Mätu Räṛu ro
1 OPI orivoya ŋgaeyi maro ago ŋgaopa maro;
muturina a'di ya?
OPI ni gaga'ba maro,
ma'dona turi ro ni a'di ri ya?
2 Ondro lidri kozi kate ma gota
ago kojoyite ma ufune oko
ànya a'dote pälipäliro ago 'dete.
3 Aba ondro kyila'bai kumu drî maro ca,
ma'dona ko turi ro;
aba ondro kyila kikyi ca mädri,
mayina ta gi 'du OPI ya.
4 Meji OPI te ta ŋga alodi rota;
ŋgase malebe ni no;
anjioko märi orine zo OPI roya tu oriro cini maro si,
ori liŋgyiekye OPI roya,
ago taejine ta ŋgagaga ndaro rota.
5 Nda gagana ma 'da tu rriti rosi zo ndaro ya;
nda da'dona ma 'da zo boŋgo ro ndaro ya
ago o'bana ma 'da tokpero luutu toŋgoro dri.
6 Ma'dona ndi ŋgaopeṛe be kyila'baazii maro se gbikyi malomvosi ono dri.
Malona tori ndi Yekalu ndaro ya kporo oye riyäsi si.
Maŋgona loŋgo 'da ago märäṛuna OPI 'da.
7 Nyeri ma, OPI, ondro mate läzi uzi owo!
Nya'do yauni be märi ago mizatadri maro!
8 Nyatate mikye: “Nyikyi nyämätu ma,”
Mazatadri miro te makye: “Mikyina ndi mi mätune OPI;
9 nyada'do andivo miro ko ni märi!”
Minja ma ruindu'ba miro ko kyila si;
Nya'dote opa'ba maro.
Minja ma ko, nye'be ma ko,
Äye Lu, opa'ba maro.
10 Täpi maro ndi endre maro be e'bena ma ndi,
oko OPI ondrena vo maro 'da.
11 Nyemba ma taŋgye miro ya Äye OPI,
ago nyelepe ma liti se kadoro yasi,
tana ma orivoya kyila'baazii be amba.
12 Nyozo ma ko drì kyila'baazii maro roya,
tana ànya ga kowe te malomvo, ago ànya ka ozionya.
13 Mäni ndi anjioko marina ndi takado OPI ro
ondrene ori gi yauono ya.
14 Miyi ta OPI ya.
Nya'do mbararo ago nya'do agoago be.
Miyi ta OPI ya.