Mätu 'Bädri'ba ta
1 Nyozo vureope ŋgye miro 'bädri'ba ri, Äye Lu,
ago nyozo a'do kado miro 'bädri'ba amaro ri.
2 Mi'ba nda kimiri lidri miro taŋgye si,
ago kondrevo ati'bai miro ro ta'diri si.
3 Mi'ba wari kiliti ŋgaamba;
ago taŋgye ka'do lidri lako.
4 Mi'ba 'bädri'ba kope vure ati'bai ro kadoro;
nda kopa lemeri'bai,
ago kope ànya eza'bai ṛe.
5 Mi'ba lidri miro kämätu mi ondro ka'do kitu kaagi ugu voeyi owo,
ago imba kaagi ugu ŋgaeyi ozo
rriro madale äduako owo.
6 Mi'ba 'bädri'ba ka'do oso 'bu kabe u'di käyi drisi ronye,
oso 'bulogyi kabe ugu logyi gyinidri ronye.
7 Taŋgye komba adiya tu oriro ndaro si,
ago kandrakado kori madaro oso imba kabe ŋgaeyi ozo ronye.
8 Miri 'bädri'ba ndaro ro osana 'da ni gyi'desi sisi le gyi'desi si,
ni Golo Eferata sisi le ädu gyini roya.
9 Lidri ka oribe vocowa ya ändina 'da vuru nda kandra;
kyila'baazii ndaro lovonayi andivo ànyaro 'da gyini dri.
10 'Bädri'bai Sepaina ro ndi roŋgai drisi be ozonayi ŋgapäṛi 'da ndäri;
'bädri'bai Sheba ro ndi Seba robe ozonayi ŋgapäṛii 'da ndäri.
11 'Bädri'bai cini ändinayi 'da vuru nda kandra;
tu'dei cini indurunayi 'da ndäri.
12 Nda kani lemeri'bai se kabe läzi uzi opana,
ndi ànya se orivoya ati'bai ro ago ati tana ko be.
13 Nda yauni be ànya se mbaraako ago ati'bai ro ri;
nda kani adri lemeri'bai ro opana.
14 Nda ka ànya opa ni rueza ndi siomba be yasi,
ago adri ànyaro orivoya ta'desi yi ndäri.
15 Miri madaro 'bädri'ba!
Mi'ba ozo logo läguläguro Sheba ro ndäri;
mi'ba aye mätu nda ta tu cini si;
äṛu Lu ro ka'do nda dri ondoalo!
16 Mi'ba inya ka'do amba gyini ya;
ago drî lutui ro ka'do ŋga owaowa robe,
mi'ba doŋgona ka'do amba;
amba oso doŋgo Lebanona ro ronye.
Mi'ba lidri kiliti twi 'bakici ya,
oso käyi be twi lowo ya 'do ronye.
17 Mi'ba ävuru 'bädri'ba ro kori tana ijeako äduako;
liku ndaro kori madaro oso kitu ronye.
Mi'ba äṛu tu'dei nda si,
ago tu'dei cini käräṛu nda.
18 Räṛu ka'do OPI, Lu Yisaraele ro ri!
Nda se ka tase liŋgyiekye kwoi oyena toto ni ono.
19 Nyäräṛu ävuru fopara ndaro äduako!
a'do'desi ndaro ka'do 'bädri cini ya.
Ka'do ndi inye Ka'do ndi inye.
20 Ono ni ädu mätu Dawidi
ŋgwa Yisai ro ro owo.
© The Holy Bible in Moru © The Bible Society in the Sudan, 2000