Mätu ta Ŋgaopa rota
1 Nyedreŋbi ànya se kabe edreŋbi mamile mi, Äye OPI,
ago miye kyila ànya se kayibe kyila oye mabe be.
2 Miru ŋgaruotaro miro ndi lakazà kyila robe
ago nyikyi ma opane.
3 Miru äzu miro kusu ndi koloŋwa kyila robe
kyilaoyeza ànya se kabe oso mavo be.
Nyiti ta märi mikye: “Ma ni opa'ba miro.”
4 Mi'ba ànya se kayibe ojo ma ufune
ṛo opene ṛe ago o'bane driupi ro!
Mi'ba ànya se kayibe taäyi malomvo
ṛo mina ozane kovole ago ṛo gburune!
5 Mi'ba ànya a'done oso turu oli kabe onjana ronye,
oso malaika OPI ro kabe oso ànya vo ronye!
6 Mi'ba liti ànyaro ṛo a'done uniro ago toretorero
ondro malaika OPI ro kate ànya lanja owo!
7 Ànya 'beyi abari te märi teinye ta ako
ago 'diyi 'bu te o'deza märi teinye ta ako.
8 Oko eperena ànya 'da teinye ànyari tana uniako,
äruna ànya 'da abari se ànya ko'bebe ya,
ago o'denayi 'da ago tufunayi iyi 'da!
9 'Dooko ma'dona 'da yai'dwesi ta OPI rota;
ma'dona 'da riyä ro ŋgaopa ndaro ta.
10 Matana 'da makye:
“A'di ni oso mi ronye ya, Äye OPI
mi se nya mbaraako'ba opa ni 'dise mbarabe risi
ago lemeri'bai opa ni lidri se
kabe ànya eza risi ono.”
11 Ànya se kayi tazevoedre kowesi iyi ŋgayite kuru;
ànya ka ma eji ta ŋgase mäni ko rota.
12 Ànya logoyi ṛo takozi ayani vo takado ro ya märi;
ma te rriti ya.
13 Oko ondro ànya ko'dete adravo ro,
maso boŋgo guniya rote malomvo;
meta ma te ŋgaonya ako.
Mämätute drî maro ediediro vuru
14 oso mabe mätu bereazi kode ädrupi maro ta ronye;
mugu abate liyi be ago tusu si
oso 'diaza se kabe endre ndaro liyi ronye.
15 Oko ondro ma'dete rriti ya anya otoyikala te malomvo ago guyi ma te;
lidri se kätina mäni ko lo'dayi mate teinye edreako.
16 Ànya guyi ma te 'dolo ro ndra ago kayi ozionya malomvo.
17 Mindrena ma toto mi si tuna mu'du eŋwanyeya OPI?
Mipa ma ni ŋgagota ànyaro yasi
ago ni ibii iyi risi.
18 'Dooko mayena aro'boya 'da miri tu kalakoto 'desi rosi.
Kalaombi 'desi lowa roya
märäṛuna mi 'da.
19 Mi'ba kyila'baazii maro konya ciri ko mädri
ago ànya se yana osoro malomvo
teinye lämiako iyi kugu ma ko.
20 Ànya atayi takado ko
oko kayi koweoga ayani
lidri se kulu taliatokpe be lomvo.
21 Ànya treyite mädri ekye
“Dia wo, màndre ŋgase miyebe te.”
22 Mindre ta ono te, Äye OPI.
Nya'do ko titiiti ro!
OPI nya'do ko lozo ni malomvosi.
23 Miŋga ago nyikyi ma gagane,
lu maro ago OPI maro.
24 Nyaka'da a'do taenjiako maro,
Äye OPI, Lu maro taŋgye miro si,
ago mi'ba kyila'baazii maro konya ciri ko mädri.
25 Mi'ba ànya katayiko iyivoya ekye
“Màye ŋgase màlebe te!
Mä̀fu nda te.”
26 Mi'ba ànya se kayibe a'do riyä ro tu rriti
maro rosi 'do driupiro ago ŋgagburu ya!
Mi'ba ànya se kayibe iyi eŋga ndra mädrisi
'do driupi ro ago oroako.
27 Mi'ba ànya se koleyi ndi ma ondrene taenjiako'ba
ro 'do koyeyi riyä ago ka'doyi yai'dwesi
ago katayi rri ekye;
“OPI ni 'desi para, nda orivoya yai'dwesi takado ma ruindu'ba ndaro robe.”
28 'Dooko mitina takado miro tana ndi
ago märäṛuna mi ndi kitu zwi.
© The Holy Bible in Moru © The Bible Society in the Sudan, 2000