Karamai Mätu ro
1 OPI atate Musa ri ekye: 2 Nyata lidri Yisaraele ro ri mikye: Kwoi ni tu karama ma Opi ro, ämiri tana ayone tu kalakoto ro mätu oyero. 3 Ämiri losi oyene u'du njidrialo ya, oko u'du njidrieri orivoya, anjioko Sabata, se ni tu loliro. Tu kalakoto mätu oyero mìye losi aza ko tu 'do ya alona. Sabata orivoya OPI ro orivo cini amiro yasi. 4 Kwoi ni tu Karamai Opi ro kalakoto ro mätu oyero se tana ayone tuna se aka'dabe si.
Tu Lävu Odra ro ndi Ambata Loŋgaako be
(Oti 28:16-25)5 Karama Lävu Odra ro ro oyene OPI ri, ka eto tandrole u'du 'butealo fosu imba käti rosi. 6 U'du 'butealo fonji imba gialo 'do rosi karama ambata loŋgaako ro etona gwo, ago beṛo ämiri ambata loŋgaako onyane u'duna njidrieri. 7 U'du käti tu kwoi roya ämiri kalakotone mätu oyene; ago ko ämiri losi amiro tu cini ro oyene. 8 Nyòzo ŋgapäṛi amiro ŋgaonya ro OPI ri u'duna njidrieri. U'du njidrieri na 'do si ämiri ogone kalakotone kpa to'di mätu oyene, oko ko ämiri losi amiro tu cini ro aza oyene.
9 OPI atate Musa ri ekye: 10 Nyata lidri Yisaraele ro ri mikye ondro mìsate 'bädri se OPI kabe ozona ämiri ya ago mìlo inya jalia amiro rote oko, nyèzi drina käti 'do kohani ri. 11 Nda ozona gwo ŋgapäṛi ro OPI ri, 'dooko alena ami ndi. Kohani na 'do ri ozone u'du gi Sabata vosi 'do si. 12 Tuse nyàbe ŋgapäṛi amiro inya ro ozona sina 'do si, kpa ämiri timelegogo se ndroa na be alodi teinye mämbiako 'do ozone ŋgapäṛi ozaro ro OPI ri. 13 Tro ŋgapäṛi inya robe kpa kyira koma na ritu dro'bedro'bero ido ice ido ro rosi ozone ŋgapäṛi ŋgaonya ro ro. Tana tägyi ŋgutruro ŋgapäṛi ono ro orivoya ndeṛindeṛiro OPI ri. Kpa ämiri 'boṛo alodi vino ro ozone ŋgapäṛi vino ro ro. 14 Mìnya inya to'di ko cu alona, luru ro, lusilusiro kode o'beo'bero ambata ro, madale nyèzi ŋgapäṛi ono lutu Lu amiro ri. Ota ono orone 'duro le zelevoi cini amiro ri ori cini amiro ya.
Karama Jalia ro
(Oti 28:26-31)15 Miti u'du njidrieri perena njidrieri nyeto ni u'du käti Sabata se nyezi ŋgapäṛi lämu'duro drî inya ro robe sina OPI ri 'do ya. 16 U'du 'butenji ya, anjioko u'du alo se Sabata njidrieri na 'do ro vosi 'do si; ämiri ŋgapäṛi inya to'di ro aza ezine OPI ri. 17 Be katidri alo alo ri ambata ritu ezine ŋgapäṛi lämu'du ro. Ambata alo alo o'bene koma ritu kyira rosi o'bene loŋga si ŋgapäṛi inya drî käti ro ro Opi ri. 18 Ànyari timelegogoi njidrieri se ndroa na dri alodi teinye mämbiako iyi ezine ambata be, ago 'daŋgo ombato'diro alodi, ndi indri ritu be. Ànyari ozone ŋgapäṛi ozaro ro OPI ri, tro ŋgapäṛi inya ro ndi ŋgapäṛi vino robe. Tana tägyi ŋgapäṛi ono ro orivoya kadoro OPI ri. 19 Kpa ämiri tego alodi ozone ŋgapäṛi ro ta takozi rota, ago timelegogoi ritu se ndroa na be alodi iyi ozone ŋgapäṛi ro ta rumora rota. 20 Kohani ri ambata inya drî käti ro ndi timelegogoi ritu be ozone ŋgapäṛi lämu'du ro OPI ri kohanii ri. Tana ŋgapäṛi kwoi orivoya alokado Opi ri ozone Kohani ri. 21 Tuna gi alo 'dosi ämiri ta ayone, ago ämiri kala otone mätu oyene. Ko ämiri losi amiro tu cini ro oyene. Ota ono ätine ämiri ndi zelevoi amiro be tu cini ya orivo cini amiro yasi.
