Ŋgaopa Elisa ro Ävuzi Mäyuro aza ri
1 Ävuzi alo aza gboko nebii ro ro oyite Elisa re ago atate ndäri ekye: “Ago maro ruindu'ba miro drate; ago mini te ruindu'ba miro turi OPI tawi, oko yauono yuŋguozo'ba aza ikyite ŋgwàagoro ritu maro urune iyeäṛi ro.” 2 Elisa atate anyari ekye: “Mayena e'di miri ya? Nyitita märi ŋgase mi sina 'bäru e'diya?” Anya zatadrite ekye: “Ma ruindu'ba miro ono cu ŋga aza ako 'bäru, e'begialo kuruŋwa ido ro.”
3 'Dooko Elisa atate anyari ekye: “Nyoyi nyezi lakazà ya awi ni oriazii cini miro rigyesi, nyeziko toto fere. 4 'Dooko mìci zo ya ŋgwaàgoro miro yibe, ago mise käläsi ämidri, ago mìso ido se kuruŋwa ido roya 'do lakazà cini kwoi yasi; se kogate twi mìdi gwo biṛi ya.” 5 Ndi toko ana oyite ni nda resi ago cite zo anyaro ya ŋgwàagoro anyaro yibe, ago se käläsi te. Ago ondro anya kate ugu ido oso lakazà yasi oko, ŋgwàagoro anyaro uguyi lakazà ezite anyare. 6 Ondro lakazà ido ro kogate twitwi oko, anya atate alo aza ŋgwaagoro anyaro ri ekye: “Nyezi lakaza aza märi.” Ago nda atate anyari ekye: “Azana te i'do.” 'Dooko idi ido ro edrete. 7 Anya gote Nebi Elisa re ago Elisa atate anyari ekye: “Nyoyi migye ido 'do tesi, ago nyozo yuŋgu miro dri, ago anjokona 'dote miri ndi ŋgwàagoro miro be orizana.”
Elisa ndi Toko se Ŋgaamba be Sunema'ba ro ana be
8 U'du alo aza si oko Elisa oyite Sunema ya, vose toko ŋgaamba be aza koribe kigye ana, se eji nda te ŋgaonya onyane. Ondro tu azaka si nda kate lävu liti ana yasi oko nda karuoza lau ŋgaonya onyane. 9 Ago anya atate ago anyaro ri ekye: “Mäni ndi endaro mano gi kabe ikyi ondoalo nosi ono, orivoya mano alokado Lu ro yi. 10 Mi'de mabe zo ya giṛiŋwa aza kurusi ndäri, ago ma'ba kitapara, tara'biza, giti, ndi lamba be kigye ndäri tana ondro nda kikyite amare oko, ma'ba nda kori robe kigye.”
11 Tu alo aza si oko Elisa go esate lau, ago cite loline zo ana ya. 12 Ago nda atate Geazi ruindu'ba ndaro ri ekye: “Mizi toko Sunema'ba ro 'do.” Ondro nda kuzi anya te oko, anya ikyi edrete nda kandra. 13 Ndi Elisa atate Geazi ri ekye: “Nyeji anya ta ŋgase ämäri oyene anyari ta rriti se cini anya koyebe ta amaro ta ono rota. Inye'do anya olena ämäri oyine takado aza atane ta anyaro ta 'bädri'ba kode otaozo'ba kyila'bai ro ri ya?” Oko anya zatadrite ekye:
“Ma ori lidri modo maro lako teinye lemeri aza ako.”
14 Elisa eji Geazi te ekye: “Ka'do inye ayena e'di anyari ya?” Geazi zatadrite ekye: “Ta begi ono, anya teinye ŋgwaagoro ako, ago ago anyaro dete.”
15 Elisa atate ekye: “Mizi anya.” Ondro nda kuzi anya te oko, anya ikyi edrete käläsi kala. 16 Elisa atate anyari ekye: “Wari kogo kiwite oso nonye ndroazi oko, nya'dona 'da ŋgwa be drì ya.” Anya atate ekye: “Hwa, 'desi maro, mano Lu ro, miga kowe ko ma ruindu'ba miro ri.” 17 Oko ondro ndroa kogo kozaru kpate duru otivoya oso se Elisa katabe ana ronye oko, toko ana kwo ŋgwa te ago ti ŋgwaagoro te.
18 Ondro ŋgaga kombate oko, tu alo si nda oyite täpi ndaro re 'dooko täpi ndaro orivoya inya olo'bai re. 19 Ago nda trete täpi ndaro ri ekye: “Äye, drî maro ni! Drî maro ni!” Täpi atate ruindu'ba ndaro aza ri ekye: “Miŋgyi nda endre ndaro re.” 20 Ondro ruindu'ba ana kuŋgyi ŋgaga ana te, ago kezi nda te endre ndaro re oko endre ndaro ŋgyi nda te miṛi anyaro dri madale kitudiri, ndi nda drate. 21 Ndi anya oyite 'be nda te kitapara nebi Elisa ro dri, ago se käläsi te nda dri, ago fote tesi. 22 'Dooko anya zi ago anyaro te ago atate ndäri ekye: “Nyezi alo aza ruindu'bai miro ro ndi doŋgyi alo aza be märi, tana moyi robe ndrindri mano Lu ro re ago mego robe ndriŋwa.” 23 Ago anyaro eji anya te ekye: “Nyaoyi ondro ndare etaya? Tana tu ono ko Karama Imba To'di royi ca kpa ko Sabata yi.” Anya zatadrite ekye: “A'dona 'da kado.” 24 'Dooko anya rite doŋgyi dri, ago anya atate ruindu'ba anyaro ri ekye: “Mi'ba doŋgyi kumu ndrindri ago keleye ko madale matana tana leni miri.” 25 Anya fote ago oyite nebi Elisa re 'bereŋwa Karemela pa.
