Yeremaya 23 - The Holy Bible in Moru (BAIBOLO ALOKADO) (MB)

Mio'ba ta Mileya ta

1 Kyila OPI ro ka oye a'done kozipara dri'bai se kabe lidri ndaro tufuna ago perena 'do lomvo! 2 Ono ni tase OPI, Lu Yisaraele ro kabe atana dri'bai se aba ni ànyari ta lidri ndaro ro otine iyi ri owo ekye: “Nyèpere lidri maro ro ago nyòro ànya te di; ago mìtita ànyaro kote. Ka'do inye ma oye ami ezane ta tase koziro mìyebe ono rota. 3 Motona anjoko lidri maro ro 'da ni 'bädrii se mepere ànya be kigyesi iyi yasi, ago mago mezina ànya 'da kovole 'ba ànyaro yasi wari ànyaro ya. Ànya a'donayi 'da ŋgàga be amba ago litinayi 'da nyalakpa. 4 Maka'dana dri'bai 'da vo ànyaro ondrene. Lidri maro uninayi kote a'done turiro ago lä'bilä'biro, ago ca mänina kote ànya ezane kpa to'dina. Ma, OPI, matani.”

5 OPI ka ata ekye: “Tu aza ka oye esane se manjina taŋgye'ba aza 'da 'bädri'ba ro ni zelevo Dawidi ro yasi. 'Bädri'ba se ana mirina 'di 'da tavouni si ago oyena taŋgye ndi ta'diri be 'da wari ono yasi gbikyi. 6 Ondro nda ka'dote 'bädri'ba ro oko, apana lidri Yuda ro 'da ago lidri Yisaraele ro orinayi 'da tokpero. Äzina nda 'da OPI taŋgye'ba amaro owo.”

7 OPI ekye: “Tu ka oye esane, se lidri unina kote ruäṛune ma Lu lidriidriro se molofo lidri Yisaraele ro be ni wari Ezipeto ro yasi ono si. 8 Oko ànya ogo äṛuruna te ma Lu lidriidriro se molofo lidri Yisaraele ro be ago melepe ànya te ni wari mä'dudrisi yasi ago ni 'bädri azaka se mepere ànya be kigyesi iyi yasi ono si. 'Dooko ànya orinayi 'da wari modo ànyaro roya.”

Lazo Yeremaya ro ta Nebii rota

9 Ta Nebii rota; Ya maro lesite,

ago lomvo cini maro lä'bi te,

ma'dote oso mano se wa fute 'do ronye

oso mano se mvu vino te amba ndra 'do ronye,

tana ta OPI rota,

ago ta ata alokado ndaro rota.

10 Wari te orivoya twi lidri se ta'diriako OPI ri ono be;

ta'dota wari kate ruṛuo'be ni latri OPI ro ri

ago lowoi wite,

ànya kayi ori kozi lori ago kayi mbara ànyaro enjina liti koziro yasi.

11 OPI ka ata ekye:

“Kohanii ndi nebii be te orivoya lu ako;

tana musu ànya te takozi oyevoya Yekalu modo maro roya.

12 Ta'dota liti ànyaro a'dona 'da toretorero ago ŋgätini ro;

ago o'bana ànya 'da lapane ago o'dene.

Ma oye rriti ezine ànya dri;

tu taezaro ànyaro rosi.

Ma, OPI, matani.

13 Mandre takozi nebii Samaria ro rote;

ànya atayitate ävuru Bala rosi

ago 'bayi lidri maro Yisaraele rote vujene.

14 Oko mandre nebii se Yerusalema ya taoyena teni kozipara ndra:

ànya kayi ronyi oye toko kode ago drisi ago kayi koweoga;

ànya kayi lidri o'ba takozi oyene,

ta'doro cu 'diaza e'be takozi oye kote.

Märi, ànya cini orivoya koziro oso lidri

Sodomo ro ndi lidri Gomora robe ronye.”

15 Tana ta'doro, ono ni tase, OPI Mbaraekye, kabe atana ta nebii Yerusalema ro rota owo ekye:

“Mozona ice osoro 'da ànyari onyane

ndi äṛi be ànyari umvune,

tana nebii kwoi lariyi ta a'do luako ro tana te wari ono yasi gbikyi.”

16 OPI mbaraekye atate lidri Yerusalema ro ri ekye: “Nyèri tase nebii kayibe atana 'do ko; ànya kayi ami odo. Ànya kayi tase ànya kusuyibe drî ànyaro si 'do atana ayani ago ko tase matabe owo. 17 Ànya kayi ugu 'du ata lidri se kogayi bezo ata maro erine iyi ri ekye, ‘Ta cini a'dona ndi kadoro ämiri.’ Ago ànya kayi ata 'dicini se taeriako iyi ri ekye: ‘Rriti unina ko cu ami odone.’ ”

18 Matate makye: “Alo aza nebii kwoi ro ni tavousu ndrwi OPI ro ko'de. Ago aza ànyaro eri ago ni tazevo lazo ndaro ro ko alona, kode gayi bi kote tase nda kabe atana ya. 19 Kyila ndaro orivoya oli gbiriṛibe ronye, olina 'da mbarasi ago usina 'da lidri se koziro iyi drisi; 20 kyila OPI ro unina ko okyene madale ondena tase cini nda kolebe oyene lutu. Tuse ka oyebe ikyine ana ya lidri unina ta ono zevona 'da ŋbelero.”

