Nemaya 1 - The Holy Bible in Moru (BAIBOLO ALOKADO) (MB)

1 Ono orivoya ni tase Nemaya ŋgwa Akalia ro Koyebe owo.

Ta Nemaya ro ta Yerusalema rota

Imba Kiselevu rosi, ndroa 'buteritu si, 'dooko ma Nemaya orivoya 'bakici 'desi Susa ya. 2 Anani alo aza ädrupii maro ro, esate lidri azaka be ni Yuda yasi; meji ànya te ta Yerusalema rota ndi Yudai se kopayi vobe ni vomidiro Babelona yasi robe. 3 Ànya itiyitate märi ekye, 'dise cini kopayi vobe ago koriyibe wari ya kai orivoya rriti 'desi ya ago driupi ya. Otoga tiṛi Yerusalema ro kpate vuru, ago dereŋwa nai asi za te. 4 Ondro meri tase ono te oko marite vuru, ago miliyite.

Miliyite u'duna amba, ago mugu akpa te. Maye mätu te Lu vo'buyakuru ro ri makye: 5 “Äye OPI Lu vo'buyakuru ro, mi orivoya Lu 'desi para ago orooro ro, mise nyäti tao'baro miro te ndi ŋgalu äduako miro be ànya se kuluyi mibe ago kayibe ota miro ätina ono ri. 6 Nyeri ma ago mindre vo mädri. Nyeri mätu ma ruindu'ba miro ro se mabe oyena miri kitu si ago kpa ŋgäkyi si ta ruindu'bai miro lidri miro Yisaraele ro rota ono. Ma takozi eṛo tana ama lidri Yisaraele ro ono màye takozi te mi lomvo. Zutui maro ndi mabe màye takozi te. 7 Màye tate koziro milomvo, ago mäti tase mita ama be oyene ono kote, ndi ota miro se nyozobe ämäri ruindu'ba miro Musa si ono kote. 8 Miyi ata se nyata tana be ruindu'ba miro Musa si 'do, se mikye ‘Ondro ka'do ami lidri Yisaraele ro nyà'dote ta'diriako märi, meperena ami ndi tu'dei azaka lakosi. 9 Oko ondro ka'do nyègote mare ago nyä̀ti ota maro te ago mìye tase mata ami be sina 'do te, 'dooko mologona ami 'da kovole vose manjibe ma mätuza kigye 'do ya, ondro epere ami gica ädu 'bädri ro yasi owo.’

10 “OPI, ànya orivoya ruindu'bai miro ago lidri miro, se mipa ànya te mbarapara miro ndi aṛi be si. 11 Äye Opi nyeri mätu ma ruindu'ba miro ro ndi mätu ruindu'bai miro se koleyibe mi orone robe. Nyozo kandrakado ma ruindu'ba miro ri ondro, ago mi'ba ya 'bädri'ba ro kuni malomvo.”

Tu kai si ma orivoya vino ozo'ba 'bädri'ba ro.