maro ro,
se tägyina a'dote tägyi vocowa ro ronye se OPI äṛute ono.
28 Lu kozo nduruṛi vo'buyakuru ro miri,
ndi ŋgadriamba 'bädri robe,
inya ndi vino amba be.
29 Lidri amba induruna 'da miri,
ago tu'de amba edinayi drî 'da vuru miri.
Nya'do miri'ba 'didiri cini miro ro,
ago zelevoi endre miro ro kediyi drî vuru miri.
Ago latri ka'do ànya se kayibe mi otri dri;
ago äṛu ka'do ànya se kayibe mi äṛu dri.”
Rulo'ba Esau ro Äṛu Yisika rota
30 'Dooko Yisika nde Yakoba äṛute, ago dori ondro Yakoba kofote ni Yisika resi oko, ädrupi ndaro Esau esate ni äṛigo yasi. 31 Nda la'di iza ndeṛiekye kpate, ezite täpi ndaro ri, ago nda atate ekye: “Täpi maro, miŋga ago minya iza ndeṛiekye se mala'dibe ono robe tana nyäṛu ma robe.”
32 Yisika täpi ndaro eji nda te ekye: “Mi a'di owo ya?” Ndi nda ekye: “Ma ŋgwa kayoŋwa miro Esau owo.”
33 Yisika a'dote lä'bilä'biro amba, ndi ejitate ekye: “'Dina anya aza kezi iza be käti märi 'do a'di owo ya? Nda ezi iza te ago manyate teinye dri miri esa ako, ago yauono mäṛu te nda ayani, ago äṛu te ndaro äduako.”
34 Ondro Esau keri ata täpi ndaro rote oko, 'degwo liyi tusuro liyine amba ndra, ago atate täpi ndaro ri ekye: “Nyäṛu ma, nyäṛu ma kpa täpi maro.”
35 Oko Yisika zatadrite ekye: “Ädrupi miro ikyi odo mate, ago yauono nda ru äṛu miro te.”
36 Esau ekye: “Ono te pere ṛiri ndaro ma oco ro owo, ta aza i'do ävuru ndaro gini Yakoba wo. Tana yauono nda ru a'do kayoro maro te ago yauono nda ru äṛu maro kpate. Inye'do nyeta äṛu aza ro kote tana ma ya?”
37 Ago Yisika zatadrite ekye: “Mäṛu nda te a'done 'desiro midri, ago ma'ba 'didiri cini ndaro te a'done ruindu'bai ro ndäri, mozo äṛu inya ndi vino be rote ndäri. Yauono ŋga aza te i'do oyene miri ŋgwa maro.”
38 Esau ekye: “Inye'do äṛu alona aza rote i'do ya täpi maro? Nyäṛu ma kpa täpi maro.” Ndi Esau 'degwo liyine amba.
39 'Dooko Yisika atate ndäri ekye:
“Mindre nduruṛi vo'buyakuru ro narute ni miresi
ago ŋgadriamba 'bädri ro naru kpate ni miresi.
40 Mirina te bando miro si,
ago nyinduruna 'da ädrupi miro ri.
Caoko ondro ka'do nyogbote, nyonjina mi ndi ni ŋgaläŋgyi ndaro yasi.”
41 'Dooko ya Esau ro osote Yakoba lomvo tana täpi ndaro äṛute nda ayani ono ro. Ndi Esau usutate yasi ekye: “Yauono tu odra ro täpi maro rote lototi, 'dooko mäfuna ädrupi maro Yakoba 'da.”
42 Oko ondro Rebeka keri taora Esau ro ono tana te oko, anya zi Yakoba te ago atate ndäri ekye: “Nyeri dri, ädrupi miro Esau 'batate mi ufune. 43 Ka'do inye yauono ŋgwa maro, miye tase mabe atana miri ono, miŋga ago mimu dori ädrupi maro Labana re Arana ya, 44 ago miri dri ga nda be, madale yaoso ädrupi miro ro ki'dwe lutu, 45 ago ondro kyila ndaro milomvo 'do kokyete, ago nda kije tase miyebe ndäri 'do tana te oko, mazona lazo 'da mivo, tana e'di mejena ami gwo riti u'du alo si niya?”
Yisika Zo Yakoba te le Arana ya
46 'Dooko Rebeka atate Yisika ri ekye: “Mokwo tawi ni 'ditoko se atrai ro Esau ro kwoi ri. Ondro ka'do Yakoba kogye toko be kpate ni ndiriŋwà Ete'bai ro kwoi lakosi, ori maro unina kote a'done kadoro ago madrana ndi.”
© The Holy Bible in Moru © The Bible Society in the Sudan, 2000