Vureope'bai 10 - The Holy Bible in Moru (BAIBOLO ALOKADO) (MB)

Tola

1 Odra Abimeleka ro vosi oko Tola, ŋgwa Pua ro kwozo Dodo ro, ŋgate Yisaraele opane. Nda ni 'bakala Yisakara ro yasi ago rite Samira ya 'bädri lutu ro Eperaima roya. 2 Nda a'dote dri'ba ro Yisaraele dri ndroa na 'buteritu fonätu. 'Dooko nda drate, ago asete Samira ya.

Jaira

3 Tola vosi Jaira ni Gilada yasi ŋgate. Nda a'dote dri'ba ro Yisaraele dri ndroa na 'buteritu foritu. 4 Nda orivoya ŋgwàagoro be 'butenätu se lämuyite doŋgyii 'butenätu si. Ago ànya orivoya 'bakicii 'butenätu be wari Gilada roya se äzite 'bakicii Jaira ro gile tu ono si ono. 5 Jaira drate ago asete Kamona ya.

Yepetaha

6 Ago Yisaraele'bai go yeyi taundiro kpate to'dina OPI mile, mätuyi Bala yi ndi Asetarete yi be te, ndi lui Siria ro, Sidona ro, Moaba ro, Amona ro, ndi Felesete'bai robe te. Ànya e'beyi OPI te, ago mätuyi nda kote. 7 Ta'dota OPI a'dote kyilaro Yisaraele'bai be, ago nda ozo ànyate Felesete'bai ndi Amona'bai be rigye. 8 Ànya yeyi drikyitri te ago ezayi Yisaraele'bai te ndroa ana si. Ànya ezayi Yisaraele'bai cini se koribe 'bädri Amora'bai roya 'buzele Golo Yaradene roya Gilada ya kai te ndroa na 'butealo fonjidriena. 9 Ago Amora'bai zayidri Golo Yaradene ro kpate kyila oyene 'bakalai Yuda, Benjamina, ndi Eperaima robe. Ndi rueza Yisaraele ro a'dote ndra.

10 'Dooko Yisaraele'bai ayoyidrite OPI ri ekye: “Màye takozi te mi lomvo, tana mè'be mi Lu amaro te, ago mä̀mätute Bala ayani.”

11 Ago OPI zatadri Yisaraele'bai ro te nonye ekye: “Tuse Ezipeto'bai, Amora'bai, Amona'bai, Felesete'bai, 12 Sidona'bai, Amaleka'bai, ndi Maona'bai be, kezayi ami te si nyàyodrite märi. Inye'do mapa ami ṛoko ni ànya risi ya? 13 Caoko nyè'be ma te ago nyä̀mätu lui azaka te; ta'doro märi ami opane te i'do tona. 14 Nyòyi driayone lui se mìnjibe ri. Mi'ba ànya kopayi ami tu rriti amiro rosi.”

15 Oko lidri Yisaraele ro atayi te OPI ri ekye: “Màye takozi te. Tase milebe oyene ämäri miye teri; oko molo'baru miri, tu ono si ono mipa gi toto ama ayani.” 16 Ta'dota ànya anayi lui atra ro teni ànya lakosi ago mätuyi OPI te; ago nda ni kote yaiŋgyine ni rueza Yisaraele ro ondrevoya.

17 'Dooko Amona'bai edeyi kyila'bai ànyaro te, ago otoyi gawa te Gilada ya ago lidri Yisaraele ro ikyiyite voaloya, ago otoyi gawa te Mizepa se Gilada ya ana ya. 18 Ago ni lau lidri Yisaraele ro ndi dri'bai ànyaro be ejiyi iyi te iyivoya ekye: “Mano a'di etona kyila ni Amona'bai be ya? Nda se koyete inye a'dona ndi ni dri'ba ro ama lidri cini se Gilada ya ono dri.”