Lu 'Bädri'ba Para yi
(1 Ambâ 16:23-33)1 Mìŋgo loŋgo to'di OPI ri!
Mìŋgo loŋgo OPI ri 'bädri cini!
2 Mìŋgo loŋgo OPI ri, ago nyä̀räṛu nda!
Nyàyo ta ŋgaopa ndaro ro tana tu cini si.
3 Nyàyo a'do 'desi ndaro tana tu'dei cini ri,
nyàyo taoye mbaraekye ndaro tana lidri cini ri.
4 OPI orivoya para ago ṛo räṛune ndra;
ṛo nda orone ndrani lui cini ri.
5 Lui cini tu'dei azi ro orivoya toto ŋgaedeedero yi,
oko OPI 'ba vo'buyakuru ni.
6 Taoro ndi 'desi be orivoya ŋgulu nda lomvosi;
mbara ndi liŋgyi be orivoya Yekalu ndaro ya.
7 Nyä̀räṛu OPI, ami lidri cini 'bädri ya;
nyäräṛu a'do'desi ndi mbara ndaro be.
8 Nyä̀räṛu ävuru liŋgyiekye OPI ro;
nyèzi ŋgapäṛi ago nyìkyi goko Yekalu ndaro roya.
9 Nyä̀mätu OPI ta a'do alokado ndaro rota.
Nyä̀lä'bi nda kandra, ami 'bädri cini ono!
10 Nyàta tu'dei cini ri mikye: “OPI orivoya 'bädri'ba yi!
Edre 'bädri te ŋgyiri vona ya ago änina ko uswene;
nda opena vure lidri ro 'da taŋgyesi.”
11 Mì'ba vo'buyakuru ka'do yai'dwesi,
ago mì'ba 'bädri koye riya.
Gyi'desi koye kporo ndi ŋgaŋwà se cini kigye be.
12 Nyà'do yai'dwesi, lowoi, ndi ŋgase cini miya be!
Ice cini vocoko ya otrena 'da riyäsi
13 ondro OPI kate ikyi owo,
nda ka ikyi 'bädri mirine.
Nda mirina 'bädri 'da taŋgyesi
ago mirina lidri 'da ta'diri si.
© The Holy Bible in Moru © The Bible Society in the Sudan, 2000