O'de Ninewe ro
1 Ninewe, kyila'baazii ikyite mi gotane!
Mira lidri vo ŋga gagaro yasi!
Mikwa vo liti drisi!
Miso agoago.
2 (OPI ka oye 'desi zelevoi Yakoba ro vo logone ago 'desi Yisaraele ro, tana kyila'baazii topai ŋga ànyaro te ago enjiyi kono ànyaro te.)
3 Ŋga 'di gagaro kyila'baazii anyaro ro orivoya okaro
ànya kayi boŋgo okaro osona ayani.
Arabia kyilaro ànyaro betina oso leko asi ro ronye;
ondro ara ànya te ŋga gotane owo.
Farasii ànyaro ka ugu ceke'de usi!
4 Arabia kyila ro nde vo te litiŋwai cini drisi,
ka ugu la'be goro 'bakici ro yasi.
Ànya ka leko oso asi gala ro ronye
ka vo osi oso sionyi 'bu ro ronye.
5 Äzi dri'bai kyila'bai robe;
ànya a'doyi ro patipatiro oyivoya.
Ŋga gota'bai muyite ndrindri tiṛi lomvo
ago eŋgayi ŋga 'di gagaro te kuru tiṛi dri.
6 Dereŋwai golo drisi äpite uŋbo;
lidri zo'desi miri roya te turituriro.
7 Äru toko 'bädri'ba rote ago ugute midiro;
ruindu'bai anyaro ndiriŋwa ro kayi liyi oso tu'bu ronye
ago kayi ugu kätäti ànyaro o'bi tusu si.
8 Lidri Ninewe ro laba oso koro
se gyina kereṛobe kabe udi 'do ronye!
Abe ca otre ekye: “Nyèdre! Nyèdre!”
caoko alona aza eza mi kote.
9 Nyòtopa mo'di!
Nyòtopa logo läguläguro!
ŋgadriamba twi 'bakici ro zevona kyeko!
10 Epere Ninewe te, a'dote vo awi ro,
te tandroro!
Agoago kyete;
kayai kate lä'bi, mbara kyete;
lomvo cini te lä'bilä'biro
mi cini todrate.
11 Kugyi ibi ro gaŋwaro,
vose ibi ŋgwà kabe ori kigye.
Vose ibi kabe ŋgwà iro eca kigye londroro 'do.
12 Ibi si ŋgaonya te ago towate amba ŋgwaŋwà ndi toko anyaro be ri;
luwi iza te twi kugyi anyaro ya.
13 OPI Mbaraekye ekye: “Ma orivoya kyila'baazi miro Ninewe! Mazana arabia cini miro 'da. Utufuna kyila'bai cini miro 'da kyila ya, ago märuna ŋgacini se mirube ni azii rigyesi 'do 'da. Ago erina ata lazo'bai miro ro ko tona.”
© The Holy Bible in Moru © The Bible Society in the Sudan, 2000