Miomba Ozo Lidri Ŋgadriamba be ri
1 Ami lidri ŋgaamba be, nyèri ta maro! Nyìli ago mì'be kuku rriti se kabe ikyi ämidri ono tana ro! 2 Ŋgaamba amiro ŋgwate, ago boŋgoi amiro ludui nyate. 3 Logo läguläguro amiro ndi mo'di be te tokatoka ro, ago tokana ono a'dona 'da tazevoedreza ami lomvo ago onyana iza lomvo amiro ro 'da. Orivoya oso asi se mìdro be tui äduro ta ronye. 4 Nyòzo päläti kote lidri se kabe losi oye ämvu amiro ya ri. Nyèri driovi ànyaro tana! Liyi ànya se kayibe ŋga jalia ro amiro kotona ro sate bi Lu, Opi Mbaraekye roya. 5 Ori amiro 'bädri ya noŋwa a'dote twi ŋgadriamba be ago riyä ro. Mì'ba andivo amiro te oshweoshwe ro ta tu ŋgatufu rota. 6 Mìpe vure te ago nyùtufu lidri taŋgye'bai te, ago ànya ogbo kote ami be.
Yaiŋgyi ndi Mätu be
7 Ka'do inye, nyà'do yaiŋgyi be, ädrupii maro, madale Opi kesa gwo. Mìndre yaiŋgyi ämvuoso'ba ro se nda kabe gyini ndaro kotena doŋgo liŋgyiekye owane. Yaiŋgyi si nda ka 'bu duru ro kotena. 8 Beṛo kpa ämiri a'done yaiŋgyi be. Mì'ba mio'ba amiro ka'do ndra, tana ikyi tu Opi ro kate ezi esa ti.
9 Mìvidri ko azi be, ädrupii maro, ukyi Lu ope vure amiro 'da. Vureope'ba orivoya loto nja ruka'dane. 10 Ädrupii maro, mìyi ta nebii se kope ta be ämiri ävuru Opi rosi ro. Mìru ànya oso taka'daro yaiŋgyi rriti iŋgyi ro taezaro zele ronye. 11 Mäzi ànya te kado tana ànya iŋgyiyi ya te. Nyèri yaiŋgyi Eyobo ro tana te, ago mìnite äduro oko Opi ozo ŋga te ndäri. Tana Opi orivoya twi yauni ndi yai'dwe be be.
12 Para ndrana, ädrupii maro, nyàte tao'ba oko nyä̀ṛuru ko, nyä̀ṛuru ko vo'buyakuru si kode 'bädri si kode ŋga aza si. Nyàta toto, mìkye! “Owo” ondro mìlete atane owo, ago “hwa” ondro mìlete atane hwa owo, ukyi nyìkyi 'da vure Lu ro zele.
13 Inye'do 'diaza orivoya ami lako rriti be ya? Beṛo ndäri mätune. Inye'do 'diaza orivoya yai'dwesi ya? Beṛo ndäri loŋgo räṛu ro oŋgone. 14 Inye'do 'diaza orivoya adravoro ya? Beṛo ndäri lazo ozone dri'bai känisa ro ri, se mätuna 'da ta ndaro ta ago oṛinayi ido ice ido ro ro 'da nda lomvo ävuru Opi rosi. 15 Mätu ono ayete taoma si edena 'di adravoro 'da, Opi edena nda 'da jiŋgyiri ro, ago takozi se nda koyebe e'bena nda 'da tana ro. 16 Ago ka'do inye, nyèṛo takozi amiro azi ri ago nyä̀mätu azi ta, tana ede ami robe. Mätu mano kadoro ro mbara amba be taoye ya. 17 Eliya orivoya kpa lidri yi oso ama ronye. Nda mätute ya cini si ko 'bu ri u'dine, ago 'bu 'di kote 'bädri ya ndroa na nätu kpäkyi. 18 Nda go mätute kpa to'di, ago vokuru eda 'bu te ago gyini lofo doŋgoi iro te.
19 Ädrupii maro, ondro alo amiro konaru teni taŋgye yasi ago 'diaza kogo kologo nda te kovole kpa to'di, 20 mìyi ta ono; nda se kabe drî takozi'ba ro ezana kovole ni taoye kozi ndaro yasi opana lindri takozi'ba ro 'da ni odra yasi ago ezina ŋgae'bero 'da ta takozi amba rota.
© The Holy Bible in Moru © The Bible Society in the Sudan, 2000