Räṛu 59 - The Holy Bible in Moru (BAIBOLO ALOKADO) (MB)

Mätu ta Ŋgaoparo ta

1 Mipa ma ni kyila'baazii maro risi Äye Lu maro;

nyagaga ma ni ànya se kabe ma gota risi!

2 Mipa ma ni lidri se ka takozi oye rigyesi;

mipa ma ni 'diufu'bai rigyesi!

3 Mindre! Ànya kayi ugu ma kote ufune;

lidri siombaekye kayi ugu kalakoto mädri.

Ko ta takozi aza kode ŋgakozi aza se mayebe rota Äye OPI,

4 ca kpa ko ta taenji aza maro rota,

ànya kayite oyi foroforo ma gotane.

Miŋga, nyikyi ma opane ago mindre!

5 Mi OPI, Lu Mbaraekye, mi Lu Yisaraele ro!

Mipi mi ago nyeza tu'dei cini kwoi;

nye'be ànya se kabe taundiro ora driozo si kayi ko eza ako!

6 Ànya kayi ego tandrole cini si,

kayi ugu ogbo oso kokye kabe

ugu lepi 'bakici lomvosi ronye.

7 Nyeri tase kabe efo ni kala ànyaro yasi.

Ladra ndi ozionyaro ànyaro be,

tana ànya kusuyi iro be ekye 'diaza eri iyi ko.

8 Oko nya ànya ugu, OPI;

nya tu'dei taomaako'bai ro cini uguna.

Lu mi ni mbara maro, ma voondre midri.

9 Ma taoyibe mbara miro ya;

tana mi orivoya ruda'dovo maro, Äye Lu.

10 Lu maro se lu ma be ono ikyina 'da mare;

nda o'bana ma 'da opeṛe kyila'baazii maro ro ondrene.

11 Mifu ànya ko, Äye Lu, ukyi lidri maro ijetate.

Nyepere ànya mbara miro si,

ago mipe ànya ṛe.

Äye Opi, gaga'ba amaro.

12 Ta takozi kala ànyaro rota, ago ata cini ànyaro rota;

mi'ba äru ànya driuŋgyi ànyaro ya!

Tana ànya kayi latriotri ndi koweoga be,

13 nyutufu ànya kyila miro si;

nyutufu ànya kpeye.

'Dooko lidri kuni robe anjioko Lu kani Yisaraele miri,

ndi 'bädri cini be.

14 Ànya kayi ego tandrole cini si,

kayi ugu ogbo oso kokye ronye

ugu lepibe 'bakici lomvosi,

15 Ànya kayi aba ŋgaonya uṛibe oso kokyei ronye,

ago kayi ugu oozo ondro ànya kusuyi kote amba owo.

16 Oko maŋgona loŋgo 'da ta mbara miro rota;

maŋgona loŋgo 'da amba ta ŋgalu 'duro miro rota kyenoŋbo cini si.

Tana nya'dote vo rugaga ro märi,

ago ruda'dovo tu rritiro maro si.

17 Lu mi ni mbara maro, ma voondre midri,

tana mi Lu ni vo rugagaro maro,

Lu se kabe ŋgalu 'duro ka'da märi owo.