Ondro nebi Elisa kondre anya te ikyivoya oko, nda atate Geazi ruindu'ba ndaro ri ekye: “Mindre, Sunema'ba begyi ana; 26 mimu drî anyaro utune, ago nyeji anya kode anya, ago anyaro ndi ŋgwa anyaro be gi kado ya?”
Anya zatadri Geazi rote ekye: “Ŋga cini orivoya kado.” 27 Ondro anya kesate 'bereŋwa pa Elisa re oko, anya ovo pa ndaro te. Ago Geazi ikyite anya anane, oko Elisa atate ekye: “Mi'ba anya kori, tana anya orivoya rriti 'desi be; oko OPI da'do tana teni märi ago iti tana kote märi.”
28 'Dooko toko ana atate ndäri ekye: “'Desi, inye'do meji mi ndi ta ŋgwaagoro ro ta ya? Inye'do mata ṛo ko makye nyodo ma ko ya?”
29 Elisa atate Geazi ri ekye: “Miso boŋgo miro, miru dofo maro mirigye ago nyoyi. Ondro mi'bedrite 'diaza be, miye mede ko ndäri, ondro 'diaza koye mede te miri mizatadrina ko; nyoyi mici dori zo ya ago nyalala dofo maro 'do militi ŋgwa ana ro dri.”
30 'Dooko endre ŋgwa ana ro atate Elisa ri ekye: “Mäṛuru OPI lidriidriro si, ago andivo miro si, märi mi e'bene i'do.” Ta'dota nda ŋgate ago sote anya vo. 31 Geazi lävute käti mileya ago kyi lala dofo te militi ŋgwa ana ro dri, caoko kporo ndi beti adri robe a'dote i'do. Ta'dota nda gote drî Elisa ro utune, ago atate ndäri ekye: “Ŋgaga ana pi mi ko'de.”
32 Ondro Elisa kecite zo ya oko, nda ndre ŋgwa te u'duvoya avo ro kitapara ndaro dri. 33 Nda cite zo ya ago se käläsi te ànya ritu 'do dri, ago mätu OPI te. 34 'Dooko nda tute kitapara dri ago lala yite ŋgwa dri, 'ba kala ndaro te kala ŋgwa roya, mi ndaro mi ŋgwa roya, drì ndaro drì ŋgwa roya, ondro nda kozo andivo ndaro te a'dwi ŋgwa dri oko, lomvo ŋgwa ro eto emete. 35 Elisa go ŋga kpate kuru, ugu abate ya zo ro yasi kyigwo iga ago kyigwo iga, 'dooko gote tute kitapara dri ago ozo andivo ndaro te a'dwi ŋgaga dri. Ŋgwa sikovote perena njidrieri, ago pimite. 36 Elisa zi Geazi te atate ndäri ekye: “Mizi endre ŋgwa ro.” Ndi nda zi anya te. Ondro anya kikyite ndare oko, nda atate anyari ekye: “Miru ŋgwa miro.” 37 Anya ikyi 'dete Elisa pa, militisi vuru; 'dooko anya ru ŋgwa anyaro te ago fote tesi.
Talaroro Ritu Azaka
38 Elisa go egote kpa to'di Gilegala ya tuse mä'bu ko'debe wari ya ana si. Ondro nda kate gboko azaka nebii ro embana oko, nda atate ruindu'ba ndaro ri ekye: “Nyedre lakaza 'desi asi dri, ago nyala'di molai gboko nebii ro ri.” 39 Alo aza ànyaro fote ämvu ya agba uṛine, ago usu kono vocowa rote, ago pi doŋgo na te amba oso nda kuni be uŋgyine ronye, ago nda egote kovole elete lakaza ya. Oko ànya niyikote kode 'do agba e'di roya. 40 Ndi ànya sote lidri ana ri onyane. Oko ondro ànya ketembete oko, ànya treyite ekye: “Äye Elisa, äṛi orivoya lakaza ono ya!” Ago ànya niyi kote onyane. 41 Nebi Elisa atate ekye: “Nyezi ŋgaonya 'do.” Ndi nda sote lakaza ya ago atate ekye: “Miso lidri ri ànya konya robe.” Ndi 'dooko ŋgakozi aza a'dote i'do kigye.
42 Tu alo aza si mano aza ikyite ni Bala Salisa ya, ezi ambata doŋgo drikäti rote Elisa ri, ambata kaaza ro 'buteritu ndi drî inya 'bi'biro robe gunia si. Elisa atate ruindu'ba ndaro ri ekye: “Nyozo lidri ri, ànya konya robe.” 43 Oko ruindu'ba ndaro atate ekye: “Ma'bana ŋgaŋwa giṛiŋwa nonye ono lidri amba kandra eŋwanyeya?” Elisa dele tate ndäri ekye: “Nyozo lidri ri ànya konya robe, tana ono ni tase OPI kabe atana owo ekye: Ànya onyana 'da ago anjokona e'bena kpa.” 44 Ago nda 'bate ànya kandra. Ànya nyayite, ago anjokona e'bete oso ata OPI ro ronye.