21 OPI atate ekye: “Mazo nebii kwoi kote ni, caoko ànya oyiyite. Mata ta aza kote ànyari, caoko ànya kayi ata ävuru maro si. 22 Aba ondro ka'do ànya kuniyi tavousu ndrwi maro gwo, 'dooko aba ànya openayi lazo maro ndi lidri maro ri ago aba nonye ono 'ba ànya te ori se undiro ago taoye se koziro ànya kayibe loyena ono e'bene.

23 “Ma orivoya Lu se orivoya loto ti ono owo ago ma ko Lu se orivoya lozo owo. 24 Inye'do 'diaza unina gi'da ruda'done vo aza se mänina ko nda ondrene 'do ya ya? Inye'do ma ṛoko vo cini yasi vo'buyakuru ya ago 'bädri ya ya? 25 Mäni tase nebii kai katayibe ono te se kayi koweoga ävuru maro si ago kayi ata ekye mozo lazo maro ni iyi ri tori se kabe taezi ànya dri ana si. 26 Nebii se kayibe kowe oga ävuru maro si iyi ugunayi oyena inye tuna mu'du eŋwanyeya? 27 Ànya kusuyi iro be ekye tori se ànya kayibe tana itina ana o'bana lidri maro gwo ta maro ijene, oso zutui ànyaro kijeyi ta maro be ago kosoyibe Bala vo ana ronye. 28 Mi'ba nebi se tori kezitate drigye, kata ekye 'do toto tori yi, oko nebi se keri lazo maro be 'do kope lazo maro 'do 'diriro. Ojo kyekyepa yi be kyifo be eŋwani ni kado ya? 29 Lazo maro orivoya oso asi ronye, ago oso kyidi se kabe luutu tufu jinyijinyi 'do ronye. 30 Ma orivoya kyilaro nebii se kuruyi ata azii ro gwo ago riyi gwo opene oso lazo maro ronye iyi be. 31 Ma kpa orivoya kyilaro nebii se kayibe ata modo ànyaro ro atana ayani ago kayi ata ekye ata 'do ikyi ni maresi iyi be. 32 Nyeri, tase ma, OPI, mabe atana ono! Ma orivoya kyilaro nebii se kayibe tori se kowero iyi tana itina ayani iyi be. Ànya itiyi tori kwoi gwo ndi 'bayi lidri maro gwo vujene wayiro koweoga ànyaro ndi driuŋgyi ànyaro 'do be si. Mazo ànya koni ago mozo ota koni ànyari oyine, ànya yeyi ŋgaopa aza ko lidri ri alona. Ma, OPI, matani.”

Ŋgaläŋgyi OPI ro

33 OPI atate märi ekye: “Yeremaya, ondro alo aza lidri ono ro kode nebi aza kode kohani aza keji mite ekye: ‘Lazo OPI ro ekye e'diya?’ 'Dooko nyitita ndäri mikye: ‘Mi orivoya ŋgaläŋgyi yi OPI ri, ago nda ka oye mi ezane.’ 34 Ondro ka'do alo aza nebi kode kohani aza kode lidri aza kata ta gi ekye ‘Ŋgaläŋgyi OPI ro’ ono te, mezana nda 'da ndi katidri ndaro be. 35 Oko, 'dicini ri bereazi ndaro ago 'didirii ndaro ejine ekye: Tadrioza OPI ro ekye e'diya? Kode OPI ata ekye e'diya? 36 Ta'doro beṛo ko ànyari ata gi ekye ‘Ŋgaläŋgyi OPI ro’ ono atane tona, tana ata 'dialo ro orivoya ŋgaläŋgyi modo ndaro ro. Ago lidri toza ata Lu amaro, Lu se lidriidriro, OPI Mbaraekye rote to. 37 Yeremaya, nyeji nebii mikye: ‘Tadrioza OPI ro ämiri ekye e'diya? OPI ata ekye e'diya?’ 38 Ago ondro ka'do ànya koroyi ota maro kote ago katayi ta gi ekye ‘Ŋgaläŋgyi Opi ro’ se makye ànya katayi ko 'do te, 39 'dooko nyitita ànyari mikye endaro märuna ànya 'da ago mavona ànya ndi lozo di ni maresi, ànya ndi 'bakici se mozobe ànyari ago zelevoi ànyaro ri 'do be. 40 Mezina driupi äduako ndi ànya dri ndi ŋga mawo se änina ko tana ijene alona 'do be.”