Vureope'bai 12 - The Holy Bible in Moru (BAIBOLO ALOKADO) (MB)

Yepetaha ndi Eperaima'bai be

1 Lidri Eperaima ro edeyi iyi te kyila oyene; ànya zayidrî Golo Yaradene rote le Zafona ya ago atayite Yepetaha ri ekye: “Tana e'di mi'de gwo drî kishwe ro ozane kyila oyene Amona'bai be teinye ama uziako niya? Màzana zo miro ndi midri asi si!”

2 Oko Yepetaha atate ànyari ekye: “Ma ndi lidri maro yibe màpe kalate rritiro Amona'bai be. Mäzi ami ndi oko mìpa ma kote ni ànya rigyesi. 3 Ago ondro mandrete mile kote ma opane oko, manja ṛo gwo adri maro lomvo, ago mazate kyila oyene ànya yibe, ago OPI 'ba ma te ànya opene ṛe. Ka'do inye, ondro ono tana e'di nyìkyi gwo mädri kyila oyene mabe ya?” 4 'Dooko Yepetaha otokala lidri cini Gilada ro rote ago ye kyila te lidri Eperaima robe; ago pe ànya te ṛe. Eperaima'bai atayite ekye: “Ami Gilada'bai mimute ni Eperaima ndi Manase be yasi!” 5 Ago Gilada'bai ruyi vose ozavo Golo Yaradene roya ana te, ukyi Eperaima'bai opavo 'da. Ago ondro Eperaima'ba se kayibe umu kai katate ekye mì'ba maza tasi oko, lidri Gilada ro eji nda te ekye: “Inye'do mi Eperaima'bai ya?” Ondro nda katate ekye: “Hwa,” 6 ànya atayite ndäri ekye: Dia nyata mikye: “Shiboleta.” Ago nda atate ekye: “Siboleta,” tana nda ni ko uzine ŋgye; 'dooko ànya ruyi nda te ago fuyi nda te lau ozavo aza Golo Yaradene roya. Lidri Eperaima ro se äfube tu ana si orivoya kutu 'butesu foritu (42,000).

7 Yepetaha a'dote dri'ba ro Yisaraele dri ndroa na njidrialo. 'Dooko nda drate, ago ase nda te 'ba'desi alo aza Gilada ro ya.

Ibezana, Elona, ndi Abedona be

8 Yepetaha vosi Ibezana ni Beteleme yasi a'dote dri'baro Yisaraele dri. 9 Nda orivoya ŋgwàagoro be 'butenätu, ago ndiriŋwa be 'butenätu. Nda ozo ndiriŋwa ndaro te ogyene 'di to se ko käläsikala ndaro ro 'do ri, ago nda gyete ndiriŋwa to se ko käläsikala ndaro ro 'do ayani ŋgwàagoro ndaro ri. Ibezana a'dote dri'baro Yisaraele dri ndroa na njidrieri. 10 'Dooko nda drate ago asete Beteleme ya.

11 Ibezana vosi Elona ni Zebuluna yasi a'dote dri'baro Yisaraele dri ndroa na 'butealo. 12 'Dooko nda drate ago asete Aijalona ya wari Zebuluna roya.

13 Elona vosi Abedona ŋgwa Hilela ro ni Piratona yasi a'dote dri'baro Yisaraele dri. 14 Nda orivoya ŋgwàagoro be 'butesu ago kwozoŋwà àgoro be 'butenätu, se lämuyite doŋgyii 'butenjidrieri si. Abedona a'dote dri'baro Yisaraele dri ndroa na njidriena, 15 'dooko nda drate ago asete Piratona ya wari Eperaima roya, 'bädri lutu ro Amaleka'bai roya.