Lui Edeedero Mätu ndi Mätu Ŋgye be
1 Ami lidri Yisaraele ro, nyeri ata se OPI kabe atana ono.
2 OPI ka atani nonye ekye:
“Mìso ko taoye tu'dei azaka ro voro;
nyà'do ko wiriwiriro ta taka'daro se kabe a'do vokuru ya iyi rota,
tu'dei azaka ka'doyi ca turiro ni ànyari owo.
3 Tana mätu lidri kwoi ro orivoya kowero.
Aga ce aza gwo vuru vocowa ya;
ago ice opa'bai payi lomvona gwo coloŋwa si,
4 itirate mo'di ndi logo läguläguro be si.
Otote voaloya ŋbaṛa si ukyi epere 'da.
5 Lui edeedero nonye kwoi laba oso ŋgase edebe ari onjaza
ni ämvu kurunju ro yasi iyi ronye;
ànya niyi ata ko;
be ànya luŋgyine luŋgyi
tana ànya niyi aba ko.
Nyà'do ko turiro ni ànyari;
ànya uninayi ko ami oyene koziro,
ago ànya uninayi kpa ko takado aza oyene ämiri.”
6 OPI, 'diaza i'do oso mi ronye;
tana mi orivoya mbaraekye,
ago ävuru miro orivoya 'desipara ago mbara be.
7 A'di orina ni mi oroako ya, mi 'bädri'ba tu'dei cini ro ono?
Tana sindi mi orone.
'Diaza i'do oso mi ronye
lidri se cini tavouni be tu'dei iyi lako
kode 'bädri'bai ànyaro lako.
8 Vo ànya cini ro orivoya tauniako ago amaamaro.
Ŋgaemba ànyaro ka ikyi ni lui awi edeedero resi.
9 Lui edeedero ànyaro a'bi lomvona te mo'di se ezibe ni Sepaina yasi,
ago logo läguläguro se ezibe ni Ufaza yasi ana si,
iyi cini orivoya losi ŋgaede'bai ro ago toka'bai ro;
Boŋgo ànyaro orivoya walawalaro ago lärimiro.
Se a'dite tauni ŋgao'di'bai rosi.
10 Oko mi, OPI, mi ni Lu ŋgye yi,
mi ni Lu se lidriidriro
ago 'bädri'ba äduako ono owo.
Ondro nya'dote kyilaro, ägbigbi ka a'do;
ago tu'dei unina ko yaiŋgyine ni kyila miro ri.
11 (Ka'do inye nyìtita kwoi ànyari mìkye eperena lui se ko'ba 'bädri ndi vo'buyakuru be koni kwoi 'da ni vo'buyakuru ya ago 'bädri ya noŋwa.)
Loŋgo Lu Räṛu ro
12 OPI 'ba 'bädri te mbara ndaro si;
nda nju 'bädri te tavouni ndaro si
ago eŋga vokuru ni a'dwi kuru tauni ndaro si.
13 Uhwe ndaro si gyi se vokuru ya 'do ka kporo oye;
nda kani 'dikolo ezi ni sidri ädu 'bädri ro yasi.
Nda ka 'bu o'ba ni si onyine
ago kani oli ezi ni zo ndaro ŋgaodroro yasi.
14 Ta ono ondrena si, lidri a'do ṛo tauniako ago amaamaro;
ànya se kayibe lui awi edena iyi a'doyite driupiro,
ta lui awi ànyaro rota tana lui edeedero ànyaro orivoya kowe ro ago adri ako.
15 Ànya orivoya takado ako ago amawona 'da;
tu ànya ezaro si oko utufuna ànya cini 'da.
16 Tana Lu Yakoba ro a'do ko oso ànya ronye;
tana nda ni se ko'ba ŋga cini be owo,
ago nda nji Yisaraele ni a'done lidri modo ndaro ro.
Ävuru ndaro ni OPI Mbaraekye.
Ikyi 'Diuru ro Midiro
17 Nyòtokala ŋga cini amiro ro, ami lidri Yerusalema ro, ämudri amiro te! 18 OPI atani nonye ekye ya oyete ami lovone tesi ni wari ono yasi tu ono si; nda ka oye rueza ezine ämidri madale mìnina lutu.
19 Lidri Yerusalema ro kayite totre ekye:
“Ama te kandrakozi ya tana aga ama te laza be!
Laza amaro ozwane te i'do.
Mùsutate màkye amaro ono rriti se mä̀nina ndi iŋgyine ono owo!
20 Epere zo boŋgoro amaro te;
otokye iba otona ro cini te.
Ŋgàga amaro vona cini oyite lozo ni ama resi;
'diaza te i'do ogone zo boŋgoro amaro eŋgane kpa to'dina kuru;
ago boŋgo toyitoyiro amaro toyine aree.”
21 Mazatadrite makye: “Dri'bai amaro orivoya tauniako;
tana ànya ejiyi OPI kote iyi lepene.
Ta 'doro ta pe ànya te ṛe.
Ago lidri ànyaro pererute.
22 Nyeri dri! Lazo esate!
Amo orivoya amba tu'dei se mä'dudrisi ana lako;
ànya tozana 'bakicii Yuda ro 'da tandro ro,
vo oriro kobai ro.”
23 OPI, mänite 'diaza ko 'desi andivo modo ndaro ro;
'diaza i'do ori modo ndaro ritane.
24 OPI, nyoloto lidri miro, oko taŋgye miro si;
ko kyila miro si;
ukyi ta amaro okye 'da.
25 Miza kyila miro kalana tu'dei se kuniyi mi ko iyi dri
ago lidri se kämätuyi mi ko iyi dri.
Tana ànya tufuyi lidri miro te;
ànya pereyi ama te kpeye
ago e'beyi 'bädri amaro te tandroro.