Zaiona 'Bakici Lu ro
1 OPI orivoya 'desipara ago ṛo räṛune ndra
'bakici Lu amaro roya, lutu alokado ndaro dri.
2 Se orivoya ogwaekye ago liŋgyiekye;
ago kani riyä ezi 'bädri cini ri.
3 Lu ka'date anjioko nda andivo na ni gaga'ba yi
tiṛi obeobero 'bakici roya.
4 'Bädri'bai otoyikalate voaloya
ago ikyiyite 'bakici ana gotane.
5 Dori ondro ànya kondreyi anya te oko, ànya laroyite;
ànya turiyite ago muyite.
6 Turi so ànya te ndi lomvolwu be
oso toko se kabe ŋgwa uti ronye,
7 oso oligbiriṛi kabe toŋboi 'desi pele ronye.
8 Oso mèribe ronye,
ago yauono màndre te
'bakici OPI Mbaraekye roya;
'bakici Lu amaro ro se nda etina 'da londroro äduako.
9 Mà ŋgalu 'duro miro tavona usuna,
Yekalu miro ya, Äye Lu.
10 Liku miro ka osa vo cini yasi,
ago lidri ka mi räṛu 'bädri cini ya.
Drigo miro orivoya twi takado be.
11 Mi'ba lidri Zaiona ro ka'do yai'dwesi!
Mi'ba lidri 'bakici Yuda ya ro koye riyä;
tana nya vure ŋgye ope ni!
12 Nyàba Zaiona lomvosi, nyàba lomvoigyesi ŋgulu ago mìti tiṛiwiṛa nai;
13 mìndre tiṛii mbaraekye na, nyèna tiṛi obeobe na
tana nyiti tana robe kovole'bai se kabe ikyi ri:
14 “Lu ono orivoya Lu amaro äduako, äduako;
nda lepena ama 'da äduako.”
© The Holy Bible in Moru © The Bible Society in the Sudan, 2000