22 Ondro nyàte jalia amiro ŋgana otona ni ämvu amiro yasi oko, ko ämiri inya se sidri ämvu ro yasi olone, ago kpa ko ämiri ogone vole na uṛine; be ämiri e'bene lemeri'ba ndi 'diatra robe ri. Ma ni OPI Lu amiro owo.
Karama Ndroa To'di ro
(Oti 29:1-6)23 OPI atate Musa ri ekye: 24 “Nyata lidri Yisaraele ro ri mikye: U'du käti imba njidrieri ro; be a'done tu lämu'du loliro ämiri, tu kalakoto ro nyìkyi voaloya mätune taoyiro cekuṛe ovo si. 25 Mìye losi amiro tu cini ro ko ago nyòzo ŋgapäṛi ŋgaonya ro Opi ri.”
Tu Rudro'be ro
(Oti 29:7-11)26 OPI atate Musa ri ekye: 27 “U'du 'butealo imba njidrieri ro orivoya tu takozi ana royi, be a'done tu mätu oyero yi. Mìnya ŋga aza ko tuna 'do si alona, oko nyòzo ŋgapäṛi ŋgaonya ro OPI ri. 28 Mìye losi aza ko tu gi 'do si; tana 'do orivoya tu takozi onaro yi takozi amiro onaza Opi Lu amiro kandrasi. 29 'Dise konya ŋga te tu gi 'do si a'done ndäri alo aza lidri Lu ro te i'do. 30 Ago ondro ka'do 'diaza koye losi te tuna gi 'do si, mäfuna nda ndi ṛi. 31 Ämiri losi oyene i'do. Ono orivoya ota yi ämiri ndi zelevoi cini amiro be orivo cini amiro yasi. 32 Tu ono a'dona ämiri tu loli ro lämu'du ro; Ko ämiri ŋga aza oyene kigye etoni tandrole u'du njidriesu imba rosi le tandrole u'du 'butealo rosi, be ämiri loline.”
Karama Kpakpa ro
(Oti 29:12-40)33 Ago OPI atate Musa ri ekye: 34 Nyata lidri Yisaraele ro ri mikye Karama Kpakpa ro oyene Opi ri etoni u'du 'butealo fonji imba njidrieri rosi oyene u'duna njidrieri. 35 U'du käti u'du kwoi ro orivoya tu mätu oyero voaloya ago mìye losi amiro tu cini ro ko. 36 Ämiri ŋgapäṛi ŋgaonya ro ozone Opi ri ondoro u'du njidrieri 'do ya. U'du njidriena si oko nyìkyi kpa to'dina voaloya mätu oyene ago nyòzo ŋgapäṛi ŋgaonya ro Opi ri. 'Do orivoya tu mätu oyero, beṛo ko ämiri losi oyene.
37 Kwoi ni tu karamai mätu ro OPI ro, se ämiri tana ayone tu kalakoto ro mätu oyero ago ŋgapäṛi ŋgaonya ro, ŋgapäṛi ozaro, ŋgapäṛi inya ro, ŋgapäṛi tori oloro ndi ŋgapäṛi vino robe ozone sina Opi ri owo, oso se alebe oyene tu ŋgyena si 'do ronye. 38 Karamai kwoi ri a'done Sabata cini be, ŋgapäṛi tao'ba si amiro ro, ndi ŋgapäṛi dritai ro se nyàbe ozona OPI ri 'do be kpa a'done.
39 U'du 'butealo fonji imba njidrieri rosi, ondro nyòkoto ŋga jalia ro ämvu amiro rote oko, ämiri karama Opi ro ono oyene u'duna njidrieri, etone u'du 'butealo fonji imba njidrieri rosi. U'du kätina ndi u'du njidrierina be ri a'done tu lämu'du loliro. 40 U'du käti 'do si ämiri doŋgo kadopara topine ni ice na drisi, mìŋgo gwoṛi ice ndiro ro ndi gwoṛi ice kyibi be ro ndi ice azaka robe, mì'de gwo karama mätu ro OPI Lu amiro ro etone u'duna njidrieri. 41 Ämiri karama se ono oyene u'duna njidrieri ndroa alo ya. Oyene ämiri ndroa njidrieri si ago ätine ota ro zelevoi amiro ri rriro. 42 Beṛo lidri cini Yisaraele ro ri orine kpakpaŋwà yasi u'duna njidrieri; 43 tana zelevoi amiro kuniyi tana robe anjioko ma'ba lidri Yisaraele rote orine kpakpaŋwà yasi tuse molofo ànya be ni Ezipeto yasi ana si. Ma ni OPI Lu amiro owo.
44 Ta'dota Musa ayota karamai mätu ro Opi ro tana te nonye lidri Yisaraele ro ri.
© The Holy Bible in Moru © The Bible Society in the Sudan, 2000