Yeremaya 9 - The Holy Bible in Moru (BAIBOLO ALOKADO) (MB)

1 Aba drî maro a'do gwo koro gyi ro

ago mi maro a'do gwo miendre be amba,

tana miliyi robe kitu ndi ŋgäkyi cini be si.

Ta lidri maro se utufube kwoi rota.

2 Aba ma'do gwo vo aza be oriza vo rriri se siŋwa ro ya,

'dooko me'bena lidri maro go

ago ma'dona gwo pere ni ànya resi.

Tana ànya cini orivoya ta'diriako,

ago gboko driozo'bai ro.

3 Ànya kayi ladra ànyaro ede nja oso kusu ronye kowe ogaza;

ta'diriako teni ndra taŋgye risi wari ono ya.

OPI ka ata ekye:

“Lidri maro kayi takozi oye azivo azivo,

ago niyi ma kote Lu ànyaro ro.”

4 Beṛo 'dicini ri a'done miomba be ni bereazi ndaro ri,

ago ko taoyine ädrupi ndaro ya;

tana vo ädrupii cini ro orivoya 'diodo'bai ro.

Ago 'dicini ka bereazi ndaro kyerena.

5 Vo ànya cini ro kayi bereazii ànyaro odona,

ago 'diaza iti taŋgye kote;

Ànya embayi ladra ànyaro te kowe ogane

ànya kayi takozi oye

ago niyi kote drietane.

6 Ànya kayi siomba oye azivo azivo,

ago kayi ŋgaodo oye azivo azivo.

OPI ka ata ekye lidri ndaro gayi nda zo.

7 Tana ta'doro OPI Mbaraekye ka ata ekye:

“Mäwäṛina lidri maro 'da ago mojona ta ànyaro 'da.

Tana mayena e'di, ta ànyaro ta ya?

8 Ladra ànyaro orivoya oso ätu se äṛi be iyi ronye;

kayi alo koweoga ayani.

'Dicini ka takado ata ayani oriazi ndaro ri kala si,

oko ya ndaro nda ka abari o'be ayani anyari.

9 Inye'do ma OPI märi ànya ezane ta ŋgase kwoi rota te i'do ya?

Inye'do märi votaro logone tu'de anya oso nonye ono rri i'do ya?

Ma, OPI, matani.”

10 Matate makye: “Ma'bena kuku 'da ta 'bereŋwai rota

ago miliyina 'da ta lowoi rota,

tana ànya te awi,

ago 'diaza aba kote ànya yasi.

Eri kporo ti ro kote tona;

arii ndi koronyai cowa robe muyite ago oyiyite.”

11 OPI ka ata ekye: “Ma'bana Yerusalema 'da a'done tandro ro ago turu'du ro,

orivo ro kobai ri;

ago ma'bana 'bakicii Yuda ro a'dona 'da tandroro

'diaza ri orine kigye i'do.”

12 Mejitate makye: “OPI, a'di ni tavouni be ndra ta ono tazevona unine ya? Nyedre tazevona a'di ri tana nda kiti tana robe azii riya? Tana e'di wari ono a'do gwo awi ago rriro oso vocowa ronye, se 'ba 'diaza aba kote kigyesi niya?”

13 OPI zatadrite ekye: “Tase ono ko'debe a'done tana lidri maro e'beyi ŋgaemba se mozobe ànyari ono te. Ànya royi ma kote ago yeyi tase matabe ànyari ono kote. 14 Ànya go a'doyi ro taeriako, ago mätuyi lui awi Bala ro te oso täpii ànyaro kembayi ànya be ronye. 15 Ka'do inye, nyeri ta tase Ma, OPI Mbaraekye, Lu Yisaraele ro ma oye be oyene ono: Mozona ŋgaluru osoekye 'da lidri maro ri onyane ndi gyi äṛi ro be umvune. 16 Meperena ànya 'da tu'dei se ca ànya ca zutui ànyaro keriyi tana ko iyi lakosi, ago mazona kyila'bai 'da ànya dri madale mutufuna ànya lutu kpeye.”

Lidri Yerusalema ro ka Driayo ta Ŋgaopa rota

17 OPI Mbaraekye ka atani nonye ekye:

“Nyùsuta, ago mìzi ruṛuo'be'bai ikyine!

mìzo lazo 'ditoko se kayibe ṛoni ruṛuo'be iyi vo.”

18 Lidri atate ekye:

“Mi'ba ànyari ikyine ndrindri ago ruṛu avo ro o'bane ämäri,

tana miendre koga robe twi mi amaro yasi,

ago mikyiri amaro kudu robe ni liyi ri.”

19 Eri kporo liyi ro te Zaiona ya se ekye:

“Epere vo amaro te tandro ro!

Ama te cu driupiro! Me'be wari amaro te;

tana epere 'ba amaro te riya.”

20 Matate makye:

“Nyèri ta OPI ro, ami 'ditoko,

ago mìga bi ata ndaro erine.

Nyèmba ndiriŋwa amiro ruṛu o'bene,

ago nyèmba bereazii amiro cirionya si.

21 Tana odra kate eci piṛi zo amaro ro yasi

ago ecite zo'desi amaro miri roya;

kate ŋgàga toga litiŋwai drisi

ago kate agoànji toga vo ŋgalogyero yasi.

22 Avo lidri ro lo'dete vo cini yasi

oso tamo se avobe ämvu yasi 'do ronye,

oso inya olo'bai kolo inya te oko kayibe e'bena kovole 'do ronye,

se 'diaza ni kote kotone 'do.

Ono ni tase OPI katabe märi itine owo.”

23 OPI ka atani nonye ekye:

“Ko lidri se tavouni be iyi ri driuŋgyine ta tavouni ànyaro rota,

ca lidri se mbara be iyi ko driuŋgyine ta mbara ànyaro rota,

ca lidri se ŋgadriamba be iyi ko driuŋgyine ta ŋgaamba ànyaro rota.

24 Oko 'diaza kolete driuŋgyine,

ndäri driuŋgyine ondro ka'do nda ni tazevo maro te ago ni ma te,

anjioko ma ni OPI se ŋgalu 'duro,

ta'diri ndi taŋgye be oyena 'bädri ya owo.

Kwoi ni ŋgase tana kabe ma usi owo.

Ma, OPI, matani.”

25 OPI ka ata ekye: “Tu ka oye esane se mezana lidri se cini alote ŋbiṛiro oko oso aloko ŋbiṛiro iyi, 26 Ezipeto, Yuda, Edoma, Amona, Moaba ndi lidri se koribe vorriro siŋgwa ro ya iyi be 'da, se otolo drikyiri ànyaro drina te iyi. Tana tu'dei se cini kwoi alo kote ŋgiṛiro, ago lidri cini Yisaraele ro ätiyi tao'ba maro kote.”