Yoane 20 - The Holy Bible in Moru (BAIBOLO ALOKADO) (MB)

Yesu Efote Ni Avo yasi.

(Matayo 28:1-8Marako 16:1-8Luka 24:1-12)

1 Ṛo kyenoŋboci kyenoŋbo u'du käti u'du njidrieri rosi, vo drigba ṛo uniro oko, Maria Magadalene oyite 'budri dri ago ndre kuni te ereṛite ni 'bukalasi. 2 Anya mute Simona Petero ndi taeri'ba aza, se Yesu kulube re, ago ititate ànyari ekye: “Ànya eweyi Opi teni 'budri yasi, ago mäni kote ànya 'bayi nda te eŋwa!”

3 'Dooko Petero ndi taeri'ba se aza ana be oyiyite 'budri dri. 4 Ànya riti kai ugu umu, oko taeri'ba se ana mute ndrani Petero ri ago sate käti 'budri dri. 5 Nda ändite ago ndre boŋgo 'bilindriro te, oko nda ci kote. 6 Simona Petero esate nda vosi, ago nda cite dori 'budri ya. Nda ndre boŋgo 'bilindriro te orivoya lau, 7 ndi boŋgo se ävu drî Yesu robe sina ana be. Anya ri kote troalo boŋgo 'bilindriro be oko andivona eparute iṛe. 8 'Dooko taeri'ba aza se kosabe käti 'budri dri ana cite; nda ndrete ago mate. ( 9 Ànya niyi taegyi drigba ko se katabe ekye beṛo ndäri efone ni odra yasi.) 10 'Dooko taeri'bai go oyiyite 'bäru.

Yesu Ka'darute Maria Magadalene ri

(Matayo 28:9-10Marako 16:9-11)

11 Maria edrete 'budri lomvo ka ugu liyi. Ondro anya kadri ugu liyi oko, anya ändite ago ndrevote 'budri ya 12 ago ndre malaikai ritu te soyi boŋgo onjero te, riyite vose sedri avo Yesu robe kigye anya ya, alodi drî yasi ago azana pa yasi. 13 Ànya ejiyi anya te ekye: “Toko, nya ugu liyi etaya?” Anya zatadrite ekye: “Ànya eweyi Opi maro te, ago mäni ko ànya 'bayi nda te eŋwa!”

14 'Dooko anya ko'bimite oko ndre Yesu te edrevoya lau; oko anya ni kote ana ni Yesu owo.

15 Yesu eji anya te ekye: “Toko, nya ugu liyi etaya? Nya ugu a'di uṛi ya?”

Anya kusube nda orivoya vo ede'ba owo, ago anya atate ndäri ekye: “'Desi, ondro nyewe nda teni, nyiti tana märi mi'ba nda te eŋwaro, moyi robe nda urune.”

16 Yesu atate anyari ekye: “Maria!”

Anya zamite ndare ago atate kala Ebere si ekye: “Raboni!” (Anjioko Miemba'ba).

17 Yesu atate anyari ekye: “Nyäti ma ko, tana moyi drigba ko kovole Täpi re. Oko nyoyi ädrupii maro re ago nyiti ta ànyari mikye ma te ugu ogo nda se ni Täpi maro ago Täpi ànyaro, Lu maro ago Lu ànyaro ana re.”

18 Ago Maria Magadalene oyite ititate taeri'bai ri ekye indre Opi te ago iti tase nda kitibe anya ri ana te ànyari.

Yesu Ka'darute Taeri'bai Ndaro ri

(Matayo 28:16-20Marako 16:14-18Luka 24:36-49)

19 Te ga liyaro tandrole u'du käti u'du njidrieri rosi, 'dooko taeri'bai kotokalate voaloya käläsi osesi ndindi, tana ànya te turi turiro ni drikaca'bai Yudai ro ri. 'Dooko Yesu ikyite ago edrete ànya lako, nda atate ekye: “Taliatokpe ka'do ami yibe.” 20 Ta ono ata vosi, nda ka'da drí ndaro te ànyari ndi lama ndaro be. Taeri'bai a'dote twi riyä be Opi ondrevoya. 21 Yesu atate ànyari kpa to'di ekye: “Taliatokpe ka'do ami yibe. Oso Täpi kezo mabe ronye, mazo ami kpa inye.” 22 'Dooko nda lawate ànya dri ago atate ekye: “Nyà'do Tori Alokado be. 23 Ondro nyà takozi lidri ro e'be, e'be ànya ṛote, ondro nyè'be ànya ko, e'be ànya ko.”

Yesu ndi Toma be

24 Alo taeri'bai 'butealo foritu ro Toma (äzite Lezo), i'do ànya yibe tuse Yesu kikyibe ana si. 25 Ago taeri'bai azi ititate ndäri ekye: “Màndre Opi te!”

Toma atate ànyari ekye: “Ondro ka'do mandre mberevo ŋbaṛa ro drí ndaro yasi ko ago ma'ba driŋgwa maro ko mberevo se kai ya ago ma'ba drí maro ko lama ndaro ya, mama ko.”

26 Ago u'du njidrieri vosi oko taeri'bai te voaloya zo yasi oko, ago Toma orivoya ànya yibe. Ase käläsii te, oko Yesu ikyite ago edrete ànya lako ago atate ekye: “Taliatokpe ka'do ami yibe.” 27 'Dooko nda atate Toma ri ekye: “Mi'ba drí miro noŋwa, ago mindre drí maro; ago nyozo drí miro ago mi'ba anya lama maro ya. Nya'do ko wiriwiriro, oko mima ta!” 28 Toma zatadri ndaro te ekye: “Opi maro ago Lu maro!”

29 Yesu atate ndäri ekye: “Mi'debe omane ono tana mindre ma te ya? Ànya se kabe taoma teinye ma ondreako ni kado.”

Takaci Buku ono ro

30 Taeri'bai ndaro milesi Yesu ye talaro ro azaka amba te se egyi tana kote buku ono ya. 31 Oko egyi tase kwoi te tana mìma ta robe anjioko Yesu ni Mesiya, Ŋgwa Lu ro, ago ta taoma amiro ro nda ya si nyà'do robe adri be.