Yeremaya 28 - The Holy Bible in Moru (BAIBOLO ALOKADO) (MB)

Yeremaya ndi Nebi Anania be

1 Ndroa gialo ana si, imba linji ndroa lisu ori Zedekia ro 'bädri'ba ro si, Anania ŋgwa Azura ro, nebi se ni 'ba'desi Gibeona yasi ana, atate märi Yekalu ya. Nda ititate märi mile kohanii ndi lidri robe yasi ekye, 2 OPI Mbaraekye, Lu Yisaraele ro, atate ekye: “Motoŋgo mbara 'bädri'ba Babelona ro rote. 3 Ndroa ritu ono ya mago mologona lakaza cini Yekalu ro se 'Bädri'ba Nebukadenezara kuŋgyibe le Babelona ya iyi 'da kovole vo ono ya. 4 Ago mologona 'bädri'ba Yuda ro, Jehoiakina ŋgwa Jehoiakima ro kpa 'da, tro lidri cini Yuda ro se koyiyibe midiro Babelona ya iyi be. Endaro motoŋgona mbara 'bädri'ba Babelona ro ro 'da. Ma, OPI, matani.”

5 'Dooko ma Yeremaya matate Nebi Anania ri mile kohanii ndi lidri cini se kedreyibe Yekalu ya ana ro yasi makye: 6 “Ka'do ndi inye! OPI koye ndi oso inye! OPI ko'ba taäŋgu miro a'done taŋgye ro ago kologo lakazà Yekalu ro ndi lidri cini se ärube kamba'bai ro iyi ni Babelona yasi. 7 Oko nyeri tase mabe atana miri ago lidri cini ri ono. 8 Nebii se katayibe kyeno, teinye dri ṛo tu maro ndi miro be ri esaako kai, äŋguyitate ekye kyila, mä'bu, ndi adravo koziro be ikyina 'da tu'dei amba ndi 'bädri cini se mbaraekye iyi be dri. 9 Oko nebi se kabe taäŋgu ekye taliatokpe ka oye a'done ago ondro 'dooko änina ndi taäŋgu ndaro ka'dote taŋgye ro anjioko endaro OPI ezo ndi ni.”

10 'Dooko Anania ru juṛu teni kyembe ma Yeremaya ro yasi, toŋgo te jinyijinyi, 11 ago atate mile lidri cini ro yasi ekye: “OPI atani ekye ya oye juṛu se 'Bädri'ba Nebukadenezara ko'babe kyembe tu'dei cini roya 'do oŋgone oso inye ndroa gi ritu 'do ya.” 'Dooko moyite ni nasi.

12 Ta ono vosi tu aza si oko OPI atate ma Yeremaya ri 13 oyine atane Anania ri ekye: “OPI atate nonye ekye nya'dote mbara be juṛu se ice ro 'do toŋgone, oko ya oye ogone juṛu logo ro o'bane vona ya. 14 OPI Mbaraekye, Lu Yisaraele ro, atate ekye ya oye juṛu logo ro o'bane tu'dei se cini kwoi kembe ago ànya indurunayi 'da Nebukadenezara 'Bädri'ba Babelona ro ri. OPI atate ekye yi'bana ca koronyai vocowa ro kpa 'da ruindune Nebukadenezara ri.”

15 'Dooko miti ta ono te Anania ri makye: “Nyeri dri, Anania! OPI ezo mi kote ni, ago nya lidri kwoi o'bana taomane ta kowe ro ono ya. 16 Tana ta'doro OPI andivona ka ata ekye ya oye mi ufune. Midrana 'da ndroa ono ya tana nyatate lidri ri ogbone OPI be.”

17 Ago Anania drate imba njidrieri ndroa modo se ana rosi.