Nemaya 5 - The Holy Bible in Moru (BAIBOLO ALOKADO) (MB)

'Dimäyuro Eza

1 Tu aza si amba lidri ro mànoago ndi 'ditoko ogyeogye ànyaro be, etoyi driovite amba ädrupii ànyaro Yudai ro be. 2 Tana rukä ànyaro atate ekye: “Ama orivoya ŋgwaàgoro be ndi ndiriŋwa be amba, màle inya ämäri onyane ama ätiza lidriidriro.”

3 Azakana ata kpate ekye: “Màte ugu parata uru tiko ro inya ogyezana ämäri ni mä'bu ri, ondro ka'do mòlogo parata 'do kote mìjena ämvu amaro, ämvu konoro amaro, ndi zoi amaro be ndi.”

4 Azakana atate ekye: “Mä̀ru yuŋgu te parata driutwero ozoza 'bädri'ba ri ta ämvu amaro ndi ämvukonoro amaro be rota. 5 Ama orivoya beti alo yi oso Yudai azi amaro ronye ŋgwai amaro kpa oso ŋgwai ànyaro ronye. Caoko mà te ugu ŋgwàagoro ndi ndiriŋwa amaro be o'bana a'done iyeäṛi ro, ago màgye rukä ndiriŋwa amaro ro ṛote nja iyeäṛi ro. Ama te teinye mbara aza ako opane, tana 'diazaka ruyi ämvu amaro ndi ämvu konoro amaro be te.”

6 Ma'dote kyilaro ondro meri ta ata driovi ànyaro rote owo. 7 Ondro musu tate tana ro oko mikicu 'desii ndi dri'bai lidri ro bete, ago matate ànyari makye: “Nyàte ugu ŋgalitiro uruna ni ädrupii amiro rigyesi.”

Mambikala lidri amba rote ago muluku dri'bai te rriti, 8 ago matate ànyari makye: “Mojote ruutrine mbara cini si, magye ädrupii amaro Yudai ro te kovole se agye ànya te tesi tu'dei azaka ri; oko yauono nyàte ugu ädrupii amiro ogyena tesi ogo ogyene kovole Yudai azi ànyaro ri!” Dri'bai cini lidri ro a'doyite titiro ago niyi kote ta aza atane.

9 'Dooko matate makye: “Tase nyàbe ugu loyena ono ko kado. Beṛo ko ämiri Lu amaro turine, ukyi kyila'baazii amaro se atrai ro ono ugu ama 'da. 10 Ndrani 'dori, ma, ädrupii maro ndi dri'bai losi ro maro be mòzo parata ndi inya be te lidri ri yuŋgu ro. Mì'de me'be ta ŋgavologo ŋgaliti be ono. 11 Nyòlogo ŋga ànyaro ndi kitu ondro ono si ànyari, ämvui, ämvui kono ro, ice ido royi ndi zoi ànyaro be ago alo kama parata ro, inya, vino ndi ido ice ido ro robe se mìrube ŋgaliti dri ni ànya rigyesi iyi.” 12 'Dooko dri'bai zayitadrite ekye: “Be ämäri ŋga kwoi logone ago ämäri ŋga aza olene ni ànya rigyesi te i'do. Màyena ndi oso nyatabe 'do ronye.”

Ndi mäzi kohanii te, ago matate dri'bai se koyeyi ta ono be ri ruäṛune taoyene oso ànya ko'bayi ta be ronye. 13 'Dooko mokovo Boŋgo uvuuvu maro kpate ago matate makye: “Mi'ba Lu kokovo 'dicini se käti tao'ba ono kote ni zo ndaro ndi ŋga modo ndaro robe yasi. Mi'ba okovo ndana ago nda ka'do ŋgaaza ako.”

Yai'dwe Nemaya ro

14 Ndroa 'butealo foritu se maribe wari'ba ro wari Yuda roya ana si, eto ṛoni ndroa 'buteritu oriro 'Bädri'ba Aretakerekesa ro rosi sagwo le ndroa 'butenätu foritu ndaro roya, ca ma modo kode 'didiri maro, nya ŋga kote parata ŋgaonya ro wari'ba ri si. 15 Wari'bai se käti ni märi kai 'bayi ŋgaläŋgyi diŋgyiṛiro te lidri dri, ago ruyi ŋgaonya ndi vino be te ndi mo'di 'butesu be ondoro ni lidri rigyesi. Ca ruindu'bai ànyaro ezayi lidri te. Oko maye kote inye tana muturi Lu tawi. 16 Ma'ba ma te tiṛi obene mbara cini si, ago märu gyini aza kote märi. Losioye'bai cini maro dro'beruyite tiṛi obene. 17 Ndrani 'do drisi ma ŋgaonya lidri kama alo 'butenji (150) be, Yudai ndi dri'bai be, ndi tro ànya se kikyiyibe amare ni tu'dei se gbikyi ama lomvosi kai yasi yibe. 18 Ŋgaonya se abe la'dina tu alo si 'daŋgo alo, timele kadokado njidrialo; ndi täu amba be, ago ondoalo u'du 'bute si vino beti toto cini orivoya. Caoko meji ta kote ta parata ŋgaonya ro se aba be ozone wari'ba ri 'do ta tana mänite ŋgaläŋgyi orivoya amba lidri ono dri.

19 Miyi ta a'done yauni be mari Äye Lu maro ta takado se mayebe lidri ono ri ono ta.