Rulofo 20 - The Holy Bible in Moru (BAIBOLO ALOKADO) (MB)

Ndroa Kuturo

1 'Dooko mandre malaika te ikyivoya vuru ni vo'buyakuru yasi, nda ru ŋga 'buociekye upiro te drí ndaro ya ndi nyori läŋgyiekye be. 2 Nda baṛi ndilo ini se kyeno, se ni Kicu'ba, kode Satani ana te, ago embe nda te anda ndroa na kuturo. 3 Malaika vo nda te le 'buociekye ya. Se drî anyaro te, ago be drî anyaro te, tana anya kori robe tu'de odoako madale ndroa kuturo okyena ni. Ono vosi oko beṛo nda onjine dritai ro tuna fere.

4 'Dooko mandre gitii te, ago ànya se koriyibe driigyesi ana ozo mbara te rigye vure opeza. Mandre lindri ànya se utufute kai ro kpate tana ànya peyi taŋgye se Yesu kolofobe ndi ata Lu robe ana tana te. Ànya mätuyi koronya ca beti anyaro kote, a'doyi kpa ko taka'daro koronya robe militi ànyaro yasi ca dríi ànyaro yasi. Ànya adriyite ago miriyi 'di te oso 'bädri'bai ronye Kristo be ndroa na kutu alo. 5 (Anjoko avo ro adriyi kote madale ndroa kuturo okyena lutu.) Ono ni efo käti avo ro owo. 6 Ànya se äṛu ndra be ni ànya se olocite efo avo ro käti ono ya owo. Odra ṛiri mbaraako ànya dri, ànya a'donayi 'da kohanii Lu ro ago Kristo ro, ago ànya mirinayi 'di 'da nda be ndroana kuturo.

Satani Ope Ṛe

7 Ndroa kuturo vosi oko, onjina Satani 'da ni kamba ndaro yasi, 8 ago nda oyina 'da tesi tu'dei se kepererube 'bädri cini yasi odone, se ni Goga ndi Magoga be. Satani ezina ànya cini 'da voaloya ta kyila oye rota, ṛo amba oso koṛogoŋwà siŋgwa ro kototi gyi'desi ro kala ronye. 9 Ànya pererute 'bädri yasi ago muyidri gawa lidri Lu ro rote ndi 'bakici se nda kulube be. Oko asi ikyite ni vo'buyakuru yasi ago je ànya te. 10 'Dooko Satani, se kodo ànya be ana, avote fofo asi ro ndi bäruti be roya, se koronya ndi nebi mieywe'ba be avo teṛo nja kigye ago ezana ànya 'da kitu ago ŋgäkyi äduako ago rriro.

Vureope Äduro

11 'Dooko mandre giti 'desi onjero te, ago 'diaza ka ori driigye. 'Bädri ndi vo'buyakuru be mute ni kandra ndaro yasi ago andre ànya kote tona. 12 Ago mandre avo te 'di'desi ro ndi 'di giṛiŋwà robe, edrevoya giti kandra. Äpi buku te, ago 'dooko äpi buku aza te, buku 'di lidriidriro ro. Ape vure avo rote tase ànya koyebe voro, oso egyibe buku ya ronye. 13 'Dooko gyi'desi lofo avo iro te. Odra ndi 'bädri avo robe lofo avo se ànya yasi kpate. Ago vona cini ape vurena te oso tase ànya koyebe ronye. 14 'Dooko Odra ndi 'bädri avo robe avote fofo asi roya. (Fofo asi ro ono orivoya ni odra ṛiri yi.) 15 Nda se ävuru ndaro egyi kote buku 'di lidriidriro roya avote fofo asi roya.