Yeremaya 31 - The Holy Bible in Moru (BAIBOLO ALOKADO) (MB)

Ego Yisaraele ro 'Bäru

1 OPI ka ata ekye: “Tu aza ka oye esane se ma'dona 'da Lu 'bakalai cini Yisaraele ro ro, ago ànya a'donayi 'da lidri maro. 2 Lidri se kopayivobe ni odra yasi ago iyi usuyi ŋgaopa te vorri ro siŋgwa ro 'do ya ri. Ondro lidri Yisaraele ro kayite vouṛi loliza oko, 3 ma OPI moloforute ànyari ni lozo si. Lidri Yisaraele ro, ondoalo mulu ami tawi ŋgalu 'duro si, ta'doro mugu a'dote 'diriro ämiri. 4 Mago motombana ami 'da kpa to'dina ami lidri Yisaraele ro. Mìgo mìruna gara amiro 'da kpa to'dina ago nyùguna läri oto 'da riyä si. 5 Mìgo nyìkyi'dina kono 'da ämvu kono ro amiro yasi lutui Samaria ro drisi, ago ànya se kayibe kyi'dina iyi njäkyinayi doŋgo na 'da. 6 Tu aza ka oye esane se vookwa'bai uzinayi läzi 'da ni lutui Eperaima ro drisi ekye: ‘Mìŋga mì'de moyi Zaiona ya, OPI Lu amaro re.’ ”

7 OPI ka ata ekye:

“Mìŋgo loŋgo amba riyä si ta Yisaraele rota,

ago mìtre amba ta tu'de 'desi parandra ono rota

Nyàyo ta ago miŋgo loŋgo ekye:

‘OPI pa lidri ndaro te;

lidri Yisaraele ro se e'bebe iyi.’

8 Mezina ànya 'da ni tu'de mä'dudrisi yasi;

ago mokotona ànya 'da ni sidri ädu cini 'bädri ro yasi.

'Dise miako ndi se ka'bo ro iyi be,

'ditoko se kovoro ro ndi se te ti utine iyi be ikyinayi 'da tro.

Ànya egonayi 'da lowa ro.

9 Lidri maro egonayi 'da liyi be,

ugunayi mätu oye 'da ondro mate ezi ànya lepe kovole owo.

Muguna ànya 'da golo se gyi be ya,

liti se biliro yasi se ànya uninayi ko lapane.

Ma orivoya oso täpi ronye Yisaraele ri,

ago Eperaima orivoya ŋgwa kayoŋwa maro.”

10 OPI ka ata ekye:

“Ami tu'dei, nyèri ta maro,

ago nyàyo ata maro 'bädri se lozo le gyi'desi kalasi iyi yasi ekye:

‘Nda se kepere lidri Yisaraele robe ono ogo otona kala ànyaro 'da

ago gagana ànya 'da oso lekye'ba kabe gboko timele ndaro ro gagana 'do ronye.’

11 Monji lidri Yisaraele rote dritairo

ago mapa ànya te ni tu'de se mbaraekye ono rigyesi.

12 Ànya ikyinayi 'da ago oŋgonayi loŋgo 'da

amba riyä si 'Bereŋwa Zaiona dri,

ago ànya a'donayi 'da yai'dwesi ta ŋgapäṛi maro rota,

ŋgapäṛi inya ro vino ro ndi ido ice ido ro robe,

ŋgapäṛi timele ro ndi ti be.

Ànya a'donayi 'da oso ämvu se aso gyi be kadoro driigye 'do ronye;

ànya ezaruna ko tona.

13 'Dooko ndiriŋwa otona läri 'da ago a'donayi 'da

yai'dwesi,

agoànji ndi agoàmbago be,

oyenayi riyä 'da.

Motozana liyi ànyaro 'da riyä ro.

Mi'dwena ànya 'da ago motozana,

tusu ànyaro 'da riyä ro.

14 Ma'bana ya kohanii ro 'da ogane twi ŋgaonya se toco iyi si

ago ŋga ojona lemeri cini lidri maro ro 'da.

Ma, OPI, matani.”

Yauni OPI ro Yisaraele lomvo

15 OPI ka ata ekye:

“Eri kporo aza te Rama ya,

kporo liyi tusu ro yi.

Raele ka liyi ni ta ŋgàga anyaro rota;

ago anya gatezo yi i'dwene,

tana ŋgàga ànyaro te i'do

16 Nyili kote ago miyo miendre miro.

Tase cini miyebe ta ŋgàga miro rota 'do

äpäṛina mi 'da tana ro;

ànya egonayi 'da ni wari kyila'baazi ro yasi.

17 Mio'ba orivoya ta mile miro ya ta;

ŋgàga miro egonayi 'da kovole 'bädri ànyaro ya.

Ma, OPI, matani.

18 “Meri lidri Yisaraele ro kayi ata tusu si ekye:

‘OPI, nyeza ama te oso koronya se leyeako iyi ronye,

caoko nyemba ama te taorone.

Nyologo ama kovole tana mègo robe;

tana mi ni orivoya OPI Lu amaro.

19 Mànarute ni miresi,

oko mètadri te.

Ondro emba ama te oko, màbi kätäti amaro te tusu si,

ama te orivoya driupiro ago tusuro.

Tana màye takozi te tuse ama be ombato'diro ana si.’

