Maika 1 - The Holy Bible in Moru (BAIBOLO ALOKADO) (MB)

1 OPI atate Maika, se ni 'ba 'desi Moreseta yasi ono ri tu 'dimiri. Yotama, Aza, ago Ezekia 'bädri'bai Yuda ro rosi. Nda ka'da tase cini kwoi te Maika ri ta Samaria ndi Yerusalema be rota.

Liyi ta Samaria ndi Yerusalema be rota

2 Nyèri ta ono, ami tu'dei cini ono;

nyèri ta ono, ami se cini nyàbe ori 'bädri ya ono!

OPI Mbarapara edrena ta 'da ami lomvo.

Nyèri! Nda ka ata ni Yekalu alokado ndaro yasi.

3 OPI ka eziikyi ni vo alokado ndaro yasi;

nda efona 'da vuru ago abana 'da votoŋgo drisi.

4 'Dooko 'bereŋwai alana 'da nda zele

oso epekyiri asi ya ronye;

ànya udina 'da vodelero yasi

oso gyi kabe udi vuru ni lutui drisi 'do ronye.

5 Tase cini ono a'dona ndi inye ta takozi zelevoi Yakoba ro rota ago ta takozi lidri Yisaraele ro rota. Takozi zelevoi Yakoba ro roni e'di ya? Inye'do ṛo ko Samaria ya? Ago inye'do takozi zelevoi Yuda ro roni e'diya? Ṛo ko Yerusalema ya? 6 Ta'dota OPI ekye: “Ka'do inye ma'bana Samaria 'da turu'du ro 'bädri leewero ya, ago vo doŋgo kono ro kyi'diro. Madana 'boloto kuniŋwà 'bakici ro ro 'da vodelero ya, ago mutupina kotopa 'bakici ro 'da. 7 Utufuna lui edeedero cini anyaro 'da jinyijinyi, ŋgase cini ozobe takozi oyeza yekalu anyaro ya 'do azana 'da asi si, ago lui edeedero cini anyaro ro eperena 'da. Tana Samaria ezi ŋgase cini kwoi te lui awi mätuzana, ka'do inye kyila'baazii anyaro uŋgyina anya 'da lozo mätune vo aza ya.”

8 'Dooko Maika atate ekye: “Ta ono ta, miliyina 'da ago ma'bena kuku 'da. Mabana 'da pa awi ro ago bägyuluro. Mogbona 'da oso koba ronye ago miliyina 'da oso aricoroi ronye. 9 Tana laza Samaria ro unina ko ozwane, pereruna 'da le Yuda ya ago ŋgapere osana kpa 'da le dereŋwai lidri maro ro Yerusalema ya ya?”

Kyila'baazi Kate Esa Yerusalema ya

10 Nyìti ta ama opero ṛe ko Gata ya, nyìliyi ko cu alona. Lidri Bete Leafera ro, nyoŋgoṛi andivo amiro durufu ya Beti Leafera ya tausu ka'daza! 11 Ami lidri Safira ro, nyugu oyi driupiro ago bägyuluro. Ami se nyàbe ori Zanana ya, se nyojo ko efone ni 'bakici yasi 'do. Ondro nyèri liyi lidri Betezele ro rote oko, mìnina ndi anjioko ruda'dovo i'do ämiri lau. 12 Tana lidri Marota ro ka ŋgaopa kote turi amba si, tana OPI ezi rriti te lototi Yerusalema lomvo. 13 Nyèmbe ko'di farasii ro arabiai kyila ro lomvo, ami lidri Lakisa ro. Tana mìsote takozi Yisaraele ro voro ago mi'ba Yerusalema te takozi oyene. 14 Ka'do inye, lidri Yuda ro, mìye mede lidri Moreseta Gata ro ri. 'Ba 'desi Akeziba ro odona 'bädri'bai Yisaraele ro 'da.

15 Ami lidri Maresa ro; OPI ezina kyila'baazi 'da kyila oyene ami be. 'Bädri'bai 'desi Yisaraele ro oyina 'da Adulama ya. 16 Lidri Yuda ro, mìvu drî amiro kuṛä nyòtola 'bi amiro ta ŋgwai se nyùlube iyi rota. Mìvu drî amiro kuṛä oso koyi ro ronye, tana äruna ŋgwà amiro 'da midiro ni ami resi.