Ta Ŋgaembaro Zutui ro
(Marako 7:1-13)1 'Dooko rukä Parusii ro ndi miemba'bai Ota robe ikyiyite ni Yerusalema yasi Yesu re ago ejiyi nda te ekye: 2 “Tana e'di taeri'bai miro royi ta ŋgaembaro se zutui amaro embabe ko niya? Ànya joyi drí ànyaro kote käti ŋgaonyaza!”
3 Yesu zatadrite ekye: “Ago tana e'di miro Ota Lu ro ko ago nyà oso ta ŋgaembaro modo amiro ro vo niya? 4 Tana Lu atate ekye: ‘Miro täpi miro ndi endre miro be’, ago ‘nda se aza kabe täpi ndaro kode endre ndaro otrina beṛo ufune.’ 5 Oko nyà 'diemba mìkye ondro 'diaza ka'dote ŋga aza be nda unina ndi täpi ndaro kode endre ndaro opane sina, oko nyà ata mìkye: ‘Ono orivoya Lu ro’, 6 ko ndäri täpi ndaro orone liti ono yasi. Nyùsu tase Lu kabe atana kote, tana mìle osone ta ŋgaembaro modo amiro ro vo ayani. 7 Ami orivoya miomba'bai! Tase Yesaya käŋgube ta amiro ta ana, ta ndaro orivoya ŋgye!
8 ‘Lu atate ekye, lidri kwoi, kayi ma oro toto kala ànyaro si,
oko endaro ya ànyaro orivoya lozo ni mare si.
9 Mätu oye ànyaro märi kadona i'do,
tana ànya kayi ŋgaemba ota se lidri ko'babe ni si, osoago ànya orivoya ota maro!’ ”
Ŋgase Kabe Lidri O'ba Undiro
(Marako 7:14-23)10 'Dooko Yesu zi lowa te ndare ago atate ànyari ekye: “Nyèri ago mìni tana! 11 Ŋgase kabe oci lidri ya kala yasi ka koni lidri o'ba undiro; oko, ŋgase kabe efo ni ya yasi kani nda o'ba undiro.”
12 'Dooko taeri'bai ikyiyite ndare ago atayite ekye: “Inye'do mini gi'da tase nyatabe ono 'ba Parusii te a'done tusuro ya?”
13 Yesu zatadrite ekye: “Ŋgase cini Täpi maro vo'buyakuru ya kikyi'di kote ni ono eŋgyena 'da vuru. 14 Nyòlo'be mi ko ta ànyaro ta! Ànya orivoya lepe'bai miako miako'bai ro; ondro ka'do mano miako'ba aza kani miako'ba azi lepe, ànya riti o'denayi ndi 'bu ya.”
15 Petero atate ṛo ṛeṛe ekye: “Nyedretazevo ata ono ro ämäri.”
16 Yesu atate ànyari ekye: “Ami drigba kpa tauniako azii ronye. 17 Mìni ta ono tazevona koya? Ŋgase aza kabe oci ya lidri roya kala yasi cite kävuye ya ago go efote tesi. 18 Oko ŋgase kabe efo kala yasi ka efo ni ya yasi, ago kwoi ni ŋgase kabe lidri o'ba a'done undiro owo. 19 Tana ni ya ndaro yasi tavousu undiro ka efo se kani nda o'ba 'di ufune, taoyene toko kode ago drisi, ago ŋga azaka undiro loyene; ŋgatopane, kowe ogane, ago azii kyerene. 20 Kwoi ni ŋgase kabe lidri o'ba undiro owo. Oko ŋgaonyane teinye drí miro ojoako oso ànya kayibe atana ämiri beṛo ojone 'do ronye; 'do 'ba lidri ko undiro.”
Taoma Toko aza ro
(Marako 7:24-30)21 Yesu e'be vo ana te ago oyite wari se loto 'bakici Tura ndi Sidona robe lomvo ana ya. 22 Toko aza Kanana'ba ro se koribe wari ana ya ana ikyite ndare. Anya trete amba ekye: “Ŋgwa Dawidi ro! Mi'ba ya miro kuni malomvo! Tana ŋguti maro orivoya demona be ago anya ka rueza koziro.”
23 Oko Yesu ata ta aza kote anyari. Ago taeri'bai ndaro ikyiyite ndare ago lo'bayirute ndäri ekye: “Mi'ba anya koyi! Tana anya ka ezi totre kporo be ama vo!”
24 'Dooko Yesu zatadrite ekye: “Ezo ma te toto timele se kujebe kai re, se ni lidri Yisaraele ro.”
25 Oko toko ana ikyite ago 'dete nda pa. Anya atate ekye: “'Desi, mipa ma!”
26 Yesu zatadrite ekye: “Ko kado ŋgaonya ŋgàga ro urune ago ovone kokyei ri.”
27 Anya zatadrite ekye: “'Desi, 'do ṛo taŋgye yi; caoko ca kokye nya ŋgase ke'bebe se kabe layi ni tara'biza 'desi anyaro ro drisi 'do ndi.”
28 Ta'dota Yesu zatadri anyaro te ekye: “Mi orivoya toko taomaekye yi! Ŋgase milebe ono ayena ndi miri.” Ago dori ede ŋguti anyaro te ndriŋwa.
Yesu Ede Lidri Amba te
29 Yesu e'be vo ana te ago oyite Fofo Galilaya ro kala. Nda tute lutu dri ago rite vuru. 30 Lidri lowaro ikyite ndare, ànya eziyi ka'boi, miako'bai, gboto'bai, tuṛui, ndi lidri amba adravo azaka be te, ànya 'bayi ànya te Yesu pa; ago nda ede ànya te. 31 Lidri kondre tuṛui te atavoya, ede gboto'bai te, ka'boi kate ugu aba, ago miako'bai kate ugu voondre oko ànya laroyite; ago ànya räṛuyi Lu Yisaraele rote.
Yesu Ozo Ŋgaonya te Lidri Ndrani Kutu Su (4,000) drisi ri
(Marako 8:1-10)32 Yesu zi taeri'bai ndaro te ndare ago atate ekye: “Ma tusuro ta lidri kwoi rota, tana ànya riyite mabe u'duna te nätu ago yauono ànya te ŋga aza ako onyane. Male ko ànya o'bane oyine teinye ŋgaonya ako, tana ukyi inini ufu ànya 'da liti ya oyivoya 'bäru.”
33 Taeri'bai ejiyi nda te ekye: “Mùsuna ŋgaonya amba ni eŋwaro vocowa ono ya onyane lowa ono riya?”
34 Yesu ejitate ekye: “Ami orivoya duŋguṛu ambata robe moda ya?” Ànya zayitadrite ekye: “Njidrieri, ndi ti'bi giṛiŋwa fereŋwa be.”
35 Ta'dota Yesu ta lowa te orine vuru gyini dri. 36 'Dooko nda ru duŋguṛu ambata ro se njidrieri ana te ndi ti'bi se ana be, ozo aro'boya te Lu ri, wa ànya te, ago ozote taeri'bai rigyesi, ago taeri'bai ozote lidri ri. 37 Ànya cini nyayite ago ojo ànya te. 'Dooko taeri'bai otoyi 'bolotona se ke'bebe ana te koṛiga na njidrieri twitwi. 38 Oti mànoago se konyabe ana ro orivoya kutu su (4,000), ati 'ditoko ndi ŋgàga be ko.
39 'Dooko Yesu pere lidri te, cite toŋbo ya, ago oyite wari Magadana roya.
© The Holy Bible in Moru © The Bible Society in the Sudan, 2000