Pere Yisaraele ro
1 Ami te kandrakozi ya, ami se nyàbe ori rritiako lorina Zaiona ya ago ami se nyàbe ori londroro Samaria ya kwoi, ami lidri 'desi tu'de Yisaraele ro ro ono, ami se lidri Yisaraele ro kabe ukyi amire ŋgaopa ta ono! 2 Nyòyi ago mìndrevo 'bakici Kaleme ro dri. Ago ni nasi nyòyi 'bakici 'desi Amata roya ago nyòyi te le Gata 'bakici Felesete'bai roya. Inye'do ànya orivoya kadopara ndrani miri 'bädri'bai Yuda ndi Yisaraele be ro ri ya? Kode inye'do wari ànyaro orivoya 'desi ndrani wari amiro drisi ya? 3 Migazo tuse koziro kabe ikyi ono ro, oko tase nyàbe oyena ono si nyà tuse koziro ono iswena lototi. 4 Ami te kandrakozi be ami se nyàbe u'du kitapara liwasi ro dri, ago nyàbe ami pere u'duvo drisi iyi. Nyà karama oye timele ombato'diro ndi raŋga tii yibe si ono! 5 Nyà loŋgo hwihwi kudi si, oso Dawidi koyebe ronye, ago anya o'bina kudi si. 6 Nyà vino umvu dooi si ago nyà ido tägyibe lopi ami lomvosi, oko nyà'do kote tusuro ta pere Yisaraele rota. 7 Ka'do inye nyà'dona ni lidri se käti oyine midiro owo. Karamai amiro ndi u'du vurusi amiro be okyena 'da.
8 OPI Lu Mbaraekye 'ba ta te äṛusi ànyari ekye: “Ya maro orivoya osoro ta driuŋgyi lidri Yisaraele ro ro ta; ago ya maro orivoya osoro zo 'desii ànyaro lomvo. Mozona 'bakici 'desi ànyaro ndi ŋgase cini kigye be 'da kyila'baazi ànyaro ri.”
9 Ondro ka'do lidri 'butealo ke'bete orivoya katidri alo ya, ànya todranayi 'da. 10 Ago 'didiri 'dina 'do ro se kabe nda ose 'do uŋgyina avo ndaro 'da tesi ni zo yasi. 'Didiri na 'do ejina 'dise ke'bebe drigba zoya ya 'do 'da ekye: “Inye'do 'diaza dri gindi 'du mibe iga ya?” Manona 'do ozana tadri 'da ekye: “Hwa, te i'do!” 'Dooko 'didiri se ana atana 'da ekye: “Nya'do titiro! Beṛo ko ämäri ävuru OPI ro uzine.”
11 Ondro OPI kozo ota te oko, eperena zoi 'desiro 'da ronyoronyo ndi zoi giṛiŋwà ro be. 12 Inye'do farasii lämuyi gindi luutui drisi ya? Inye'do lidri so gyi'desi ndi ämvu ro 'daŋgoi si ya? Caoko nyòtoza ta'diri te äṛiro, ago nyòtoza taŋgye te koziro.
13 Nyà riyä oye ta uru 'ba'desi Lodebara rota. Nyà ata mìkye: “Märu Karenaima te ämäri mbara amaro si.”
14 OPI Lu Mbaraekye ekye: “Ami lidri Yisaraele ro, ma oye tu'dei aza eŋgane kyila oyene ami be. Ànya ezanayi ami 'da ṛoni Lävu vo Amata ya yasi le goloŋwa Araba ro ya.”