Yosua 12 - The Holy Bible in Moru (BAIBOLO ALOKADO) (MB)

'Bädri'bai se Musa Kopebe Ṛe

1 Kwoi ni 'bädri'bai se lidri Yisaraele ro kopebe ṛe ago kuruyi wari ànyaro 'buzele Golo Yaradene roya, eto ṛoni Vodelero Arenona roya le 'Bereŋwa Eremona roya ndi wari 'buzelesi Araba robe owo. 2 Alona ni Siona, 'bädri'ba Amora'bai ro se mirivote Esebona ya. Miri 'bädri ndaro ro eto ni Aroeri ya, sidri Vodelero Arenona roya, ndi 'bakici se kitoriya vodelero ro ya ana be sagwo le Golo Jaboka ya, kishwedri Amona be ya; se loci telesi Gilada ro kigye. 3 Kyi loci Vodelero Yaradene ro ni 'buzele Fofo Galilaya ro yasi le Beta Jesimota ya (Gyi'desi Täyiro roya) ago le ukyine 'Bereŋwa Pisega pa.

4 Ànya peyi Ogo 'bädri'ba Basana ro kpate ṛe, se ni alo aza lidri Refaima ro se ke'bebe owo, nda mirivote Asetarota ndi Edrei be ya. 5 Nda mirivo te 'Bereŋwa Eremona, Saleka, ndi wari Basana ro be yasi sagwo le kiswedri Gesura ro Maka be ya, ndi telesi Gilada robe, sagwo le wari Siona 'bädri'ba Esebona ro roya.

6 Musa ndi lidri Yisaraele robe peyi 'bädri'bai se ritu kwoi te ṛo käti ṛe. Ago Musa ruindu'ba OPI ro, ozo wari ànyaro te 'bakalai Rubena ndi Gada be ndi telesi 'bakala Manase ro robe ri.

'Bädri'bai se Yosua Kopebe Ṛe

7 Yosua ndi lidri Yisaraele robe peyi 'bädri'bai se ogone wari Yaradene ro aŋgoyasi iyi te kpeye ṛe, eto ṛoni Balegada se vodelero Lebanona roya le 'Bereŋwa Alaka ya loto Edoma lomvo. Yosua lonyi wari se ono te 'bakala Yisaraele ro ri ago ozote 'duro ànyari. 8 Vose ozobe ànyari ono loci 'bädri lutu ro, vodelero, vodelero Yaradene ro ndi vodelero lutu pasi be, vodelero aŋgoyasi ndi 'bädri se awiro ogone ŋgäriŋwadrisi be kpeye kigye. Sedri wari kwoi orivoya 'bädri Ete'bai, Amora'bai, Kanana'bai, Pereza'bai, Iva'bai, ndi Jebusa'bai be ro. Lidri Yisaraele ro peyi 'bädri'bai 'bakici kwoi ro te ṛe: 9 Yeriko, Ai (Se loto Betele lomvo ana), 10 Yerusalema, Eberona, 11 Jaremuta, Lakisa, 12 Egelona, Gezera, 13 Debira, Gedera, 14 Orema, Arada, 15 Libena, Adulama, 16 Makeda, Betele, 17 Tapua, Efera, 18 Afeka, Lasarona, 19 Madona, Azera, 20 Simerona Merona, Akesafa, 21 Tanaka, Megido, 22 Kedesa, Jokeneama (se orivoya Karemela ya), 23 Dora (se orivoya Natatadora ya), Goima (se orivoya Galilaya ya), 24 ndi Tiraza be, vo 'bädri'bai ro cini orivoya 'butenätu foalo.