Mätu ta 'Digaga rota
1 OPI, mipa ma, ni lidri kozi rigyesi;
nyäti ma londro ro ni lidri siomba be risi.
2 Ànya kayi ugu takozi äyi
ago kayi ugu kyila egye ondoalo.
3 Ladra ànyaro orivoya kyaka'da oso ini ro ronye;
ata ànyaro orivoya oso äṛi ŋbuŋbu ro ronye.
4 Nyagaga ma, OPI, ni mbara takozi'bai ro risi;
nyäti ma londro ro ni lidri siomba be
se kabe taäyi o'de maro tana ro iyi risi.
5 Lidri driuŋgyiekye 'be abari te märi;
ànya yiyi iba ànyaro te,
ago 'beyi abari te liti dri märi.
6 Ma ata OPI ri makye: “Mi orivoya Lu maro.”
Nyeri liyi maro ta ŋgaopa rota, Äye OPI!
7 OPI, Lu maro, gaga'ba mbaraekye maro,
nyagaga ma te tu kyila rosi.
8 OPI, nyozo ŋgase takozi'bai koleyibe ko;
mi'ba taäyi ànyaro ka'do ko kado.
9 Kyila'baazii maro kayi driuŋgyi;
mi'ba ozionya ànyaro malomvo kogo gi ànya dri.
10 Mi'ba asikyele emero kalayi ànya dri;
mi'ba avo ànya 'bu ya ago kefoyi ko tesi alona.
11 Mi'ba ànya se kayibe azii kicu kowero iyi ka'do ko kandra kado be wari ya;
mi'ba takozi kuturu lidri se siomba be dri ago kutufu ànya.
12 Mäni ndi OPI, nyani ati'bai gaga,
ago nyani taŋgye lemeri'bai ro gaga vure ya.
13 Taŋgye'bai räṛunayi mi 'da endaro;
ànya orinayi 'da mikandra.
© The Holy Bible in Moru © The Bible Society in the Sudan, 2000