20 “Yisaraele, mi orivoya ŋgwa maro,

ŋgwa maro se mulu tawi ono owo.

Tu cini si ma ca ata milomvo oko,

ma 'du ta miro usuna.

Ya maro orivoya mi ta;

ondro ma'dona ndi yauni be miri.

21 Nyèdre ce taka'daro liti dri liti ka'daza ämiri;

mìyi ta liti se nyòyibe kigyesi iyi ro.

Nyègo kovole, ami lidri Yisaraele ro ono,

nyègo 'bäru 'ba'desii se amiro kwoi ya.

22 Nyà'dona wiriwiriro inye tu na mu'du eŋwanyeya,

ami lidri se ta'diriako ono?

Ma'ba ŋga aza te to'diro to 'bädri ya,

orivoya to oso toko se kabe ni manoago gaga 'do ronye.”

Kandrakado Lidri Lu ro ro Tu Mileya ya

23 OPI Mbaraekye, Lu Yisaraele ro, ka ata ekye: “Ondro mologo lidri ono te wari ànyaro ya oko, ànya ogo atanayi 'da kpa to'dina wari Yuda ro ndi 'ba'desi nai be yasi ekye:

‘OPI käṛu mi 'bakici alokado ono,

mi lutu alokado ono.’

24 Lidri orina 'da voalo ya Yuda ya ago 'ba'desi nai yasi, ämvuoso'bai tro lekye'bai gboko timele ànyaro robe. 25 Mago motombana ànya se kokwobe iyi 'da ago ma'bana ŋgaonya ojona 'dicini se te mbaraako ni täbiri ri iyi 'da. 26 'Dooko, lidri atana 'da ekye: ‘Macite u'dune ago mäpimite oko u'du maro a'do ro kadoro märi.’

27 “Ma, OPI, ma ata makye tu aza ka oye esane se ma'bana lidri ndi koronyai 'ba robe 'da litine twi wari Yisaraele ndi Yuda robe ya. 28 Oso mandrevo ànyaro be, meŋgye ànya be ndrwi paji be, mäbi ànya be vuru, mavo ànya be vuru, mutufu ànya be, ago mezi rriti be ànya dri ana ronye, mikyi'dina ànya 'da ago motombana ànya 'da kpa oso inye taoti si. 29 Ondro tuse ana kesate oko, lidri unina kote atane ekye:

‘Uti'bai amaro nyàyi doŋgo äträ kono rote,

ago ŋgàga ànyaro sina todra leni.’

30 'Dicini todrana 'da ta takozi modo ndaro rota, 'dise cini kabe doŋgo äträ kono ro onyana iyi sina odrana ṛo odra.”

31 OPI ka ata ekye: “Tu aza ka oye esane se ma'bana tao'baro to'di 'da lidri Yisaraele robe ago lidri Yuda robe. 32 Unina ko a'done oso tao'baro uku se ma'babe zutui ànyaro be tuse märu ànya be drì si ago molofo ànya te ni wari Ezipeto ro yasi ana ronye. Ànya ätiyi tao'baro maro se ana kote, ma'do gica oso ago ronye ànyari owo. 33 Oko ono ni tao'baro to'di se ma oyebe o'bane lidri Yisaraele robe owo. Ma'bana ota maro 'da ya ànyaro ya, ago megyina 'da ya ànyaro yasi. Ma'dona 'da Lu ànyaro ago ànya a'donayi 'da lidri maro. 34 Alo aza ànyaro unina ko oriazi ndaro ago ädrupi ndaro embane Lu unine, tana vona cini uninayi ma 'da, ni 'dise giṛiŋwà ro ya le 'di'desi ya. Me'bena ànya 'da ta takozi ànyaro rota ago mänina kote takozi ànyaro tana oyine tona. Ma, OPI, matani.”

35 OPI 'ba kitu ni ŋgaeyine kitu si,

ago ra imba ndi 'bi'bii be ni voeyine ŋgäkyi si.

Nda kani gyi'desi kanda ago kani o'bana kporo oyene;

ävuru ndaro ni OPI Mbaraekye.

36 Nda 'ba tao'ba te ekye ondro ka'do ota se 'bädri miri ro ono kokyete, 'dooko zelevoi Yisaraele ro,

unina kote a'done tu'de ro tona.

37 Ondro ka'do äni gindi vokuru ojone,

ago äni gindi osane le kotopa 'bädri roya,

'dooko OPI o'dena gwo lidri Yisaraele ro oganezo

ta tase cini ànya koyeyibe ana rota.

38 OPI ekye: “Tu aza ka oye esane, se ago abena Yerusalema 'da a'done 'bakici maro ro, etona 'da ni aŋgoyasi Tiṛiwiṛa Hananela ro yasi le Dereŋwa Cukudriro ya. 39 Ago asina kishwena 'da ni nasi aŋgoyasi oyina gwo le lutu Gareba ya ndi goṛina ozaruna gwo le Goa ya. 40 Ago vo vodelero, se abe avo ose kigye ago abe ŋga aŋgwa ovo kigye 'do ro kpeye, ndi ämvu cini se drile goloŋwa Kidrona roya iyi be osana gwo le 'buzelesi Dereŋwa farasi roya, a'dona 'da alokado ro märi. Änina kote ogone 'bakici ono togane kode perene kpa to'dina.”