Yeremaya 1 - The Holy Bible in Moru (BAIBOLO ALOKADO) (MB)

Yeremaya

1 Buku ono egyi tase atabe Yeremaya, ŋgwa Ilekia ro, alo aza kohanii se koriyibe Anatota ya wari Benjamina roya ro. 2 OPI atate Yeremaya ri ndroa 'butealo fonätu tu 'dimiriro Josia ŋgwa Amona ro, 'bädri'ba Yuda ro rosi, 3 ago OPI atate ndäri kpa to'di tuse ŋgwa Josia ro, Jehoiakima ni 'bädri'ba Yuda ro ana si. Ono vosi, OPI atate ndäri perena amba, madale ndroa 'butealo foalo ori Zedekia ŋgwa Josia ro, 'bädri'ba ro Yuda ya ana si. Imba linji ndroa ana rosi oko äru lidri Yerusalema ro te midiro.

Uzi Yeremaya ro

4 OPI atate märi ekye: 5 “Manji mite ṛoni ya endre roya teinye märi adri ozoako miri, ago ṛo teinye dri mi utiako mäṛu ni teṛo, ago maka'da mi te a'done nebi ro tu'dei ri.”

6 'Dooko mazatadrite makye: “OPI Mbarapara, mäni ta ata ko, tana ma orivoya pari agoanjiŋwa ro.”

7 Oko OPI atate märi ekye: “Nyata ko mikye, ‘Ma orivoya pari agoanjiŋwa ro,’ oko nyoyi 'di se cini mabe mi ozo ànyare ana re ago nyiti tase cini mata mi be atane ono. 8 Nya'do ko turiro ni ànyari, tana ma'dona ndi tro mibe mi gagane. Ma, OPI matani.”

9 'Dooko OPI ozo drì ndaro te, do kala maro te; ago atate märi ekye: “Nyeri, mozo ata maro te miri atane. 10 Tu ono si ono ma'ba mi te drikaca be tu'dei dri ago 'bädri se abe mirina 'bädri'bai si iyi dri, eŋgyene ndrwi ago perene vuru, toŋgone ago perene riya, obene ago kyi'dine.”

Rulofoi Ritu

11 OPI eji ma te ekye: “Yeremaya, mindre e'diyi ya?” Mazatadrite makye: “Mandre gwoṛi ce likwo ro ro.”

12 'Dooko OPI atate märi ekye: “Mindrete orivoya ŋgye, ago ma ugu ondrena male ondrene anjioko ata maro ka oye a'done taŋgyero.”

13 'Dooko OPI atate märi pere ṛiri si ekye: “Mindre azana e'diya?”

Mazatadrite makye: “Mandre lakaza aza gyi usiusiro be, eza kalana noŋwa ni mä'dudrisi.”

14 Ndi OPI atate märi ekye: “Ŋgapere ikyina 'da ni mä'dudrisi lidri se cini kabe ori wari ono ya dri, 15 tana ma tu'dei se cini mä'dudrisi iyi uzi ikyine. 'Bädri'bai ànyaro oranayi gyiti ànyaro 'da dereŋwai Yerusalema ro kalasi ago gbikyi tiṛii anyaro lomvosi ago kpa gbikyi 'bakicii cini Yuda ro lomvosi. 16 Mezana lidri maro 'da ta takozi se ànya koyeyibe ma e'besi 'do rota, ànya loyi tori te lui azaka ri, ago mätuyi lui edeedero ànya te. 17 Nya'do nja Yeremaya; nyoyi ago nyiti tase cini mata mi be tana atane kwoi ànyari, nya'do ko turiro ni ànyari, ukyi ma'ba mi kpa 'da turiro ndra ànya kandra. 18 Nyeri dri, Yeremaya! Ondro ono ma mbara ozo miri nya'dona 'da oso 'bakici mbaraekye ronye, läŋgyiri logo ro ronye, ago tiṛi atala ro ronye. Edrene 'dicini se orivoya wari ono ya, 'bädri'bai Yuda ro, dri'bai losi ro, kohanii ndi lidri cini be mile. 19 Ànya oyena kyila 'da mibe, oko ànya uninayi ko mi opene ṛe tana ma'dona ndi tro mibe mi gagane. Ma OPI, matani.”