Rulofo 12 - The Holy Bible in Moru (BAIBOLO ALOKADO) (MB)

Toko ndi Ndilo be

1 'Dooko ŋga'desi ago ondrena rritiro ka'darute vokuru ya. Toko aza orivoya, boŋgo na orivoya kitu yi ago anya orivoya imba be pa anyaro zele ago tagyia 'bi'bi 'butealo foritu robe drî anyaro yasi. 2 Anya ka oyete utine ndriro, ago luwu ndi rueza ŋgwa utiro be 'ba anya te totrene.

3 Ŋga aza ondrena rritiro ka'darute vokuru ya. Ndilo 'desi okaro drî njidrieri be ago koyi be 'butealo ago tagyia alo alo be drîi ndaro drisi. 4 Nda ese telesi nina 'bi'bii rote tavi ndaro si ni vokuru yasi ago evo ànya te vuru 'bädri ya. Nda edrete mile toko ana roya, tana konya ŋgwa anyaro robe dori utina vosi. 5 'Dooko anya ti ŋgwa agoro te, se mirina tu'dei cini 'da drikaca 'desi si. Oko ahwe ŋgwa te ago ugu te Lu re ago giti ndaro re. 6 Toko ana mute vocowa ya, vose Lu kedebe anyari ana ya, tana andrevo anyaro robe lau u'du kutu alo kama ritu 'butenjidrialo (1,260).

7 'Dooko kyila 'dete vo'buyakuru ya. Maikolo ndi malaikai ndaro be yeyi kyila te ndilo be ago ndilo ndi malaikai ndaro be yeyi kyila kpate; 8 oko ape ndilo te ṛe, ago nda ndi malaikai ndaro be ale kote orine vo'buyakuru ya tona. 9 Evo ndilo 'desi te tesi, ini se uku, se äzite Kicu'ba, kode Satani, se odo 'bädri cini te. Evo nda te vuru 'bädri ya, tro malaikai cini ndaro be.

10 'Dooko meri kporo ata amba rote vo'buyakuru ya ugu ata ekye: “Yauono ŋgaopa Lu ro esate! Yauono Lu ka'da mbara ndaro te oso 'Bädri'ba ronye! Yauono Mesiya ndaro ka'da drikaca ndaro te! Tana nda se kedrebe Lu amaro kandra ago kikicu ädrupii amaro te kitu ndi ŋgäkyi be si ono evote vuru tesi ni vo'buyakuru yasi. 11 Ädrupii amaro peyi nda te ṛe kari Timelegogo rosi ago taŋgye se ànya kopebe si, ago ànya a'dote ole be adri ànyaro ozone ago odrane. 12 Ago ta'doro nyà'do yai'dwesi, ami vo'buyakurui, ago ami se cini se nyàbe ori lau 'do! Oko aba te rritiro 'bädri ri ndi gyi'desi be! Tana Kicu'ba efote vuru amire, ago nda te twi kyila be, tana nda ni ndi anjioko tu ndaro e'bete toto fere.”

13 Ondro ndilo kunite evo nda te vuru 'bädri ya oko, nda eto oso te toko se kuti ŋgwaagoro be ana vo. 14 Ozo kufu ritu ägyiribi 'desi rote anyari tana koŋga robe sina vo anyaro ya vocowa ya, vose andrena vo anyaro 'da kigye ndroa nätu kpäkyi londro ro, ni ndilo ri anya gotavoya. 15 Ago 'dooko ndilo i'dwe gyi te tesi ni kala ndaro yasi toko ana vo, tana kuŋgyi anya robe. 16 Oko gyini pa toko ana te, anya pi kala iro te ago mvu gyi se kefobe ni kala ndilo ro yasi ana te. 17 Ndilo a'dote kyilaro toko ana be oyite kyila oyene zelevoi anyaro, vona cini se kabe ota Lu ro orona ago orivoya 'diri taŋgye se aka'date Yesu si ri be. 18 Ago ndilo edrete gyi'desi kala.