Oti 28 - The Holy Bible in Moru (BAIBOLO ALOKADO) (MB)

Ŋgapäṛi Ozo Ondoalo

1 OPI atate Musa ri ekye: 2 “Nyozo ota se ono lidri Yisaraele ro ri, ago nyata ànyari mikye: ‘Ämiri ŋgapäṛi ozone märi, ŋgaonya ŋgapäṛi tägyi ndeṛiekye ro ozane asi si, tuna se aka'dabe si.’ 3 Ago nyata ànyari mikye: Kwoi ni ŋgapäṛi se ozaro asi si ozone OPI ri owo: Timelegogoi ritu se ndroa na alodi ago teinye mämbiako 'do, olone ondo alo rriro. 4 Ämiri timelegogo alodi olone kyenoŋbo si, ago timelegogo azana olone tandrole si; 5 tro ŋgapäṛi inya ro telesi alo 'bute koma kyira ndändärändäro ro dro'bedro'bero telesi alo lisu gäbä ido ozwaozwaro rosi be. 6 Ugu ozane inye rriro, oso se etobe 'Bereŋwa Sinai pa tägyi tagyiri ro ana ronye, ŋgapäṛi ozaro asi si ro OPI ri. 7 Ŋgapäṛi vinoro na a'done ya telesi alo lisu gäbä ro ta timelegogo alo alo rota; miri ŋgapäṛi vino se osoekye lodane vo tori oloro ya ŋgapäṛi ro OPI ri. 8 Miri timelegogo azana olone tandrole si; oso ŋgapäṛi inya ro kyenoŋbo ro ronye, ago oso ŋgapäṛi na vinoro ronye, miri ozone ŋgapäṛi ozaro asi si ro, tägyi tagyiri ro OPI ri.

Ŋgapäṛi Sabata ro

9 “Sabata si be miri timelegogoi ritu se ndroa na be alodi teinye mämbiako 'do ozone, ago telesi alo linji koma kyira ndändärändäro ŋgapäṛi inya ro ozone, dro'bedro'bero ido si, ndi ŋgapäṛi vino na robe: 10 ono ni ŋgapäṛi ozaro Sabata cini si owo, a'done kinja ŋgapäṛi ozaro rriro ndi ŋgapäṛi vino na robe ro.

Ŋgapäṛi Ozo U'du Käti Imba rosi

11 “U'du käti imba cini rosi ämiri ŋgapäṛi ozaro ozone OPI ri: 'daŋgoi ombato'diro ritu, timelegogo alodi, timelegogoŋwà se ndroa na be alodi se teinye mämbiako iyi njidrieri; 12 ago telesi nina 'bute koma kyira ndändärändä ro ŋgapäṛi inya ro ro, dro'bedro'bero ido si, ta 'daŋgo alo alo rota; ago telesi ritu 'bute koma kyira ndändärändäro ŋgapäṛi inya ro ro ozone, dro'bedro'bero ido si ta timelegogo alo rota; 13 ago telesi alo 'bute koma kyira ndändärändäro ŋgapäṛi inya ro ro dro'bedro'bero ido si ozone ta timelegogoŋwà cini rota; ŋgapäṛi ozaro tägyi tagyiriro asi si ro OPI ri. 14 Ŋgapäṛi vinoro ànyaro a'done ya 'boṛoŋwa vino ro kpäkyi alo ta 'daŋgo alo rota, ago telesi nina 'boṛoŋwa ro ta timelegogoŋwa alo rota; ago telesi alo lisu 'boṛoŋwa ro ta timelegogo rota. Ono ni ŋgapäṛi se oyene imba cini ya ndroa cini si owo. 15 Ago kpa tego ozone ŋgapäṛi ro ta takozi rota OPI ri, a'done kinja ŋgapäṛi ozaro ro OPI ri rriro ndi ŋgapäṛi vino na be ro.

Ŋgapäṛi Tu Karama Ambata Loŋgaako ro rosi

(Lewe'bai 23:5-14)

16 “Karama Lävu Odra ro ro OPI oro ro oyene u'du 'butealo fosu imba käti rosi. 17 'Dooko u'du 'butealo fonji imba ono ro si oko, karama ambata loŋgaako ro etona gwo. Ämiri ambata loŋgaako onyane u'duna njidrieri. 18 U'du käti ri a'done kalakoto alokado ro, ämiri losi oyene tuna 'do si i'do, 19 oko ämiri ŋgapäṛi ozaro asi si ozone ozane OPI ri: 'daŋgoi ombato'diro ritu, timelegogo alodi, ago timelegogoŋwà se ndroa na be alodi iyi njidrieri, se teinye mämbiako iyi ayani; 20 ago ŋgapäṛi inya ànyaro rota kyira ndändärändäro dro'bedro'bero ido ice ido ro rosi; ämiri telesi nina 'bute koma ro ozone ta 'daŋgo alo rota. Ago telesi ritu 'bute koma ro ta timelegogo alo rota, 21 ago telesi alo 'bute ro ämiri ozone ta timelegogoŋwà njidrieri alo alo rota; 22 Tego alodi kpa ozone ŋgapäṛi ro ta takozi rota, ta 'diwäṛiro oyezana ämiri. 23 Se cini kwoi ämiri ozone kinja ŋgapäṛi kyenoŋbo ro ro, se orivoya ŋgapäṛi ozaro rriro yi. 24 Kpa ämiri ŋgaonyaro ozaro asi si oyene oso inye ondoalo, madale u'duna njidrieri, tägyi tagyiri ro OPI ri, a'done kinja ŋgapäṛi ozaro asi si rriro ndi ŋgapäṛi vino na be ro. 25 U'du njidrieri si ämiri kalakotone mätune; ko ämiri losi oyene tu 'do si.

Ŋgapäṛi Karama Jalai ro ro

(Lewe'bai 23:15-22)

26 “Tu doŋgo drikäti rosi, ondro nyàte inya to'di amiro ozona ŋgapäṛi ro OPI ri tu karama u'du njidrieri rosi, ämiri kalakotone mätu oyene; ko ämiri losi oyene tu 'do si. 27 Nyòzo ŋgapäṛi ozaro, tägyi tagyiri ro OPI ri; 'daŋgoi ombato'diro ritu, timelegogo alodi, timelegogoŋwà se ndroa na be alodi iyi njidrieri; 28 ago ŋgapäṛi inya na ro ro kyira ndändärändäro dro'bedro'bero ido ice ido ro rosi, ämiri telesi nina 'bute koma ro ozone ta 'daŋgo alo alo rota, ago telesi ritu 'bute koma ro ozone ta timelegogo alo rota, 29 ago telesi alo 'bute ro ämiri ozone ta timelegogoŋwà njidrieri rota. 30 Tego alodi be ta 'diwäṛiro oyezana ta amiro ta. 31 Se cini kwoi ämiri ozone kinja ŋgapäṛi ozaro rriro ndi ŋgapäṛi inya ro na be, ndi ŋgapäṛi ànyaro vinoro be. Mindre se teinye mämbiako iyi ayani.