Loŋgo tusu ro
1 Lu atate märi loŋgo tusu ro ono oŋgone dri'bai ritu Yisaraele ro ri ekye:
2 Endre miro a'dote ibi toko ro!
Anya eca ŋgwai anyaro te, ibii àgoro
se kyilaekye iyi lakosi.
3 Anya keca ŋgwa anyaro aza te;
anya a'do te ibi mbarabe ro
ago ni ta ŋga osiro te;
ago a'dote lidri onya'ba ro.
4 Tu'dei eriyi ta anyaro te
ago 'diyi 'bu te ndi anya 'dete kigye.
Ànya eseyi anya te moŋgo si le Ezipeto ya.
5 Endre anyaro kwote anya te kpi,
madale mio'ba anyaro kyete.
'Dooko anya go eca ŋgwai anyaro azana te,
ago mbate ibi kyilaekye ro.
6 Anya abate ibii azi lakosi,
ago a'dote ibi kyilaekye ro.
Anya ni ta ŋgaosi ro kpate
ago a'dote lidri onya'ba ro.
7 Anya toŋgo tiṛii mbaraekye te,
ago pere 'ba'desii te tandro ro.
Tu cini si ondro anya kate liyi
oko lidri wari ana ro a'doyite turituriro.
8 Tu'dei otoyikalate kyila oyene anya be;
lidri ikyite ni vo cini yasi.
Ànya 'beyi kyimba te rigye
ago anya 'dete kyimba ànyaro ya.
9 Ànya 'bayi anya te gbolo ya
ago uguyi anya te 'bädri'ba Babelona ro re.
Ànya 'bayi anya te kamba ya,
ukyi ago eri liyi anyaro 'da kpa to'dina
lutui Yisaraele ro drisi.
10 Endre miro a'dote oso doŋgo kono ro
se ikyi'dite loto golo kala 'do ronye.
Gwoṛi kono ro isite amba
ago wa doŋgo te amba
tana gyi orivoya amba.
11 Gwoṛi anyaro a'dote ṛatara,
ago mbate a'done dofo 'dimiri ro ro.
Kono ana mbate kaca sate ndi 'dikolo ya;
'dicini ndre ombana kaca ana te ndi gwoṛii ambana be.
12 Oko eŋgye kono se ana te kyilasi ndrwi paji be
ago vote gyini dri vuru.
Oli se ni 'buzelesi ana ewi te
ago doŋgo anyaro lepite.
Anya wite ago azate asi si.
13 Yauono ikyi'di anya te vose rriro siŋgwaro ya,
wari se awiro gyiako ana ya.
14 Asi 'dete lupa kono se ana roya;
asi je gwoṛii ndi doŋgoi anyaro be te.
Gwoṛii se ana ni kote ogo a'done ṛatararo cu alona,
unina kote a'done dofo 'dimiriro cu alona.
Ono orivoya loŋgo tusuro; se aŋgote kpe kpe.