Oti 25 - The Holy Bible in Moru (BAIBOLO ALOKADO) (MB)

Lidri Yisaraele ro Peora ya

1 Ondro Yisaraele'bai kotoyi gawa te Sitimi ya oko, lidri eto ta ronyi oyero te ndiriŋwa Moaba robe. 2 Ndiriŋwa kai läziyi ànya te ikyine karama tori oloro lui ànyaro roya; lidri Yisaraele ro nyayi ŋga te ago mätuyi lui ànyaro te. 3 Ta'dota Yisaraele'bai dro'beruyite lu Baala Peora ro mätune. Ndi kyila OPI ro lekote ànya lomvo. 4 OPI atate Musa ri ekye: “Miru dri'bai cini Yisaraele ro, nyutufu ànya kitudiri si ma OPI kandra tana kyila ndra ma OPI ro kokye robe ni Yisaraele'bai lomvosi.” 5 Ta'dota Musa atate vureope'bai Yisaraele ro ri ekye: “Vo amiro cini mano alo kufu lidri ndaro se kozoyi andivo ànyaro be Baala Peora ro mätune iyi.”

6 'Dooko alo aza lidri Yisaraele ro ro ikyite ago ezi toko Midiana'ba ro aza te zo boŋgoro ndaro ya mile Musa ro yasi ago mile lowa cini Yisaraele ro ro yasi, 'dooko ànya kayi liyi käläsi Mutuguṛi a'do lototi OPI ro kala. 7 Ago ondro Finasa ŋgwa Eleazara ro, kwozo kohani Arona ro kondre ta ono te oko, nda ŋgate ago e'be lowa te ago ru äzu te nda rigye. 8 Finasa sote mano se Yisaraele'ba ro ana vo zoya yasi ya, ndi 'di ànya te riti, mano Yisaraele ro ana ndi toko se ana be. Ta'dota adravo se koziro lidri Yisaraele ro dri ana edrete. 9 Caoko 'dooko lidri drate orivoya kutu 'buteritu fosu (24,000).

10 OPI atate Musa ri ekye: 11 “Finasa ŋgwa Eleazara ro, kwozo kohani Arona ro, za kyila maro kalana te kovole ni lidri Yisaraele ro drisi, tana nda orivoya kyilaro oso ma be kyilaro ànya be ono ronye, ka'do inye märi lidri Yisaraele ro tufune kyila maro si te i'do. 12 Ka'do inye nyata Finasa ri mikye: ma'ba tao'baro maro taliatokpe rote ndäri; 13 nda ndi zelevoi ndaro be a'donayi te 'du kohanii ro, tana nda a'dote kyilaro ta Lu ndaro rota, ago ye ta ŋgae'bero ta takozi rota te ta lidri Yisaraele ro rota.”

14 Mano Yisaraele ro, se äfube toko se Midiana'ba ro ana be ana ävuruna Zimiri ŋgwa Salu ro, dri'ba yi katidri Simeona roya. 15 Ago toko Midiana'ba ro se äfube ana ävuruna Kozebi ŋguti Zura ro, täpi anyaro orivoya opi alo aza katidrii Midiana'bai ro ro.

16 OPI atate Musa ri ekye: 17 “Miye kyila midiana'bai, be ago nyutufu ànya; 18 tana ànya 'bayi ami te kyila'baazii ro ŋgaodo ànyaro Peora ya ono si, ta Kozebi ŋguti opi Midiana'bai ro ro, endreŋwa ànyaro rosi, se äfube tuse adravo koziro ka'dobe Peora ya ana rosi ana.”