Yeremaya 43 - The Holy Bible in Moru (BAIBOLO ALOKADO) (MB)

Ugu Yeremaya te Ezipeto ya

1 Ma Yeremaya mande taiti te lidri ri, tase cini OPI Lu ànyaro kezo mabe itine ànyari ana. 2 'Dooko Azaria ŋgwa Osaya ro ago Joanana ŋgwa Karea ro ndi lidri se cini azaka mäwu be iyi be atayite märi ekye: “Nya koweoga. OPI Lu amaro ezo mi ko taitine ämäri ekye: ‘Nyòyi ko orine Ezipeto ya.’ 3 Baruka ŋgwa Neraya ro eŋga ya miro ni ama lomvo, tana a'ba ama robe mbara Babelona'bai ro zele ago kutufuyi ama robe kode kuruyi ama robe kamba'bai ro Babelona ya.” 4 Ta'dota ca Joanana ca dri'bai cini kyila'bai ro ca lidri cini royi ota OPI ro se orine wari Yuda roya ono kote. 5 'Dooko Joanana ndi dri'bai cini kyila'bai robe ruyi 'dicini se ke'bebe Yuda ya te, tro lidri cini se kegoyibe ni tu'dei lakosi vose epere ànya be kigyesi ana yasi iyi be; 6 manoàgo, 'ditoko, ŋgàga, ndi ndiriŋwa 'bädri'ba ro yibe. Ànya ruyi 'dicini se Nebuzaradana otaozo'ba kyila'bai ro ke'bebe drikaca Gedalaya ro zele iyi yibe te, ago ruyi Baruka kpa ndi mabe. 7 Ànya royi ota OPI ro kote ago oyiyite Ezipeto ya sayite le 'bakici Tafanesa ya.

8 Lau OPI atate ma Yeremaya ri ekye: 9 “Miŋgyi kuni 'desiro azaka ago mi'ba ànya liti se abebe biliro eciro zo'desi miri roya 'bakici Tafanesa ya ono dri, ago mi'ba Yisaraele'bai kondreyi mi oyevona ya. 10 'Dooko nyitita ànyari mikye ma, OPI Mbaraekye, Lu Yisaraele ro, ma oye ruindu'ba maro Nebukadenezara 'Bädri'ba Babelona ro ezine ndi le vo ono ya, ago nda o'bana gyiti ndaro 'da kuniŋwà se mibebe kwoi dri, ago nda otona boŋgo drî giti ndaro takoro 'da ànya drisi. 11 Nebukadenezara ikyina 'da ago opena Ezipeto 'da ṛe. Lidri se kandrakozi ànyaro todrane adravo kozi si iyi todranayi 'da ni adravo kozi ri, se kandrakozi ànyaro ànya urune uru kamba'bai ro iyi äruna 'da kamba'bai ro, ago ànya se kandrakozi ànyaro ànya tufune tufu kyila ya kwoi utufuna 'da kyila ya. 12 Nda osona asi 'da yekalui lui Ezipeto ro ro dri, ago ozana lui ànyaro 'da kode uŋgyina ànya 'da kamba'bai ro di. 'Bädri'ba Babelona ro ku'duna ŋga cini 'da waṛi ni wari Ezipeto ro yasi oso lekye'ba kabe lifo ku'du waṛi ni boŋgo iro yasi 'do ronye, 'dooko oyina 'da ni nasi liyaro. 13 Nda tufuna kuni alokado gyoroŋgoloro se Elopolisa ya Ezipeto ya ana 'da ago ozana yekalui lui Ezipeto ro ro 'da asi si.”